ބޮލީވުޑްގެ މަޝްހޫރު ލަވަކިޔުންތެރިޔާ އަރިޖީތު ސިންގް، ލަވަކިޔުމުން ރިޓަޔާކުރިކަން އިއުލާނުކުރުމަށްފަހު އަލުން އެނބުރި އައިސް، އިމްރާން ހާޝްމީގެ ކުރިއަށް އޮތް ފިލްމު "އަވާރަޕަން 2" ގެ ޓައިޓަލް ލަވަ ކިޔައިދީފި އެވެ.

މި އަހަރުގެ ޖެނުއަރީ 27 ވަނަ ދުވަހު އަރިޖީތު ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، މީގެ ފަހުން އެއްވެސް ފިލްމަކަށް ލަވަކިޔައިދިނުމުގެ މަސައްކަތެއް އޭނާ ގަބޫލުނުކުރާނެ ކަމަށާއި، ލަވަކިޔުމުގެ ދާއިރާއިން ރިޓަޔާވާން ނިންމާފައިވާ ކަމަށެވެ. ނަމަވެސް، މަސްތަކެއްގެ މެދުކެނޑުމަކަށްފަހު އޭނާ އަލުން އެނބުރި މި އައީ އޭނާގެ ފޭނުންނަށް ވަރަށް އުފާވެރި ޚަބަރަކާއެކުގައެވެ.

"ޕިންކްވިލާ" އިން ރިޕޯޓްކޮށްފައިވާ ގޮތުގައި، "އަވާރަޕަން 2" ގެ ލަވަ "ޔޭ އަވާރަޕަން" ރިލީޒްކުރުމަށް ހަމަޖެހިފައިވަނީ މާދަމާ، ޖުލައި 21 ގައެވެ. މި ލަވަ ކިޔައިދީފައިވަނީ އަރިޖީތު ސިންގްގެ ހިތްގައިމު އަޑުންނެވެ.

"އަވާރަޕަން" ފްރެންޗައިޒްގެ ކްރިއޭޓިވް ފޯސް ކަމަށްވާ ވިޝޭޝް ބަޓް ބުނެފައިވާ ގޮތުގައި، މި ލަވައަކީ ފިލްމުގެ މައި ޝަޚްސިއްޔަތު 'ޝިވަމް ޕަންޑިތު' ގެ ރޫޙާ ގުޅިފައިވާ ލަވައެކެވެ. އަދި މި ލަވަ އަރިޖީތުގެ އަޑުން އިވިގެންދިއުމަކީ މި ފިލްމަށް ލިބޭ ވަރަށް ބޮޑު ފުރިހަމަކަމެއް ކަމަށް އޭނާ ފާހަގަކުރިއެވެ.

އަރިޖީތު ސިންގްއާއި ވިޝޭޝް ފިލްމްސްގެ ގުޅުމަކީ ބޮލީވުޑްގައި ވަރަށް ޚާއްޞަ ގުޅުމެކެވެ. އަރިޖީތު އެންމެ ފުރަތަމަ ދާއިރާއަށް ތައާރަފްވެގެން އައީވެސް ވިޝޭޝް ފިލްމްސްގެ "މާޑަރ 2" ގެ "ފިރް މޮހައްބަތު" ލަވައިންނެވެ. އޭގެ ފަހުން "އާޝިގީ 2" ގެ "ތުމް ހީ ހޯ"، "ސިޓީލައިޓްސް" ގެ "މުސްކުރާނޭ"، އަދި "ޚާމޯޝިޔާން" ފަދަ މަޝްހޫރު ގިނަ ލަވަތަކެއްގައި މި ދެ ފަރާތުން ވަނީ ގުޅިގެން މަސައްކަތް ކޮށްފައެވެ.

ނިތިން ކައްކަރް ޑައިރެކްޓްކުރާ "އަވާރަޕަން 2" ގައި އިމްރާން ހާޝްމީގެ އިތުރުން ދިޝާ ޕަޓާނީ އަދި ޝަބާނާ އަޒްމީ މުހިންމު ރޯލުތަކުން ފެނިގެންދާނެއެވެ. ވިޝޭޝް ފިލްމްސް އިން އުފައްދާ މި ފިލްމު ސިނަމާތަކަށް ރިލީޒްކުރުމަށް ހަމަޖެހިފައިވަނީ އޯގަސްޓް 14 ގައެވެ.