އިންޑިއާގެ "މައުގްލީ ގާލް" ގެ ނަމުން މަޝްހޫރުވި 18 އަހަރުގެ އޭހްސާސް، ލަކްނޯގައި ނިޔާވެއްޖެ އެވެ.

ފުއްޕާމޭގެ ބަލިމަޑުކަމެއްގެ ސަބަބުން ސިއްހީ ހާލަތު ގޯސްވެ، އޭނާ ނިޔާވީ ޖޫން 15 ވަނަ ދުވަހު ލަކްނޯގެ ޑރ. ރާމް މަނޯހަރު ލޯހިއާ އިންސްޓިޓިއުޓް އޮފް މެޑިކަލް ސައިންސަސް (އާރްއެމްއެލްއައިއެމްއެސް) ގައި ފަރުވާ ހޯދަމުން ދަނިކޮށެވެ.

މައުލޫމާތު ލިބޭ ގޮތުގައި އޭނާ ނިޔާވީ ފުއްޕާމޭގެ ބައްޔެއްގެ ސަބަބުން ލޭގެ ވިހަވުން (ސެޕްޓިސީމިއާ) އުފެދުމުގެ ސަބަބުންނެވެ.

އޭހްސާސް އާންމުންގެ ސަމާލުކަމަށް އައީ 2017 ވަނަ އަހަރު ބަހްރައިޗް ޑިސްޓްރިކްޓްގެ ކަތަރުނިއާގާތު ޖަންގަލީގެ ތެރެއިން އޭނާ ފެނުނު ހިސާބުންނެވެ.

އެ ދުވަސްވަރު އޭނާ އުޅުނީ އިންސާނުންނާ މުޅިން ދުރުހެލިކޮށެވެ. ހަތަރު އަނގޮޅިއަށް ހިނގުމާއި، ހެދުން އެޅުމަށް ދެކޮޅު ހެދުމާއި، އިންސާނުންނާ މުއާމަލާތު ކުރުމުގެ ބަދަލުގައި ޖަނަވާރުން ފަދައިން އަޑުލުމާއި އިޝާރާތް ކުރުން ފަދަ އަމަލުތަކުގެ ސަބަބުން އޭނާ އަށް "މައުގްލީ ގާލް" ގެ ނަން ދެވުނެވެ.

ފަހުން ބެލި ބެލުމުން، އޭނާ ޖަންގަލީގައި އުޅުނީ ހައިވާނުންނާ އެކު ކަމަށް ބުނެވުނު ވާހަކަތަކަކީ ހަގީގަތެއް ނޫން ކަމަށާއި، އޭނާ އަކީ ނުކުޅެދުންތެރިކަމެއް ހުރުމުގެ ސަބަބުން އާއިލާއިން ދޫކޮށްލާފައިވާ ކުއްޖެއް ކަމަށް ތަހުގީގުތަކުން ދައްކަ އެވެ.

ރެސްކިއު ކުރުމަށްފަހު، ލަކްނޯގެ ޚާއްސަ ކުޑަކުދިންގެ ހިޔާވަހިކަމަކަށް ބަދަލުކޮށް، "އޭހްސާސް" ގެ ނަން ދީ، އޭނާ އަށް ގިނަ އަހަރުތަކެއް ވަންދެން ފަރުވާ އާއި ރިހެބިލިޓޭޝަން ދެވުނެވެ. ބަލަދުވެރިން ބުނާ ގޮތުގައި، ގިނަ މަސައްކަތްތަކަކަށްފަހު އޭނާ ވަނީ ހެދުން އަޅަން ދަސްކޮށް، މީހުން ދެނެގަތުމަށާއި ލޯތްބާއި ކުލުނު ދޭން ދަސްކޮށްފަ އެވެ.

މި މަހުގެ ކުރީކޮޅު ބަލިވެ އުޅުމަށްފަހު، ހާލަތު ރަނގަޅުވެގެން ދޫކޮށްލި ނަމަވެސް، ޖޫން 15 ގައި އަލުން ހާލު ދެރަވެގެން ހޮސްޕިޓަލަށް ގެންދެވުނުއިރު ވެސް އޭނާ އޮތީ ވަރަށް ނާޒުކު ހާލަތެއްގަ އެވެ. ޖަންގަލީގެ ތެރެއިން ފެނުނު ކުއްޖަކު މުޖުތަމައުގެ ތެރެއަށް އަނބުރާ ގެނައުމަށް ކުރި މި ދަތުރު ނިމިގެން ދިޔައީ އޭނާގެ ހިތްވަރާއި އެތައް ބައެއްގެ ލޯތްބާއި އެކުގަ އެވެ.