މިއަހަރުގެ މަތިވެރި ޙައްޖުގެ އަޅުކަން އަދާކުރުމަށްފަހު، ސައުދީ އަރަބިއްޔާއަށް ދިޔަ ދިވެހި ޙައްޖާޖީންގެ އެންމެ ފަހު ގްރޫޕް ރޭ މެންދަމު ރާއްޖެ އަތުވެއްޖެއެވެ.

ޙައްޖުވެރިންގެ ފަހު ގްރޫޕް ރާއްޖެ އައިސްފައިވަނީ ރޭ މެންދަމު 00:00 ހާއިރު މޯލްޑިވިއަންގެ ޚާއްޞަ ފްލައިޓެއްގައެވެ. މި ފްލައިޓުގައި ޖުމްލަ 262 ޙައްޖާޖީން ވަނީ ރާއްޖެ އައިސްފައެވެ. ވެލާނާ އިންޓަނޭޝަނަލް އެއާޕޯޓުން މި ޙައްޖުވެރިންނަށް މަރުޙަބާ ދެންނެވުމަށް ސަރުކާރުގެ އިސް ބޭފުޅުންނާއި، ޙައްޖާޖީންގެ ޢާއިލާތަކުގެ ގިނަ ބަޔަކު ވަނީ އެއާޕޯޓަށް ޖަމާވެފައެވެ.

ޙައްޖުވެރިން އެނބުރި ރާއްޖެ އަންނަން ފަށާފައިވަނީ މިދިޔަ ހުކުރު ދުވަހުއެވެ. އެ ދުވަހު ރާއްޖެ އައި ފުރަތަމަ ފްލައިޓުން 240 އަށް ވުރެ ގިނަ ޙައްޖާޖީން އައިސްފައިވާއިރު، ދެވަނަ ގްރޫޕް ރާއްޖެ އައީ މިދިޔަ އާދީއްތަ ދުވަހުއެވެ. އެ ގްރޫޕުގައި 262 ޙައްޖުވެރިން ހިމެނެއެވެ. އަދި ތިންވަނަ ގްރޫޕް 271 ޙައްޖުވެރިންނާއެކު ރާއްޖެ އައިސްފައިވަނީ މިދިޔަ ހޯމަ ދުވަހުގެ ރޭގެ ވަގުތެއްގައެވެ.

މިއަހަރު ރާއްޖެއަށް ލިބުނު 1,000 ޙައްޖު ކޯޓާގެ ދަށުން، ޖުމްލަ 1,019 މީހުން ޙައްޖުގެ މަތިވެރި އަޅުކަން އަދާކޮށްފައިވެއެވެ. މި ހުރިހާ ޙައްޖުވެރިންވެސް ސައުދީ އަރަބިއްޔާއަށް ގޮސްފައިވަނީ ސަރުކާރުގެ ޙައްޖު ކުންފުނި، މޯލްޑިވްސް ޙައްޖު ކޯޕަރޭޝަންގެ ބެލުމުގެ ދަށުންނެވެ. މިއީ ރާއްޖޭގެ ހުރިހާ ޙައްޖުވެރިން އެއް ކުންފުންޏެއްގެ ބެލުމުގެ ދަށުން ޙައްޖަށް ދިޔަ ފުރަތަމަ ފަހަރުކަން ފާހަގަކޮށްލެވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، މިއަހަރުގެ ޙައްޖުގެ ކަންކަން ވީހާވެސް އޮމާންކޮށް ގެންދިއުމަށް ސަރުކާރުން ވަނީ ގިނަ މަސައްކަތްތަކެއް ކޮށްފައެވެ. އެގޮތުން ޙައްޖުވެރިން އެނބުރި އައުމުން އެއާޕޯޓުން އެމީހުންގެ މުދާ އުފުލުމާއި، ގޭގެއަށް ދިއުމަށް ބޭނުންވާ އެހީތެރިކަން ފޯރުކޮށްދިނުމުގައި ދައުލަތުގެ ކަމާބެހޭ މުއައްސަސާތަކުން ވަނީ ހަރަކާތްތެރިވެފައެވެ.