މެދުއިރުމަތީގެ މަސްރަޙު ގޯސްވުމާ ގުޅިގެން، ރައްކާތެރިކަމުގެ ފިޔަވަޅެއްގެ ގޮތުން 29 އޮކްޓޫބަރު 2026 ވާ ބުރާސްފަތި ދުވަހު މާލެއިން ސަޢޫދީ ޢަރަބިއްޔާގެ ޖިއްދާއަށް ކުރުމަށް ހަމަޖެހިފައިވާ ޢުމްރާ ދަތުރު ފަހުގެ ތާރީޚަކަށް ފަސްކޮށްފިއެވެ. މި ދަތުރަކީ ޤައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަން ސަރވިސަސް ލިމިޓެޑާއި މޯލްޑިވްސް ޙައްޖު ކޯޕަރޭޝަން ގުޅިގެން ކުރިއަށްގެންދަން ރޭވި ދަތުރެކެވެ.

އައިލެންޑް އޭވިއޭޝަނުން މަޢުލޫމާތު ދެއްވި ގޮތުގައި، މިހާރު މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން، ސަޢޫދީ ޢަރަބިއްޔާ ހިމެނޭ ސަރަޙައްދުގެ ސަލާމަތީ ކަންކަން އެ އެއާލައިނުން ދަނީ ވަރަށް ގާތުން މޮނިޓަރ ކުރަމުންނެވެ. އަދި ފާއިތުވި 24 ގަޑިއިރުގެ ތެރޭގައި އެ ސަރަޙައްދުގެ މަސްރަޙު ވަރަށް ބޮޑަށް ގޯސްވެފައިވާކަން ވަނީ ފާހަގަކުރެވިފައެވެ. އެ ކުންފުނީގެ އެސެސްމަންޓްތަކުން ދައްކާ ގޮތުގައި، މިވަގުތު އޮތް ނުރައްކަލުގެ މިންވަރަކީ ފަސިންޖަރުންގެ ސަލާމަތާއި ރައްކާތެރިކަމަށް ބުރޫއަރާފާނެ ފަދަ ނުރައްކާތެރި ޙާލަތެކެވެ.

މެދުއިރުމަތީގެ މަސްރަޙު ނުތަނަވަސްވަމުން ދިއުމާ ގުޅިގެން، ދުނިޔޭގެ ބައެއް އެހެން އެއަރލައިންތަކުން ވެސް މިހާރު ވަނީ ސަޢޫދީ ޢަރަބިއްޔާއަށް ކުރާ ދަތުރުތައް މެދުކަނޑާލާފައެވެ. މީގެ އިތުރުން، ބައިނަލްއަޤްވާމީ ވައިގެދަތުރުތަކާ ބެހޭ އިދާރާތަކުން ނެރެފައިވާ ބަޔާންތަކަށް ބަލާއިރު، ޖިއްދާގެ ވައިގެ ސަރަޙައްދު ބޭނުންކުރުމުގައި ވެސް ބޮޑެތި ހުރަސްތަކެއް ވަނީ ކުރިމަތިވެފައެވެ.

އައިލެންޑް އޭވިއޭޝަނާއި ޙައްޖު ކޯޕަރޭޝަނުން ހާމަކުރި ގޮތުގައި، މި ދަތުރު ފަސްކުރުމުގެ ސަބަބުން ޢުމްރާވެރިންނަށް ދިމާވެދާނެ ދަތިތަކަށްޓަކައި ދެ މުއައްސަސާގެ ފަރާތުން ނިހާޔަތަށް މަޢާފަށް އެދެއެވެ. އަދި ކޮންމެ ދަނޑިވަޅެއްގައި ވެސް އެންމެ ބޮޑު އިސްކަމެއް ދެނީ ފަސިންޖަރުންގެ ސަލާމަތާއި ރައްކާތެރިކަން ކަށަވަރުކުރުމަށް ކަމަށް އެ ފަރާތްތަކުން ބުނެފައިވެއެވެ.

މި ދަތުރުގައި ބައިވެރިވާ އެންމެހައި ފަސިންޖަރުންނަށް ބޭނުންވާ އެހީތެރިކަން ދެ މުއައްސަސާ ގުޅިގެން ފޯރުކޮށްދެމުންދާނެ ކަމަށާއި، މަސްރަޙު ހަމައަކަށް އެޅި، ވައިގެ ދަތުރުފަތުރުގެ ރައްކާތެރިކަން ކަށަވަރުވުމުން މި ދަތުރު ކުރާނެ އައު ތާރީޚެއް ފަސިންޖަރުންނަށް ވަރަށް އަވަހަށް އަންގާނެ ކަމަށް ވެސް އެ ފަރާތުން މަޢުލޫމާތު ދެއެވެ.