ބޮލީވުޑްގައި މިހާތަނަށް އުފެއްދި އެންމެ ކާމިޔާބު އެއް ފިލްމު ކަމަށްވާ '3 އީޑިއަޓްސް' ގެ ދެވަނަ ބައެއް އުފެއްދުމުގެ މަސައްކަތް ފަށާފައިވާކަން އާމިރު ޚާން ކަށަވަރުކޮށްދީފިއެވެ. މި ފިލްމާ ގުޅޭގޮތުން ފަހުގެ ރިޕޯޓްތައް ބުނާގޮތުގައި، މިފަހަރުގެ ފިލްމުގައި ހަތަރުވަނަ "އީޑިއަޓް" އެއްގެ ރޯލުން ފެނިގެންދާނީ މަޝްހޫރު އެކްޓަރު ވިކީ ކޯޝަލްއެވެ.

ޕިންކްވިލާ އިން ރިޕޯޓްކޮށްފައިވާ ގޮތުގައި، '3 އީޑިއަޓްސް 2' ގެ ވާހަކަ ބިނާވެފައިވަނީ ފުރަތަމަ ފިލްމުގެ ވާހަކަ ނިމުނުތާ 10 އަހަރު ފަހުގެ ހާދިސާތަކެއްގެ މައްޗަށެވެ. މި ފިލްމުގައި ހަތަރުވަނަ މުހިންމު ކެރެކްޓާއެއްގެ ގޮތުގައި ވިކީ ކޯޝަލް ހިމެނުމަށް ފިލްމުގެ ޑައިރެކްޓަރު ރާޖްކުމާރު ހިރާނީ އާއި އާމިރު ޚާން ވަނީ ވިކީއާއެކު ބައްދަލުވުންތަކެއް ބާއްވާފައެވެ. މި ރޯލު ކުޅުމަށް ވިކީ މިހާރު ދަނީ ތައްޔާރުވަމުންނެވެ.

އަމަރު އުޖާލާއަށް ދިން އިންޓަވިއުއެއްގައި އާމިރު ޚާން ބުނީ، ރާޖްކުމާރު ހިރާނީ މިހާރު ފިލްމުގެ ސްކްރިޕްޓްގެ މަސައްކަތް ކުރަމުންދާ ކަމަށާއި، ފިލްމުގެ ވާހަކަ އޭނާއަށް ވަރަށް ކަމުގޮސްފައިވާ ކަމަށެވެ. "މީގެ ވާހަކަ ވަރަށް ފުރިހަމަ. ފުރަތަމަ ފިލްމެކޭ އެއްގޮތަށް މަޖާ ކަންތައްތަކެއް މި ފިލްމުންވެސް ފެންނާނެ. އަލުން ފުންސުކް ވަންގްޑޫގެ ރޯލު ކުޅެން އަހަރެން ހުރީ ވަރަށް ކެތްމަދުވެފައި،" އާމިރު ބުންޏެވެ.

މި ފިލްމުގެ މަސައްކަތް ވިކީ ފަށާނީ އޭނާ މިހާރު ސޮއިކޮށްފައިވާ 'މަހާވަތާރު' ގެ މަސައްކަތް ނިންމުމަށްފަހުގައެވެ. ވިކީ ކޯޝަލް ވަނީ އެންމެ ފަހުން ފެނިގެންދިޔަ 'ޗާވާ' އިން ބޮޑު ކާމިޔާބީއެއް ހޯދާފައެވެ. އަދި މިހާރު އޭނާ ދަނީ ސަންޖޭ ލީލާ ބަންސާލީގެ 'ލަވް އެންޑް ވާ' ގެ މަސައްކަތް ކުރަމުންނެވެ.

'3 އީޑިއަޓްސް' ގެ ސީކުއަލްގައިވެސް އާމިރު ޚާންގެ އިތުރުން ޝަރުމަން ޖޯޝީ އަދި އާރް މާދަވަން ފެނިގެންދާނެ ކަމަށް ބެލެވެއެވެ. މި ފިލްމަކީ ބޮލީވުޑްގައި އެންމެ ގިނަ ބަޔަކު އިންތިޒާރުކުރާ އެއް ފިލްމަށް ވެގެންދާނެއެވެ.