މާލޭގެ އުތުރު ފަރާތު ބޮޑުތަކުރުފާނުމަގު ޒަމާނީ ފެންވަރަށް ތަރައްޤީކުރުމުގެ ބިޔަ މަޝްރޫޢުގެ ދަށުން، އިއްޒުއްދީން ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮތް ސަރަޙައްދު މިއަދުން ފެށިގެން އާންމު ދަތުރުފަތުރަށް ބަންދުކޮށް، މަގު ހެދުމުގެ ޢަމަލީ މަސައްކަތް ރަސްމީކޮށް ފަށައިފިއެވެ.

ދިވެހި ފުލުހުންގެ ޚިދުމަތުން ބުނީ މި މަސައްކަތަށް މަގުފަހިކުރުމުގެ ގޮތުން ރޭ މެންދަމު 12:00 އިން ފެށިގެން އެ ސަރަޙައްދުގެ ޓްރެފިކް ފްލޯއަށް ބަދަލުތަކެއް ގެނެސްފައިވާ ކަމަށެވެ. އަދި މަސައްކަތް ކުރިއަށްދާ ސަރަޙައްދުގައި ޕާކުކޮށްފައިވާ އުޅަނދުތައް ނެގުމަށް ފުލުހުން މީގެ ކުރިން ވަނީ އަންގާފައެވެ.

ބޮޑުތަކުރުފާނުމަގު ތަރައްޤީކުރުމުގެ ފޭސް 1 ގެ ދަށުން ކުރިއަށްދާ މި މަޝްރޫޢާ ގުޅޭގޮތުން އެމްޓީސީސީން ބުނެފައިވަނީ، މި ސެގްމަންޓްގެ ތެރޭގައި ހިމެނޭ ގާތްގަނޑަކަށް 700 މީޓަރުގެ ސަރަޙައްދެއްގައި ތާރު އަޅައިގެން ޒަމާނީ ފެންވަރަށް ތަރައްޤީކުރެވޭނެ ކަމަށެވެ. މީގެ އިތުރުން 610 މީޓަރުގެ އެއްގަމު ތޮށި ތަރައްޤީކުރުމާއި، މަގު ފުޅާކުރުމާއި، ފެން ހިންދާ ނިޒާމު ޤާއިމްކުރުމުގެ އިތުރުން، ޕޭމަންޓު ހަދައި މަގުބައްތި ޖެހުމުގެ މަސައްކަތް ވެސް މި މަޝްރޫޢުގެ ތެރޭގައި ހިމެނިގެން ކުރިއަށްދާނެއެވެ.

މަގު ހެދުމުގެ މަސައްކަތް ކުރިއަށްދާ މުއްދަތުގައި، ހެންވޭރު ފެރީ ޓާމިނަލުން ދެމުންދިޔަ އަތޮޅު ފެރީގެ ޚިދުމަތްތަކަށް ވެސް ވަނީ ބަދަލުތަކެއް ގެނެސްފައެވެ. އެގޮތުން މިއަދުން ފެށިގެން އެ ފެރީތައް ބޭނުންކުރާނީ މާފަންނު ފެރީ ޓާމިނަލާއި ހުޅުމާލެ ފެރީ ޓާމިނަލް ކަމަށް އެމްޓީސީސީން މަޢުލޫމާތު ދެއެވެ. ނަމަވެސް، މި މަސައްކަތުގެ ސަބަބުން މަސްވެރިންގެ ޕާކު ހިމެނޭ ސަރަޙައްދުގެ އިންތިޒާމުތަކަށް އެއްވެސް ބަދަލެއް ނާންނާނެ ކަމުގެ ޔަޤީންކަން އެ ކުންފުނިން ވަނީ ދީފައެވެ.