އިރާނާއި އިޒްރޭލާ ދެމެދު ފެށުނު ނުރައްކާތެރި ހަނގުރާމައިގެ ތެރޭގައި ތާށިވެ، ފުރާނައަށް ނުރައްކާވި ދަނޑިވަޅުގައި ޔޫއޭއީގައި ހުންނަ ރާއްޖޭގެ އެމްބަސީން އެއްވެސް އެހީތެރިކަމެއް ފޯރުކޮށްދީފައި ނުވާ ކަމަށް ވިދާޅުވެ، ފްލައި ދުބާއީގެ ދިވެހި ކެޕްޓަން އަހުމަދު ޖިނާން ޝަރީފް ޔޫއެއީ ސަފީރު މުހައްމަދު ހުސައިން ޝަރީފް (މުންދު) އަށް ވަރަށް ބޮޑަށް ފާޑުވިދާޅުވެއްޖެއެވެ.

މި ހާދިސާ ހިނގަން މެދުވެރިވީ މިދިޔަ ފެބްރުއަރީ 28 ވަނަ ދުވަހު ދުބާއީ އެއާޕޯޓުން ނައްޓާލި ފްލައި ދުބާއީގެ ފްލައިޓު އިރާނުގެ އިސްފަހާނަށް ލޭންޑުކުރި ވަގުތާ ދިމާކޮށް އެމެރިކާ އާއި އިޒްރޭލުން އިރާނަށް ބޮން އަޅަން ފެށުމުންނެވެ. ހަނގުރާމަ ފެށުމާއެކު މެދުއިރުމަތީގެ ވައިގެ ސަރަހައްދު ބަންދުކޮށް، ދުބާއީއަށް ކުރަން އޮތް ދަތުރު ކެންސަލްވުމުން ކެޕްޓަން ޖިނާނާއި އޭނާގެ ފަޅުވެރިން ހަތަރު ދުވަސް ވަންދެން ތިބީ "ވޯ ޒޯން" އެއްގައި ތާށިވެފައެވެ.

ޖިނާން ވިދާޅުވީ، އިރާނުގެ މުއާސަލާތީ ހިދުމަތްތައް ކަނޑާލާފައި އޮތުމުން ދުބާއީގައި ތިބި އޭނާގެ އަނބިމީހާއަށާއި، ދެ ދަރިންނަށް އޭނާގެ ހާލެއް ނޭނގި ބިރުވެރިކަމެއްގެ ތެރޭގައި ތިބެންޖެހުނު ކަމަށެވެ. އަދި އެހީތެރިކަމަށް އެދި އާއިލާއިން އެމްބަސީއަށް ދިޔުމުން ލިބުނީ ވަރަށް ފަރުވާކުޑަ ޖަވާބުތަކެއް ކަމަށް އޭނާ ފާހަގަކުރެއްވިއެވެ.

"އެމްބަސީގެ ފަރާތުން އެއްވެސް މާނަހުރި އެހީތެރިކަމެއް ފޯރުކޮށްދެވިފައި ނުވޭ. އަޅުގަނޑުގެ އާއިލާއަށް ލިބުނު ހަމައެކަނި ޖަވާބަކީ ތިކަން ބަލަމުންދަނީ ކަމަށް. ދެ ދަރިންގެ ބައްޕަ ދުނިޔޭގައި ހުރިތޯ ބަލަން ރޮއެ އާދޭސްކުރި، އަނތްބަކަށް ސަރުކާރުގެ އިދާރާއަކުން މިފަދަ ފަރުވާ ކުޑަ ޖަވާބުތަކެއް ދިނުމަކީ ލަދުވެތި ކަމެއް." ޖިނާން ވިދާޅުވިއެވެ.

ޖިނާން ވިދާޅުވީ އެމްބަސީން ދިޔައީ ފްލައިޓު ޝެޑިއުލްތަކުގެ ސްކްރީންޝޮޓްތައް އާއިލާއަށް ފޮނުވަމުންނެވެ. އެއީ އޭވިއޭޝަން ދާއިރާގެ ކޮންމެ މީހަކަށް ވެސް ހޯދޭނެ މައުލޫމާތެއް ކަމަށާއި، އެމްބަސީން އޭނާއާ މެދުނުކެނޑި ގުޅަމުންދާ ކަމަށް ބުނެ ހަދާފައިވަނީ ކަނޑައެޅިގެން ބޮޑު ދޮގެއް ކަމަށް އޭނާ ތުހުމަތު ކުރެއްވިއެވެ. އޭނާ ވިދާޅުވީ ސަފީރާ ވާހަކަ ދެއްކުނީ ހަމައެކަނި ފެބްރުއަރީ 28 ގައި އޭނާ އަމިއްލައަށް ގުޅުމުން ކަމަށެވެ.

އިރާނުން ސަލާމަތްވެގެން މާޗު 3 ވަނަ ދުވަހު އަޒަރުބައިޖާނަށް އެއްގަމު މަގުން ވަދެވުނީ ފްލައި ދުބާއީ ކުންފުނީގެ އެހީތެރިކަމާއެކު ކަމަށާއި، އެނބުރި ދުބާއީއަށް އާދެވުނުއިރު ވެސް ސަފީރު މުންދުގެ އެއްވެސް މެސެޖެއް ނެތް ކަމަށް ޖިނާން ވިދާޅުވިއެވެ.

"އަޅުގަނޑުގެ ނަޒަރުގައި ރާއްޖޭގެ އެމްބަސީއަކީ އިތުބާރު ކުރެވޭ ފަދަ ތަނެއް ނޫން. މިއީ ރާއްޖޭން ބޭރުގައި އުޅޭ ކޮންމެ ދިވެއްސަކުވެސް ސަމާލުވާން ޖެހޭ ކަމެއް. މިފަދަ އެމްބަސީތައް ހިންގަން އެތައް މިލިއަން ޑޮލަރު ހޭދަކުރަނީ ހަމައެކަނި ލިޔެކިޔުންތަކުގައި ތައްގަނޑު ޖެހުމަށާއި ސަރުކާރުގެ އިސްވެރިންގެ ދަތުރުފަތުރުގެ ކަންކަން ހަމަޖެއްސުމަށްތޯ؟" ޖިނާން ސުވާލު އުފެއްދެވިއެވެ.

މިކަމާ ގުޅިގެން ސަފީރު މުންދު ވިދާޅުވީ ޖިނާންގެ ބަޔާނުގައި ހުރި ވާހަކަތަކަކީ އޭނާ އެ ހާދިސާ އާ މެދު ދެކޭ ގޮތް ކަމަށާއި، އެމްބަސީގެ މުވައްޒަފުންނާ މެދު ޖިނާންގެ ނުބައި ތަސައްވުރެއް އުފެދިފައިވާ ކަމަށެވެ. ނަމަވެސް، ދުބާއީއަށް އެނބުރި އައިތާ ތިން ދުވަސް ވީއިރުވެސް ސަފީރުގެ ފަރާތުން އެއްވެސް މުއާމަލާތެއް ނެތް ކަމަށް ޖިނާން ތަކުރާރުކޮށް ވިދާޅުވެފައިވެއެވެ.

އޭގެއިތުރުން ކެޕްޓަން ޖިނާން ވިދާޅުވީ، އަމިއްލަ ގައުމުގެ ސަރުކާރަށްވުރެ ޔޫއޭއީ ސަރުކާރާއި އޭނާ މަސައްކަތްކުރާ ކުންފުނިން ދިން އަޅާލުން މާ ފުރިހަމަ ކަމަށެވެ. މިއީ އޭނާ މާލެއަށް ދާން ބޭނުންނުވާ އެއް ސަބަބު ކަމުގައިވެސް ޖިނާން ފާހަގަކުރެއްވިއެވެ.