މިހާރު އީރާނާއި އެމެރިކާ އަދި އިސްރާއީލާ ދެމެދު ހިނގަމުންދާ ވަރުގަދަ ހަމަލާބަދަލުކުރުންތަކާ ގުޅިގެން، އީރާނުގެ ރިވޮލިއުޝަނަރީ ގާޑްސް (އައިއާރްޖީސީ) އިން ބަހުގެ ވަރުގަދަ ހަމަލާތަކެއް ދުޝްމަނުންނަށް އަމާޒުކޮށްފިއެވެ.

އީރާނުގެ އަސްކަރީ ކޮމާންޑަރަކު ވިދާޅުވި ގޮތުގައި، އެ ގައުމުގެ އެކި ސަރަހައްދުތަކުގައި މިސައިލް އުދުއްވާލުމަށް ބޭނުންކުރާ 25،000 ޕްލެޓްފޯމް މިހާރުވެސް ތައްޔާރީ ހާލަތުގައި އެބަހުއްޓެވެ. އަދި މިހާތަނަށް ކުރިއަށްދިޔަ ހަމަލާތަކުގައި ބޭނުންކޮށްފައިވަނީ މީގެ ތެރެއިން އެންމެ 10 އިންސައްތަ ޕްލެޓްފޯމް ކަމަށްވެސް އޭނާ ފާހަގަކުރެއްވިއެވެ.

އީރާނުގެ އަސްކަރީ ގާބިލުކަމާ ބެހޭގޮތުން އިތުރަށް ވާހަކަދައްކަވަމުން ކޮމާންޑަރު ވިދާޅުވީ، މި ޕްލެޓްފޯމްތަކުގެ ބޮޑުބަޔަކީ އެއްތަނުން އަނެއްތަނަށް ފަސޭހައިން އުފުލޭ "މޮބައިލް" ޕްލެޓްފޯމްތަކެއް ކަމަށެވެ. މީގެ އިތުރުން، ސަރަހައްދީ ގޮތުން އީރާނާ ބައިވެރިވާ އެކުވެރި ޖަމާއަތްތަކުގެ އަތުގައި ވެސް 50،000 ބެލިސްޓިކް މިސައިލް ހުރިކަން އޭނާ ހާމަކުރެއްވިއެވެ. މިއީ ދުޝްމަނުންނަށް ދެވޭ ވަރުގަދަ އިންޒާރެއްގެ ގޮތުގައި ބެލެވެއެވެ.

މި ހަމަލާބަދަލުކުރުންތައް ދިގުދެމިގެން ހިނގައިދާނެ ކަމުގެ އިޝާރާތެއް ދެއްވަމުން، އީރާނުގެ ކޮމާންޑަރު ވިދާޅުވީ "އަހަރެމެން މިތިބީ އެތައް އަހަރަކަށް ދެމިގެންދާ ފަދަ ވަރުގަދަ ހަނގުރާމައަކަށް ފުރިހަމައަށް ތައްޔާރުވެގެން" ކަމަށެވެ. މި ބަޔާނާއެކު މުޅި މެދުއިރުމަތީގެ މަސްރަހު އިތުރަށް ނުތަނަވަސްވެ، ބައިނަލްއަގުވާމީ މުޖުތަމައުގެ ކަންބޮޑުވުން ވަނީ އިތުރުވެފައެވެ.