އެއް މަސް ދުވަހަށްވުރެ ގިނަ ދުވަހު ދުވާލަކު އެތައް ހާސް މިސައިލެއް ފޮނުވާލުމުގެ ގާބިލުކަން އީރާނަށް ލިބިފައިވާ ކަމަށް ރިޕޯޓްތައް ބުނާއިރު އީރާނުގެ އަސްކަރީ ގާބިލުކަމާ ބެހޭގޮތުން ދިރާސާކުރާ ފަރާތްތަކުން ހާމަކުރާ ގޮތުގައި، އެ ގައުމަކީ މެދުއިރުމަތީގައި އެންމެ ވަރުގަދަ އަދި އެންމެ ގިނަ މިސައިލް ރައްކާކޮށްފައިވާ ގައުމެވެ.

އީރާނުގެ މިސައިލް އާސެނަލްގައި އެކި ރޭންޖުތަކުގެ ބެލިސްޓިކް މިސައިލާއި ކުރޫޒް މިސައިލް ހިމެނޭއިރު، ހަނގުރާމައެއްގެ ހާލަތުގައި މެދުނުކެނޑި އެއް މަސް ދުވަހަށްވުރެ ގިނަ ދުވަހު، ކޮންމެ ދުވަހަކު އެތައް ހާސް މިސައިލެއް ދުޝްމަނުންގެ އަމާޒުތަކަށް ފޮނުވާލުމުގެ ފަންނީ އަދި އޮޕަރޭޝަނަލް ގާބިލުކަން އެ ގައުމަށް ލިބިގެންވާ ކަމަށް އަސްކަރީ މާހިރުން ގަބޫލުކުރެއެވެ.

މި ގާބިލުކަން ބިނާވެފައިވަނީ އީރާނުގެ އެކި ސަރަހައްދުތަކުގައި ބިމުގެ އަޑީގައި ބިނާކޮށްފައިވާ "މިސައިލް ސިޓީތަކުގެ" މައްޗަށެވެ. މި ސިޓީތަކަކީ ހަމަލާތަކުން ރައްކާތެރިވެ ތިބެ، ގިނަ އަދަދެއްގެ މިސައިލް އެއްފަހަރާ ފޮނުވާލެވޭނެ ފަދަ ޒަމާނީ ވަސީލަތްތައް ގާއިމުކޮށްފައިވާ ތަންތަނެވެ.

އީރާނުން ދާދި ފަހުން ކުރިއަށްގެންދިޔަ އަސްކަރީ ތަމްރީނުތަކުގައި ވެސް ވަނީ ކުރު މުއްދަތެއްގެ ތެރޭގައި ގިނަ އަދަދެއްގެ މިސައިލް އަމާޒުތަކަށް ފޮނުވާލާފައެވެ. މީގެ އިތުރުން، އަމިއްލަ ގައުމުގައި މިސައިލް އުފެއްދުމުގެ ސިނާއަތް ކުރިއަރާފައި އޮތުމަކީ ހަނގުރާމައިގެ ދިގު މުއްދަތެއްގައި ހަތިޔާރު ހުސްނުވެ ހިފެހެއްޓުމަށް އީރާނަށް ލިބޭ ބޮޑު ބާރެކެވެ.

އެމެރިކާ އާއި އިސްރާއީލުގެ އިންޓެލިޖެންސް ރިޕޯޓްތަކުން ދައްކާ ގޮތުގައި އީރާނުން ދަނީ އެ ގައުމުގެ މިސައިލްތަކުގެ ޞައްޙަކަން އިތުރުކޮށް، ދިފާއީ ނިޒާމުތަކަށް އޮޅުވާލެވޭނެ ފަދަ ޓެކްނޮލޮޖީތައް ތައާރަފުކުރަމުންނެވެ. މިފަދަ ބޮޑު މިސައިލް ފައުޖެއް އޮތުމަކީ ސަރަހައްދީ ހަމަޖެހުމަށް އޮތް ބިރެއްގެ ގޮތުގައި ބައެއް ގައުމުތަކުން ސިފަކުރާއިރު، އީރާނުން ބުނަމުންދަނީ މިއީ ހަމައެކަނި ދިފާއީ ބޭނުމަށްޓަކައި އަދި ބޭރުގެ ހަމަލާތަކުން ގައުމު ސަލާމަތްކުރުމަށް ބޭނުންކުރާނެ ވަސީލަތްތަކެއް ކަމަށެވެ.