އިރާނުގެ އަސްކަރީ ގާބިލިއްޔަތު ހުރި މިންވަރު ދައްކުވައިދޭ ތަފާސްހިސާބުތަކުން ހާމަވާ ގޮތުގައި، އެ ގައުމުގެ ބެލިސްޓިކް މިސައިލްތަކުން މުޅި މެދުއިރުމައްޗާއި، އިޒްރޭލުގެ އިތުރުން ޔޫރަޕްގެ ބައެއް ސަރަހައްދުތަކަށް ހަމަލާދިނުމުގެ ގާބިލިއްޔަތު އެބަހުއްޓެވެ.

އޭއެފްޕީގެ ތަފާސްހިސާބުތަކާ ހަވާލާދީ ޓީއާރުޓީ ވޯލްޑުން އާންމުކޮށްފައިވާ މެޕުން ފެންނަ ގޮތުގައި، އިރާނުގެ މިސައިލް އާސެނަލްގައި އެކި ދުރުމިންތަކަށް ދަތުރުކުރާ ބާރުގަދަ މިސައިލްތައް އެބަހުއްޓެވެ.

މި މެޕުގައިވާ ގޮތުން އިރާނުން އުފައްދާފައިވާ 'ޚައްރަމްޝަހަރު' އަދި 'ސައްޖީލް' މިސައިލްތަކަކީ އެންމެ ދުރަށް ދަތުރުކުރުގެ ގާބިލިއްޔަތު ލިބިފައިވާ އުޅަނދުތަކެވެ. މި މިސައިލްތަކަށް 2،000 ކިލޯމީޓަރުގެ ދުރުމިނަށް ހަމަލާދިނުމުގެ ބާރު ލިބިފައިވާއިރު، މިއީ މުޅި މެދުއިރުމަތީގެ ބޮޑު ބަޔަކާއި އިޒްރޭލުގެ ހުރިހާ ސަރަހައްދެއް ކަވަރުކުރާ ރޭންޖެކެވެ.

މީގެ އިތުރުން 'އިމާދު' އަދި 'ޣަދަރު-1' މިސައިލްތަކަށް 1،700 ކިލޯމީޓަރުގެ ދުރުމިނަށް ދަތުރުކުރެވޭއިރު، މިއީވެސް ސަރަހައްދީ ސަލާމަތަށް އޮތް ބޮޑު ގޮންޖެހުމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.

އިރާނުގެ މިސައިލް ޓެކްނޮލޮޖީގެ ކުރިއެރުންތަކަށް ބަލާއިރު، 'ފައްތާހު-1، 'ހާޖް ގާސިމް' އަދި 'ޚައިބަރު ޝެކަން' ފަދަ މިސައިލްތަކަށް 1،400 ކިލޯމީޓަރުގެ ރޭންޖެއް ލިބިފައިވެއެވެ. އަދި 1،000 ކިލޯމީޓަރުގެ ރޭންޖެއް ހުންނަ 'ދިޒްފުލް' މިސައިލަކީވެސް ކައިރި ގައުމުތަކަށް ހަމަލާދިނުމަށް ބޭނުންކުރެވޭނެ ނުރައްކާތެރި ހަތިޔާރެކެވެ. މި ހުރިހާ މިސައިލްތަކެއްގެ ރޭންޖު ހުރި ގޮތުން، ތުރުކީ، ސައުދީ އަރަބިއްޔާ، މިސްރު އަދި އިރުމަތީ ޔޫރަޕްގެ ބައެއް ގައުމުތައްވެސް ވަނީ އިރާނުގެ މިސައިލްތަކުގެ ނިވާފަތްގަނޑުގެ ދަށުގައެވެ.