އީރާނުން އާދަޔާ ހިލާފު ބާރުގަދަ އަދި ރޭޑާރުތަކަށް ފިލައިގެން ދަތުރުކުރުމުގެ ގާބިލުކަން ލިބިގެންވާ "އިންވިޒިބަލް" މިސައިލްތަކެއް އުފައްދާފައިވާ ކަމަށާއި، ނަމަވެސް އެ މިސައިލްތައް އަދި ހަނގުރާމައިގެ މައިދާނުގައި ބޭނުންކުރަން ފަށާފައި ނުވާ ކަމަށް އެ ގައުމުން ހާމަކޮށްފިއެވެ.

އީރާނުގެ އަސްކަރީ މަސްދަރުތަކާ ހަވާލާދީ ރިޕޯޓްތައް ބުނާ ގޮތުގައި، މި މިސައިލްތަކަކީ ދުނިޔޭގެ އެއްވެސް އެއާ ޑިފެންސް ސިސްޓަމަކަށް ދެނެގަނެވޭނެ ނުވަތަ ހުއްޓުވޭނެ ފަދަ އުޅަނދުތަކެއް ނޫނެވެ. މި ޓެކްނޮލޮޖީގެ ސަބަބުން ދުޝްމަނުންގެ ރޭޑާރުތަކަށް ނުފެނި އަމާޒަށް ވާސިލުވުމުގެ ފުރުސަތު ބޮޑުވެ، ސަރަހައްދީ މަސްރަހުގައި އީރާނުގެ އަސްކަރީ ބާރު އިތުރަށް ވަރުގަދަވެގެންދާނެ ކަމަށް ބެލެވެއެވެ.

މިދިޔަ ދުވަސްތަކުގައި އީރާނުން ވަނީ "ފައްތާހު-2" ފަދަ ހައިޕަރސޮނިކް މިސައިލްތައް ތައާރަފުކޮށް، ބައެއް ހަމަލާތަކުގައި ބޭނުންކޮށްފައިވާ ކަމަށް ރިޕޯޓްތައް ބުނެއެވެ. ނަމަވެސް، މިހާރު ދެކެވެމުންދާ "ފެންނަން ނެތް" މިސައިލްތަކަކީ އެއަށްވުރެ މާ ކުރިއަރާފައިވާ ޓެކްނޮލޮޖީއެއް ކަމަށާއި، މިއީ ހަނގުރާމައިގެ އޮއިވަރު ބަދަލުކޮށްލާނެ ފަދަ ހަތިޔާރެއްގެ ގޮތުގައި އީރާނުން ސިފަކުރެއެވެ. މިފަދަ މިސައިލްތައް ބޭނުންކުރަން ފަށައިފިނަމަ، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކާއި އިޒްރޭލުގެ ދިފާއީ ނިޒާމުތަކަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް މަޝްރަހު ދިރާސާކުރާ ފަރާތްތަކުން ލަފާކުރެއެވެ.

އީރާނުން މިފަދަ އިންޒާރެއް ދީފައި މިވަނީ، އެމެރިކާއާއި އިޒްރޭލުން އީރާނުގެ އަސްކަރީ އަމާޒުތަކަށް ދެމުންދާ ހަމަލާތަކާ ގުޅިގެން މަސްރަހު ނުހަނު ބޮޑަށް ހޫނުވެފައިވާ ދަނޑިވަޅެއްގައެވެ.

އީރާނުގެ މި އާ ހަތިޔާރުގެ ގާބިލުކަމާ މެދު ބައެއް ފަރާތްތަކުން ސުވާލު އުފެއްދި ނަމަވެސް، އެ ގައުމުގެ މިސައިލް ޕްރޮގްރާމަކީ ހަލުވިކަމާއެކު ކުރިއަރަމުންދާ ނިޒާމެއް ކަމަށް ބައިނަލްއަގުވާމީ މާހިރުން އެއްބަސްވެއެވެ. މި މިސައިލްތައް ބޭނުންކުރުމުގެ ހުއްދަ އަދި ދީފައި ނުވަނީ، މަސްރަހު އިތުރަށް ގޯސްވިޔަ ނުދިނުމަށް ކަމަށް ބެލެވުނު ނަމަވެސް، ބޭނުން ޖެހިއްޖެ ހާލަތެއްގައި "ވަރުގަދަ ރައްދެއް" ދޭނެ ކަމުގެ އިންޒާރު އީރާނުން ވަނީ ދީފައެވެ.