އިޒްރާއީލުގެ ޒަޔަނިސްޓް ދައުލަތުން އިރާނަށް ދިން ހަމަލާތަކުގެ ރައްދުގައި، އިރާނުން ދިން ހަމަލާތަކާ ގުޅިގެން ބައެއް އިސްލާމީ ގައުމުތަކުން ނުރުހުން ފާޅުކުރުމަކީ ބަލައިގަނެވޭނެ ކަމެއް ނޫން ކަމަށް އިރާނުގެ ޚާރިޖީ ވުޒާރާއިން ބުނެފިއެވެ.

އިރާނުން ނެރުނު ބަޔާނެއްގައި ބުނެފައިވަނީ، އިރާނުގެ އަމަލުތަކަކީ އިސްލާމީ އުސޫލުތަކާއި މާތް اللهްގެ އަމުރުފުޅާ އެއްގޮތަށް، އަމިއްލަ ނަފްސާއި ގައުމު ދިފާއުކުރުމަށް އެޅި ފިޔަވަޅެއް ކަމަށެވެ. އަދި ހަނގުރާމަ އިސްނުކުރުމަށް އަންގަވާފައިވީ ނަމަވެސް، ހަމަލާދޭ ބަޔަކަށް ރައްދު ދިނުމަކީ ލާޒިމްކަމެއް ކަމަށާއި، މި ހަމަލާތަކުގައި އިސްލާމީ ގައުމުތަކުން ކުށްވެރިކުރަންޖެހޭނީ ހަނގުރާމަ ފެށި ފަރާތް ކަމަށްވާ އިޒްރާއީލު ކަމަށްވެސް އެ ބަޔާނުގައިވެއެވެ.

އިރާނުގެ ޚާރިޖީ ވުޒާރާއިން އިތުރަށް ބަޔާންކޮށްފައިވަނީ، އެ ގައުމުގެ ހަނގުރާމައަކީ ޒަޔަނިސްޓުންގެ މުދަލާއި ވަސީލަތްތައް ހަލާކުކޮށްލުން ކަމަށެވެ. އަދި އިޒްރާއީލަށް ވާގިވެރިވާ ކޮންމެ ބަޔަކާއި، އެމީހުންގެ އަސްކަރީ މަރުކަޒުތައް ގާއިމުކޮށްފައިވާ ކޮންމެ ގައުމަކަށް ހަމަލާދޭނެ ކަމުގެ އިންޒާރު އިރާނުން ވަނީ ތަކުރާރުކޮށްފައެވެ.

اللهް އަށް އީމާންވާ އެއްވެސް ބަޔަކު ޔަހޫދީންނަށް ތަބާވެ، އެމީހުންނަށް ތައުޒިޔާ ކިޔައި ވާގިވެރިނުވާނެ ކަމަށްވެސް އެ ގައުމުން ބުނެއެވެ. މި ހަނގުރާމައިގައި ނަސްރު ލިބުން އޮތީ މީސްތަކުންގެ އަދަދު ގިނަވެގެން ނޫންކަން ފާހަގަކުރަމުން، ބަދުރު ހަނގުރާމަ ހިނގި ރަމަޟާން މަހުގެ 17 ވަނަ ދުވަހުގެ ހަނދާންތައް މުސްލިމުންނަށާއި ޔަހޫދީންނަށް އިރާނުން ވަނީ އައުކޮށްދީފައެވެ.

މީގެ އިތުރުން، މެދުއިރުމަތީގެ ސަރަހައްދީ ހަމަޖެހުމާ ގުޅޭގޮތުން އިރާނުން ބުނެފައިވަނީ، އަވަށްޓެރި އަދި އެކުވެރި ގައުމުތަކަށް ސަލާމަތްތެރިކަން އޮތީ އެމެރިކާގެ އަސްކަރީ ފައުޖުތަކާއި އެމީހުންގެ މަރުކަޒުތައް މި ސަރަހައްދުން ބޭރުކޮށްގެން ކަމަށެވެ. އިރާނުގެ ހަމަލާތަކުން ރައްކާތެރިވުމަށް އޮތް ހަމައެކަނި މަގަކީ ބޭރުގެ ނުފޫޒުތަކުން ސަރަހައްދު މިނިވަންކުރުން ކަމަށް ބުނެ، އެމެރިކާގެ އަސްކަރީ މަރުކަޒުތައް ހުރި ގައުމުތަކަށް އިރާނުން ވަނީ ހަރުކަށި މެސެޖެއް ދީފައެވެ.