ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު އަދި މަޝްހޫރު ވިޔަފާވެރިޔާ އަބްދުﷲ ޖާބިރު މީގެ 15 އަހަރު ކުރިން ބައްލަވައިގަތް މ. އަތަމާ ޕްލާޒާގެ މިލްކުވެރިކަމާ މެދު އުފެދިފައިވާ ދިގުލީ ގާނޫނީ މައްސަލަ އޭނާ ކާމިޔާބު ކުރައްވައިފިއެވެ.

ޖާބިރު މި އިމާރާތް 2010 ވަނަ އަހަރު ބައްލަވައިގަތީ 14 މިލިއަން ރުފިޔާއަށެވެ. މި އިމާރާތަކީ މަލީޝާ ހައްޖު ގްރޫޕުގެ އިސްވެރިޔާ އިސްމާއިލް އަބްދުއްލަތީފްގެ ނަމުގައި ރަޖިސްޓްރީކޮށްފައި އޮތް ތަނެކެވެ. ނަމަވެސް، ޖާބިރު އެ ތަން ބައްލަވައިގަތް ފަހުން، އިސްމާއިލް އަބްދުއްލަތީފްގެ މައްޗަށް ސިވިލް ކޯޓުން ސާބިތުވެފައިވާ ދަރަންޏެއް ހަލާސްކުރުމަށްޓަކައި މި އިމާރާތް ވިއްކާލުމަށް ކޯޓުން އިއުލާނު ކުރިއެވެ.

މި މައްސަލައިގައި ޖާބިރުގެ މިލްކުވެރިކަމުގެ ހައްގު ދިފާއުކުރެއްވުމަށް މީގެ ކުރިން ކޯޓަށް ހުށަހެޅުއްވި ނަމަވެސް، އެކަށީގެންވާ ހެކި ނެތް ކަމަށް ބުނެ ކޯޓުން އެ ފަހަރު ވަނީ އެ މައްސަލަ ބޭރުކޮށްލާފައެވެ. އެއާއެކު، ޖާބިރު ވަނީ މިލްކުވެރިކަން ސާބިތުކުރުމަށާއި، އެހެން ފަރާތްތަކުން އެ އިމާރާތަށް ކުރާ ދައުވާތައް ހުއްޓުވުމަށް ވަކި ދައުވާއެއް ސިވިލް ކޯޓަށް ހުށަހަޅާފައެވެ. މީގެ އިތުރުން، މި މުއާމަލާތާ ގުޅިގެން މަކަރާއި ހީލަތް ހަދާފައިވާ ކަމަށް ބުނެ އިސްމާއިލް އަބްދުއްލަތީފްގެ މައްސަލަ ތަހުގީގު ކޮށްދިނުމަށް އެދި ޖާބިރު ވަނީ ފުލުހަށް ވެސް މައްސަލަ ހުށަހަޅާފައެވެ.

މި މައްސަލައިގައި ސިވިލް ކޯޓުން އިއްޔެ ކުރި ހުކުމުގައި ކަނޑައަޅާފައިވަނީ މ. އަތަމާ ޕްލާޒާ އަކީ އަބްދުﷲ ޖާބިރުގެ މިލްކެއް ކަމަށެވެ. އަދި ކުރިއަށް އޮތް ދެ މަސް ދުވަހުގެ ތެރޭގައި އެ އިމާރާތުގެ ރަޖިސްޓްރީ ޖާބިރުގެ ނަމަށް ބަދަލުކުރުމަށް ކުރަންޖެހޭ ހުރިހާ ގާނޫނީ އިޖުރާއާތްތަކެއް ފުރިހަމަކުރުމަށް އިސްމާއިލް އަބްދުއްލަތީފްގެ މައްޗަށް ކޯޓުން ވަނީ އަމުރުކޮށްފައެވެ.

މި ނިންމުމާއެކު، 15 އަހަރަށް ދެމިގެންދިޔަ މި ބޮޑު ގާނޫނީ އަރާރުން މިވަނީ ޖާބިރާ އެއްކޮޅަށް ނިމިފައެވެ.