ރޯދަ މަހަކީ ހަށިގަނޑަށް ބޭނުންވާ ހަކަތައާއި މުއްސަނދި ކާނާ ބޭނުންވާ މަހެކެވެ. ރޯދަވީއްލާ ގަޑީގައި ނުވަތަ ހާރުގަޑީގައި ބޯލަން މި ބަނާނާ، ޑޭޓް އެންޑް ނަޓް ސްމޫތީ އަކީ ވަރަށް ފައިދާހުރި، ހަށިގަނޑަށް ތާޒާކަން ގެނެސްދޭނެ މީރު ބުއިމެކެވެ. ކަދުރާއި ދޮންކޭލަކީ ގުދުރަތީ ހަކަތަ ގިނަ ދެ ބާވަތަށް ވުމުން، މިއީ ރޯދަވެރިންނަށް ވަރަށް އެކަށީގެންވާ ރެސިޕީއެކެވެ.

ބޭނުންވާ ތަކެތި:

- 2 މެދު ސައިޒުގެ ދޮންކެޔޮ (ދޮންވެފައި ހުރި)

- 5 ނުވަތަ 6 ކަދުރު (އޮށް ނެގުމަށްފަހު)

- 10 ކެޝޫ ނުވަތަ އާމަންޑް (ނުވަތަ ބޭނުންވާ ބަދަނެއް)

- 1 ޖޯޑު ފުލް ކްރީމް މިލްކް (ނުވަތަ އާމަންޑް މިލްކް)

- 1 ސައިސަމުސާ މާމުއި (ފޮނިކުރަން ބޭނުންނަމަ)

- ކުޑަ ގަނޑުފެން ކޮޅެއް

ތައްޔާރުނުރާނެ ގޮތް:

އެންމެ ފުރަތަމަ ކަދުރުގެ އޮށްތައް ނަގައި ސާފުކޮށްލާށެވެ. އަދި ކަދުރުތަކަކީ މާ ހަރު ކަދުރުތަކެއްނަމަ، ބްލެންޑް ކުރުމުގެ ކުރިން 10 މިނެޓު ވަރު ކިރު ފޮދެއްގެ ތެރޭގައި ފޯކުރަން ބަހައްޓާށެވެ.

ދޮންކެޔޮ ތޮށި ނޮޅާ ސާފުކޮށް ކުދިކޮށް ކޮށާލުމަށްފަހު، ބްލެންޑަރަށް ދޮންކެޔޮ، ކަދުރު، ބަދަން، ކިރު އަދި ގަނޑުފެން އަޅާށެވެ. އަދި ހުރިހާ އެއްޗެއް ރަނގަޅަށް އޮމާންވަންދެން އެއްކޮށްލާށެވެ. އަދި ސްމޫތީ އިތުރަށް ފޮނިކުރަން ބޭނުންވަނީނަމަ މާމުއި އަޅާފައި އެއްކޮށްލާށެވެ.

ތައްޔާރުވުމުން ތަށްޓަކަށް އަޅައި، އޭގެ މައްޗަށް ކުޑަ ބަދަންކޮޅެއް ނުވަތަ ކަދުރުކޮޅެއް ކޮށާލާފައި ބުރުވާލުމަށްފަހު ފިނިކޮށް ސާވްކުރާށެވެ.

މި ސްމޫތީއަކީ ފައިބަރާއި، ޕޮޓޭސިއަމް އަދި ޕްރޮޓީންއިން މުއްސަނދި ބުއިމަކަށް ވުމުން، މުޅި ދުވަހު ބަނޑުހައިކަން އިހުސާސްވިޔަނުދީ ހިފަހައްޓައިދިނުމަށާއި، ރޯދަވީއްލާ ގަޑީގައި ހަށިގަނޑަށް ބޭނުންވާ ހަކަތަ އަވަހަށް ފޯރުކޮށްދިނުމަށް އެހީތެރިވެދޭނެއެވެ.