މަޖިލީހުގެ ދެ މަސް ދުވަހުގެ ދިގު ޗުއްޓީއަށްފަހު، މިއަހަރުގެ ފުރަތަމަ ދައުރުގެ ޖަލްސާތައް ފެށިގެން މިހާތަނަށް ބޭއްވިފައިވަނީ އެންމެ ތިން ޖަލްސާ ކަމަށް ވިދާޅުވެ، ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ކަންބޮޑުވުން ފާޅުކުރައްވައިފިއެވެ.

ޑރ. ޝަމްހީދު އެކްސްގައި ކުރެއްވި ޕޯސްޓެއްގައި ވިދާޅުވީ، މަޖިލިސް ހުޅުވުނު ފަހުން ވޭތުވެދިޔަ ދެ ހަފްތާގައި ޖަލްސާއެއް އޮންނާނެކަން ނޭނގި މެންބަރުން ތިބެންޖެހުނީ "ވާނުވާ" އެއްގައި ކަމަށެވެ.

މަޖިލީހުގެ މަސައްކަތްތައް ހުއްޓިފައި އޮތުމާ ގުޅޭގޮތުން ސުވާލު އުފައްދަވަމުން އޭނާ ވަނީ، މަޖިލިސް މެންބަރަކަށް ވީތީ، ނުކުރާ މަސައްކަތަކަށް މުސާރަ ދޭންޖެހޭތޯ އައްސަވައި ސަރުކާރަށާއި މަޖިލީހުގެ އިދާރާއަށް ވަރަށް ބޮޑަށް ފާޑުވިދާޅުވެފައެވެ.

މަޖިލީހުގެ ގަވާއިދު ބުނާގޮތުން އާންމުކޮށް ކޮންމެ ހަފްތާއެއްގެ ހޯމަ، އަންގާރަ އަދި ބުދަ ދުވަހު ޖަލްސާތައް ބާއްވަން ޖެހެއެވެ.

ނަމަވެސް، ފަހަކަށް އައިސް ޖަލްސާތައް ތާވަލު ނުކުރެވުމާއި، މަޖިލީހުގެ މުހިންމު މަސައްކަތްތައް މަޑުޖެހިފައި އޮތުމަކީ އިދިކޮޅު މެންބަރުންގެ ބޮޑު ޝަކުވާއެކެވެ. ޑރ. ޝަމްހީދު ފާހަގަކުރެއްވި ގޮތުގައި، ރައްޔިތުންގެ ޓެކްސް ފައިސާއިން ބޮޑު މުސާރަދޭ މެންބަރުންގެ ޒިންމާ އަދާނުކޮށް ތިބުމަކީ ބަލައިގަނެވޭނެ ކަމެއް ނޫނެވެ.