ފުލުހުންގެ ފަރާތުން ނޫސްވެރިންނަށް ތަކުރާރުކޮށް ދަނީ އަނިޔާކުރިމަތިވަމުންކަމަށް މޯލްޑިވްސް ޖާރނަލިސްޓް އެސޯސިއޭޝަން، އެމްޖޭއޭއިން ބުނެފިއެވެ.

މޯލްޑިވްސް ޖާރނަލިސްޓް އެސޯސިއޭޝަން، އެމްޖޭއޭއިން މިހެން ބުނެފައި މިވަނީ އިިދިކޮޅު ކޯލިޝަނުން މާލޭގައި ރޭ ބޭއްވި މުޒާހަރާ ކަވަރުކުރަން އުޅުނު ނޫސްވެރިއަކު ހައްޔަރުކުރި މައްސަލައާއި ގުޅިގެން ނެވެ.

ރޭގެ މުޒާހަރާ ކަވަރުކުރަމުންދިޔަ ރާއްޖޭގެ އޮންލައިން ނޫހެއްގެ ނޫސްވެރިއެއް ފުލުހުން ހައްޔަރުކުރީ ނޫސްވެރިއެއްކަން އަންގައިދޭ ފާސްވެސް އަޅައިގެން ހުއްޓައެވެ.

އެމްޖޭއޭއިން ކުރި ޓްވީޓެއްގައި ވަނީ ނޫސްވެރިޔާ ހައްޔަރުކުރުން ކުށްވެރިކޮށްފައެވެ.

MJA condemns the arrest of a journalist of @avasmv who was covering the opposition demonstration in Male’ last night. The union is deeply concerned that journalists covering the protests are constantly being harassed, tortured by the @PoliceMv 1/2 pic.twitter.com/nBV8COQlZd

— Maldives Journalists Association (@mjamaldives) March 17, 2023

އެމްޖޭއޭއިން ބުނީ މުޒާހަރާތައް ކަވަރުކުރުމުގައި ހަރަކާތްތެރިވާ ނޫސްވެރިންނަށް ފުލުހުންގެ ފަރާތުން ތަކުރާރުކޮށް އަނިޔާ އާއި ފުރައްސާރަ ކުރިމަތިވަމުންދާކަމަށެވެ. އަދި މިއީ އެ ޖަމިއްޔާއިން ވަރަށް ބޮޑަށް ކަންބޮޑުވާ ކަމެއް ކަމަށް ބުންޏެވެ.

އެމްޖޭއޭއިން ވަނީ މުޒާހަރާތައް ކަވަރުކުރުމުގައި ހަރަކާތްތެރިވާ ނޫސްވެރިންނަށް ރައްކާތެރިކަން ކަށަވަރުކޮށްދިނުމަށް ފުލުހުންނާއި ސަރުކާރަށް ގޮވާލާފާއެވެ.

އެމްޖޭއޭއިން ބުނީ މިއަހަރުގެ މިހާތަނަށް ނޫސްވެރިނަށް ކުރިމަތިވި މިފަދަ 8 މައްސަލައެއް ރިޕޯޓްކޮށްފައިވާކަމަށެވެ. އަދި މިފަދަ މައްސަލަތައް ހުށަހެޅޭ މިންވަރު އިތުރުވަމުންދާކަމަށްވެސް އެމްޖޭއޭއިން ބުނެއެވެ.

ރޭގެ މުޒާހަރާ އިންވެސް ނޫސްވެރިޔަކު ހައްޔަރުކޮށްފައިވާއިރު އޭނާ ހައްޔަރުކުރި ސަބަބު ފުލުހުން މިހާތަނަށް ހާމަކޮށްފައެއް ނުވެއެވެ.