އިންޑިއާގެ ޑިފެންސް ޗީފް ޖެނެރަލް ބިޕިން ރަވާތު އަކީ އެހެން ހުރިހާ ކަމަކަށްވުރެ ބޮޑަށް ގައުމު އިސްކުރެއްވި ބޭފުޅެއް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިމޭރުމުން ވިދާޅުވެފައިވަނީ ޖެނެރަލް ބިޕިން ރަވާތު ދަތުރުކުރެއްވި ހެލިކޮޕްޓަރ ވެއްޓި އަވަހާރަވުމާ ގުޅިގެން ފޮނުއްވި ތަޢުޒިޔާގެ މެސެޖްގައެވެ. ރައީސް ޞާލިޙް ވިދާޅުވީ ޖެނެރަލް ބިޕިން ރަވާތު އަވަހާރަވީ ޚަބަރު އެއްސެވީ ނުހަނު ފުން ހިތާމައާއެކު ކަމަށެވެ.

2019 ވަނަ އަހަރު ބިޕިން އާއި ބައްދަލުކުރެއްވުމުގެ ފުރުސަތު ލިބިވަޑައިގެންނެވި ކަމަށާއި ބިޕިން އަކީ އެހެން ހުރިހާ ކަމަށް ވުރެ ބޮޑަށް ގައުމު އިސްކުރެއްވި ފަރާތެއް ކަމަށްވެސް ރައީސް ޞާލިޙް ވިދާޅުވި އެވެ. ރައީސް ޞާލިޙްވަނީ ބިޕިން އަވަހާރަވުމާ ގުޅިގެން ޢާއިލާއަށާއި އިންޑިއާ ސަރުކާރަށް ތަޢުޒިޔާ ފޮނުއްވާފައެވެ.

Saddened to hear of the tragic passing of #India's Chief of Defense Staff General Bipin Rawat. I had the honor of meeting him in 2019 - a true soldier who put service to his nation above all else.

My condolences to his family and the Indian nation for their loss. @HCIMaldives pic.twitter.com/cCfU9Vt9el

— Ibrahim Mohamed Solih (@ibusolih) December 8, 2021

ޑިފެންސް ޗީފް ޖެނެރަލް ބިޕިން ރަވާތު އަވަހާރަވީ އޭނާ ދަތުރުކުރެއްވި ހެލިކޮޕްޓަރު އިންޑިއާގެ ޓަމިލްނަޑޫއަށް ވެއްޓުމާ ގުޅިގެންނެވެ. ހެލިކޮޕްޓަރު ވެއްޓުނު އިރު އޭގައި 14 މީހުން ތިއްބެވެ. މި ޙާދިސާގައި މަރުވި މީހުންގެ ތެރޭގައި ބިޕިންގެ އަނބިކަނބަލުންވެސް ހިމެނެއެވެ. މިޙާދިސާގައި ސަލާމަތްވީ އެންމެ މީހެއް ކަމަށް އިންޑިއަން އެއަރ ފޯސް އިން ވަނީ ބުނެފައެވެ.

މިހާދިސާ ހިނގިއިރު ބިޕިން ދަތުރުކުރައްވަމުން ގެންދެވީ ސުލޫރުގެ އެއަރފޯސް ބޭސްއަކުން ޓަމިލް ނާޑޫގެ ޑިފެންސް ސަރވިސް ސްޓާފް ކޮލެޖުގައި ލެކްޗަރެއް ދެއްވުމަށެވެ.

އިންޑިއާގެ ފުރަތަމަ ޑިފެންސް ޗީފްގެ މަޤާމަށް ބިޕިން އައްޔަންކުރީ 2019 ވަނަ އަހަރުގެ ފަހުކޮޅުއެވެ.