މަކަރާއި ހީލަތުން އޯޓީޕީ ހޯދައި، މީހެއްގެ ބޭންކު އެކައުންޓުން ބޮޑެތި އަދަދުތަކުން ރުފިޔާއާއި ޑޮލަރު ފޭރުނު މައްސަލައެއްގައި ހަތަރު މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.

މި ހާދިސާ ހިނގާފައިވަނީ 24 އޮކްޓޫބަރު 2026 ގައެވެ. ފުލުހުންގެ ޚިދުމަތަށް ހުށަހެޅުނު މި މައްސަލައިގެ ތަފްސީލަށް ބަލާއިރު، ކާކުކަން ނޭނގޭ ފަރާތަކުން ޝިކާރައަކަށްވި މީހާއަށް ގުޅައިގެން އޮޅުވާލައިގެން ވަނީ އޯޓީޕީ ކޯޑު ހޯދާފައެވެ. އަދި އެ ކޯޑު ބޭނުންކޮށްގެން އެ މީހާގެ ބޭންކް އެކައުންޓަށް އެކްސެސް ހޯދުމަށްފަހު، އެކައުންޓުގައި ހުރި 63,000 ދިވެހި ރުފިޔާއާއި 21,000 އެމެރިކާ ޑޮލަރު ވަނީ މަކަރާއި ހީލަތުން ފޭރިގަނެފައެވެ.

ފުލުހުން ހިންގި އޮޕަރޭޝަނުގައި މި ޖަރީމާއާ ގުޅިގެން ހައްޔަރުކޮށްފައިވަނީ ޏ. ފުވައްމުލައް، ދޫޑިގަން، ގޯލްޑަންގޭޓް، އުމުރުން 34 އަހަރުގެ އިބްރާހީމް ޝާރިފް އާއި، ފ. ފީއަލި، މަތަރެސްމާގެ، އުމުރުން 29 އަހަރުގެ ޖިނާޙު އަޙްމަދު އާއި، ފ. ނިލަންދޫ، ނަޒުމު، އުމުރުން 38 އަހަރުގެ އިބްރާހީމް މުޢާޒު އަދި ލ. ގަން، މަތިމަރަދޫ، ލިލީނައިޓް، އުމުރުން 21 އަހަރުގެ ޢަލީ ދާއިން އެވެ.

މި މީހުންގެ ތެރެއިން ތިން މީހަކު ހައްޔަރުކޮށްފައިވަނީ އޮކްޓޫބަރު މަހުގެ 28 ވަނަ ދުވަހުއެވެ. އަދި ހަތަރުވަނަ މީހާ ފުލުހުންގެ ބެލުމުގެ ދަށަށް ގެންގޮސްފައިވަނީ ޖެހިގެން އައި އޮކްޓޫބަރު 29 ވަނަ ދުވަހުއެވެ.

ހައްޔަރުކުރެވުނު މީހުންގެ ބަންދާމެދު ގޮތެއް ނިންމުމަށްޓަކައި ކޯޓަށް ހާޒިރުކުރުމުން، ޝަރީއަތުން ވަނީ ޖިނާޙު އަޙްމަދުގެ ބަންދަށް 10 ދުވަސް ޖަހައިދީފައެވެ. އަދި ދެން ތިބި ތިން މީހުން ކަމަށްވާ އިބްރާހީމް ޝާރިފާއި، އިބްރާހީމް މުޢާޒު އަދި ޢަލީ ދާއިން 15 ދުވަހުގެ މުއްދަތަށް ބަންދުގައި ބައިތިއްބައިގެން ތަހުގީގު ކުރިއަށް ގެންދިއުމަށް ކޯޓުން ވަނީ އަމުރުކޮށްފައެވެ.

މި ސްކޭމްގެ މައްސަލަ ފުލުހުންގެ އިދާރާއިން ދަނީ ވަރަށް ސީރިއަސް މައްސަލައެއްގެ ގޮތުގައި ބަލައި، އިތުރަށް ތަހުގީގު ކުރަމުންނެވެ.