ދަރިފުޅާ، މިއަދު މަންމަ ދެކެ ދަރިފުޅު ކިތަންމެ ރުޅިއައިސް، ހިތްހަމަނުޖެހިފައި ހުރި ކަމުގައި ވިޔަސް، މަންމަ މިއަދު ދަރިފުޅަށް ކޮންމެހެންވެސް އެއްޗެއް ބުނަން އެބަޖެހެއެވެ. މުޅި ދުވަހު ފޯނަށް ބަލަހައްޓައިގެން ގޭމް ކުޅުމުގައި ދަރިފުޅު ވަގުތުތައް ބޭކާރު އެބަކުރެއެވެ. ކުޑަވަގުތުކޮޅަކަށް ފޯނު ބާއްވާފައި މަންމަގެ މި ވާހަކަތަކަށް ސަމާލުކަން ދީބަލާށެވެ. ދަރިފުޅު ފުރަތަމަ ފޯނެއް ހޯދަން އެދުނު ދުވަހު، ބައްޕަ އެކަމާ މުޅިން ދެކޮޅު ހެއްދެވިއެވެ. ނަމަވެސް މަންމަ ބައްޕައާ ބަހުސްކޮށް، ބައްޕައަށް ވިސްނައިދީގެން ދަރިފުޅަށް އެ ފޯނު ހޯދައިދިނީ ދަރިފުޅު މަންމައަށް ވީ ވަޢުދެއްގެ މަތިން ހަނދާންކޮށްފައެވެ. ދަރިފުޅު އެ ދުވަހު ބުނީ ކީކޭކަން ހަނދާން އެބަހުރި ހެއްޔެވެ؟

ދަރިފުޅު ބުނީ ފޯނު ލިބުމުން ކިޔެވުމަށް އިތުރަށް ސަމާލުކަންދީ، ދިރިއުޅުމުގައި ކާމިޔާބު ކުއްޖަކަށް ވާނެ ކަމަށެވެ. ނަމަވެސް މިއަދު ފެންނަނީ މުޅިން ތަފާތު މަންޒަރެކެވެ. އެ ފޯނުގެ ސަބަބުން ދަރިފުޅުގެ ވަގުތާއި، ސަމާލުކަމާއި، ކިޔެވުން އެކަމުގެ ތެރެއަށް ގެއްލި ހުސްވެއްޖެއެވެ. ކިޔެވުމުގެ އިތުރުން މިއަދު ދަރިފުޅު ތިޔަވަނީ ނަމާދަށްވެސް ފަރުވާކުޑަކޮށްފައެވެ. ދަރިފުޅާ، ދެ ދުނިޔޭގެ ބާއްޖަވެރިކަން އޮތީ މާތްﷲ އަށް ބޯލަނބައި، ނަމާދުތަކަށް ރައްކާތެރިވެގެންނެވެ. މިއަދު ގަޑިއަށް ކެއުމެއް، ނަމާދުކުރުމެއް އަދި ކިޔެވުމެއްވެސް ނެތެވެ. ދަރިފުޅުގެ މުސްތަޤުބަލާ މެދު ދުވަހަކުވެސް ފުންކޮށް ވިސްނާލިން ހެއްޔެވެ؟ ކޮންމެވެސް ދުވަހަކުން މީހުން ދަރިފުޅާ ސުވާލުކުރާނެއެވެ. ދަރިފުޅު އުނގެނުނީ ކޮން ޢިލްމެއް ހެއްޔެވެ؟ ދަރިފުޅުގެ ކިބައިގައި ހުރީ ކޮން ހުނަރެއް ހެއްޔެވެ؟

އެ ދުވަހު އިސްޖަހާލާފައި، "އަހަރެން ކިޔެވީ ހަމައެކަނި މިޑްލް ސްކޫލާ ހަމައަށް" ކަމަށް ބުނަން ޖެހިއްޖެނަމަ، ދިރިއުޅުމުގައި އަލުން ފުރުސަތެއް ލިބޭނީ ކިހިނެއް ހެއްޔެވެ؟ ގޭމް ކުޅުމަކީ ކޮންމެ ވަގުތަކުވެސް ކުރެވިދާނެ ކަމެކެވެ. ނަމަވެސް މިއަދު ތިޔަ ގެއްލުވާލާ ވަގުތާއި، ތަޢުލީމާއި، ދީނީ ފަރުޟުތަކަކީ ދުވަހަކުވެސް އަނބުރާ ލިބޭނެ އެއްޗެއް ނޫނެވެ.

މަންމަގެ ނަސޭހަތަކީ ދެ ދުނިޔޭގެ ބާއްޖަވެރިކަމަށްޓަކައި މިއަދު މި ވާހަކަތައް އަޑުއަހައި އެއަށް ޢަމަލުކުރުމެވެ. މައިންބަފައިންގެ ފައިސާ ހޭދަކުރުމަކީ ފަސޭހަ ކަމެކެވެ. ނަމަވެސް އަމިއްލަ މަސައްކަތުން ފުރަތަމަ ފައްސަތޭކައެއްހައި ރުފިޔާ ހޯދަން މަސައްކަތް ކޮށްބަލާށެވެ. އޭރުން ފައިސާ ހޯދުމާއި ދިރިއުޅުމެއް ބިނާކުރުމުގެ އުނދަގޫކަން އިހުސާސް ކުރެވޭނެއެވެ. އެހެންކަމުން، މަންމައަށްޓަކައެއް ނޫނެވެ، ދަރިފުޅުގެ އަމިއްލަ މުސްތަޤުބަލަށްޓަކައި ސީރިއަސްކަމާއެކު ކިޔަވައި، ނަމާދުތަކަށް ފަރުވާތެރިވާށެވެ.

ކޮންމެވެސް ދުވަހަކުން ދަރިފުޅު ކާމިޔާބު މީހަކަށް ވެގެން، މަންމައާއި ބައްޕަ ގޮވައިގެން ރަނގަޅު ތަނަކަށް ގޮސް ނުވަތަ ރީތި ގެއެއް ހޯދައިދެވޭ ދުވަހު، މަންމަ މިއަދު ގޭމް ކުޅުން ހުއްޓުވި ހަގީގީ ސަބަބު ވިސްނޭނެއެވެ. ދަރިފުޅު އުފަލުގައި ހުރުމަކަށް މަންމަ ހުރަހެއް ނާޅަމެވެ. މަންމަ އެދެނީ ދަރިފުޅުގެ އުފާވެރިކަމާއެކު އާޚިރަތް ބާއްޖަވެރިވެ، ރައްކާތެރި މުސްތަޤުބަލެއް އޮތުމަށެވެ. ޢިލްމާއި ހުނަރާއި ދީނީ ސާބިތުކަން ނެތިއްޖެނަމަ، ދިރިއުޅުން ވަރަށް ބޮޑަށް ދަތިވާނެއެވެ. ޒުވާން ދުވަސްވަރު ވަގުތު ގިނަ ކަމަށް ހީވިޔަސް، ބައެއް ފުރުސަތުތަކަކީ ދިރިއުޅުމުގައި އެންމެ ފަހަރަކު ލިބޭ އެއްޗެކެވެ.

މަންމަގެ މި ހަރުކަށި ބަސްތަކުން މިއަދު ދަރިފުޅުގެ ހިތުގައި ޖެހިދާނެއެވެ. ނަމަވެސް ކޮންމެވެސް ދުވަހަކުން މި ވާހަކަތައް ބުނީތީ ދަރިފުޅު މަންމައަށް ޝުކުރުވެރިވާނެކަން މަންމަ ގަބޫލުކުރަމެވެ. މިއަދު ދަރިފުޅު ބަހައްޓާ އަދަބުވެރިކަމާއި ކުރާ މަސައްކަތަކީ މާދަމާގެ ބަރަކާތަކަށް ވެގެންދާނެއެވެ.

ދަރިފުޅާ، މިއަދު ކިޔަވާށެވެ، ނަމާދަށް ރައްކާތެރިވާށެވެ، އަދި ގަދައަޅާ މަސައްކަތް ކުރާށެވެ. އެއީ ދަރިފުޅުގެ ކާމިޔާބީ ފެނި، މަންމައާއި ބައްޕަގެ މޫނުމައްޗަށް ފަޚުރުވެރި ހިނިތުންވުމެއް ގެނައުމަށްޓަކައެވެ. މަންމަގެ ނަސޭހަތް އަޑުއަހައި އެއަށް ޢަމަލުކުރާށެވެ.