ދިވެހިރާއްޖޭގެ އިގްތިސާދުގެ މައިބަދަ ވަރުގަދަކޮށް، ބައިނަލްއަގުވާމީ ދުނިޔެއާ ރާއްޖެ ގުޅުވައިދޭ އެންމެ މުހިންމު ބާރަކީ ފަތުރުވެރިކަމުގެ ސިނާއަތް ކަމަށް ޓޫރިޒަމް މިނިސްޓަރު މުޙައްމަދު އަމީން ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ގައުމީ ފަތުރުވެރިކަމުގެ ދުވަހުގެ މުނާސަބަތުގައި މީސްމީޑިއާ މެދުވެރިކުރައްވައި ހިއްސާކުރެއްވި ހެޔޮއެދުމާއި ތަހުނިޔާގެ މެސެޖެއްގައެވެ.

މިނިސްޓަރުގެ މެސެޖުގައި، ދުނިޔޭގެ އެންމެ މަގުބޫލު މަންޒިލްގެ ޝަރަފު މެދުކެނޑުމެއްނެތި ރާއްޖެއަށް ލިބެމުންދަނީ މި ސިނާއަތުގައި ހަރަކާތްތެރިވާ ހީވާގި މުވައްޒަފުންނާއި ހިއްސާދާރުންގެ ބުރަ އަދި އިހުލާސްތެރި މަސައްކަތުންކަން ފާހަގަކުރެއްވިއެވެ.

އަދި ފަތުރުވެރިކަމަކީ ކޮންމެ ދިވެއްސަކުވެސް ނުހަނު ފަހުރުވެރިވާ، އިގްތިސާދީ ގޮތުން ދިވެހި ރައްޔިތުންނަށް އިންގިލާބީ ކުރިއެރުންތަކަކާއި ފަހި ފުރުސަތުތަކެއް ފަހިކޮށްދޭ އަގުހުރި ދާއިރާއެއްގެ ގޮތުގައި ސިފަކުރެއްވިއެވެ.

މީގެއިތުރުން، ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ތަރައްގީކޮށް، އާ އުސްމިންތަކަކަށް ވާސިލުކުރުމަށްޓަކައި ސަރުކާރުގެ ފުރިހަމަ އެއްބާރުލުމާއި އެހީތެރިކަން އަބަދުވެސް ލިބޭނެކަމުގެ ޔަގީންކަން ދެއްވިއެވެ.

ރާއްޖޭގައި ފަތުރުވެރިކަމުގެ ދުވަހުގެ ގޮތުގައި އޮކްޓޫބަރު 3 ވަނަ ދުވަސް ފާހަގަކުރަނީ، 1972 ވަނަ އަހަރުގެ އެ ތާރީހުގައި ރާއްޖޭގެ އެންމެ ފުރަތަމަ ރިސޯޓު ކަމަށްވާ ކުރުނބާ މޯލްޑިވްސް ހުޅުވައި، މި ސިނާއަތުގެ ބިންގާ ރަސްމީކޮށް އެޅިގެންދިއުމާ ގުޅިގެންނެވެ.

ފާއިތުވި 50 އަށްވުރެ ގިނަ އަހަރުގެ ތެރޭގައި ރިސޯޓުތަކުގެ އިތުރުން ގެސްޓްހައުސް، ސަފާރީ އަދި ހޯމްސްޓޭގެ ހިދުމަތްތައް ތައާރަފުވެ، ރަށްރަށުގެ އާންމު ރައްޔިތުންނަށް މި ސިނާއަތުގެ މަންފާ ސީދާ ގޮތެއްގައި ލިބޭނެ ފުރުސަތު ވަނީ ފުޅާވެފައެވެ.

އަދި ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގ ޑެސްޓިނޭޝަން" ގެ މަގާމު ވިދިވިދިގެން އެތައް ފަހަރަކު ރާއްޖެއިން ކާމިޔާބުކޮށްފައިވުމަކީ، ދުނިޔޭގެ ފެންވަރުގައި ރާއްޖެ ހޯދާފައިވާ މަގުބޫލުކަން ހާމަކޮށްދޭ އަލިގަދަ ހެއްކެކެވެ.

ޓޫރިޒަމް މިނިސްޓްރީގެ އެންމެފަހުގެ ތަފާސްހިސާބުތަކަށް ބަލާއިރު، އަހަރުގެ މިހާތަނަށް 1.6 މިލިއަނަށްވުރެ ގިނަ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. އަދި މިވަގުތު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ މާކެޓެއްގެ ގޮތުގައި ފާހަގަކުރެވެނީ ޗައިނާއެވެ.