ސަރުކާރުން ހިންގާ ތަރައްގީގެ މަޝްރޫއުތައް އަވަސްކުރުމާ ގުޅޭގޮތުންނާއި، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ބަދަލުކުރުމުގެ މަރުހަލާއާ ބެހޭގޮތުން އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ، މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރާއެކު މަޝްވަރާ ކުރައްވައިފިއެވެ.

އެމްޓީސީސީގެ މައި އޮފީހުގައި ބޭއްވުނު މި ބައްދަލުކުރެއްވުމުގައި، ސަރުކާރުގެ ތަރައްގީގެ މަޝްރޫއުތައް ހުއްޓުމެއްނެތި ކުރިއަށް ގެންދިއުމަށާއި، މަސައްކަތްތަކުގެ ސްޕީޑް އަވަސްކުރުމަށް ކުރެވެންހުރި ކަންކަމާ ގުޅޭގޮތުން ފުޅާ ދާއިރާއެއްގައި ވާހަކައްދެއްކެވުނެވެ.

މީގެ އިތުރުން، އާރްޑީސީގެ ހިންގުމާއި އޮޕަރޭޝަންތައް އެމްޓީސީސީގެ ދަށަށް ބަދަލުކުރުމުގެ މަރުހަލާ އަމާންކަމާއެކު އަދި އެންމެ ފުރިހަމައަށް ކުރިއަށް ގެންދެވޭނެ އިންތިޒާމުތައް ހަމަޖެއްސުމާ މެދުވެސް ދެބޭފުޅުން ވަނީ މަޝްވަރާ ކުރައްވާފައެވެ.

ސަރުކާރުގެ ކުންފުނިތައް ހަރުދަނާކޮށް، މަޝްރޫއުތައް ހިންގުމުގެ ގާބިލުކަން އިތުރުކުރުމަށް ސަރުކާރުން ދަނީ ގިނަ ފިޔަވަޅުތަކެއް އަޅަމުންނެވެ.

އެގޮތުން އާރްޑީސީގެ މަސައްކަތްތައް އެމްޓީސީސީގެ ދަށަށް ބަދަލުކުރުމަކީ، ތަރައްގީގެ މަޝްރޫއުތައް އަވަސްކޮށް، ދައުލަތުގެ ޚަރަދުތައް ކުޑަކުރުމުގެ މަގުސަދުގައި ކުރިއަށްގެންދާ މުހިންމު ބަދަލެކެވެ.