އެމްޑީޕީގެ ކޮންގްރެސް ބާއްވަން ކުރިމަތިވި ގޮންޖެހުންތަކަކީ ކާމިޔާބީގެ މާފައްޗެއް ކަމަށް އެޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ނަޝީދު ފާހަގަކުރެއްވި ގޮތުގައި، ކޮންގުރެސްގެ ކަންކަން ރާވައި ހިންގުމުގައި ބޮޑެތި ގޮންޖެހުންތަކާ ކުރިމަތިލާންޖެހުނު ނަމަވެސް، އެ ކަންކަން ވެގެންދިޔައީ ޕާޓީގެ ހިތްވަރާއި ކުރިއެރުމަށް ލިބުނު އިތުރު ބާރަކަށެވެ. އަދި އުނދަގޫ ކޮންމެ ހާލަތަކުން ވެސް ޕާޓީއަށް ނުކުމެފައިވަނީ ވަރަށް ފޮނި ނަތީޖާއެއް ކަމަށް އެމަނިކުފާނު ވިދާޅުވިއެވެ.

މި ކޮންގްރެސްގެ ތެރެއިން މުހިންމު ތިން މަސައްކަތެއް ކާމިޔާބުކަމާއެކު ނިންމައި، މުހިންމު ސިޔާސަތުތަކެއް ފާސްކޮށްފައިވާކަން ރައީސް ނަޝީދު ފާހަގަކުރެއްވިއެވެ. އެގޮތުން މިއަދު ފާސްކުރި ސިޔާސަތުތަކަކީ އެއްވެސް ފަރާތަކަށް ނުރަނގަޅު ކަމެއް ނުވަތަ ގޯހެއް ނުހިންގޭނެ ފަދަ މިންގަނޑުތަކެއްގެ މައްޗަށް ބައްޓަންކުރެވުނު ހަރުދަނާ ފިޔަވަޅެއް ކަމަށް ނަޝީދު ވިދާޅުވިއެވެ.

މީގެއިތުރުން، ގާނޫނުއަސާސީގެ އަސްލާ އެއްގޮތްވާގޮތުގެ މަތިން ގައުމު ބިނާކުރުމަށް އެމްޑީޕީން ކުރަމުންދާ މަސައްކަތްތަކަށް މި ކޮންގްރެސްގެ ސަބަބުން އައު ރޫހެއް އައިސް، ރަނގަޅު މިސްރާބެއް ލިބިފައިވާކަމަށް ނަޝީދު ވިދާޅުވިއެވެ. އަދި ޕާޓީގެ އަސާސީ ގަވާއިދަށް ގެންނަން މެންބަރުން އެދުން ފާޅުކުރި މުހިންމު ބަދަލުތައް ގެނެވިފައިވާތީ އެކަމުގައި ބައިވެރިވި ހުރިހާ މެންބަރުންނަށް ވެސް ރައީސް ނަޝީދު ވަނީ ޝުކުރު އަދާކުރައްވާފައެވެ.