މިއަދު ފާހަގަކުރާ އިސްރަށްވެހިންގެ ދުވަހާ ގުޅިގެން "ދުޅަހެޔޮ އިސްރަށްވެހިން"ގެ ނަމުގައި އެޗްޑީސީއާއި ހެލްތު މިނިސްޓްރީ ގުޅިގެން ހާއްސަ ޕްރޮގްރާމެއް ފަށައިފިއެވެ.

މިއަދު ހެނދުނު ހުޅުމާލޭ ސެންޓްރަލް ޕާކުގައި ފެށި އެ ޕްރޮގުރާމު އިފްތިތާހުކޮށްދެއްވީ، ހެލްތު މިނިސްޓަރު ގީލާ އަލީއެވެ.

މި ޕްރޮގްރާމަކީ ގިނަ އިސްރަށްވެހިން އަބަދު ގޭގައި ތިބެންޖެހޭ ޖެހުމާއި، އިޖުތިމާއީ ހަރަކާތްތަކުން އެކަހެރިވުން ނައްތާލައި، އެފަރާތްތަކަށް އުފާވެރި އަދި ހަރަކާތްތެރި މާހައުލެއް ގާއިމުކޮށްދިނުމުގެ މަގްސަދުގައި ރާވާފައިވާ ހަރަކާތެކެވެ. އެގޮތުން، މި ޕްރޮގްރާމްގައި ބައިވެރިވާން އެދޭ އިސްރަށްވެހިންނަށް ރަޖިސްޓްރޭޝަނާއި ސެޝަންތަކުގައި ބައިވެރިވުން މުޅިން ހިލޭ ހަމަޖެހިގެންދާނެއެވެ.

މި ހަރަކާތާއެކު ކޮންމެ ހަފްތާއަކުވެސް ތިން ދުވަހު، އިސްރަށްވެހިންގެ އުމުރާ ގުޅޭގޮތަށް ރޭވިފައިވާ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތުތައް ކުރިއަށްގެންދާނެއެވެ. އަދި "ގޯލްޑަން އަވާ"ގެ ނަމުގައި ހަފްތާއަކު އެއްފަހަރު ނުވަތަ ކޮންމެ ދެ ހަފްތާއަކުން އެއް ދުވަހު، އިސްރަށްވެހިންނަށް ހާއްސަކޮށްގެން ބާއްވާ ހަވީރުގެ ސައެއް އޮންނާނެ ކަމަށް އެޗްޑީސީން ބުންޏެވެ.

އޭގެ އިތުރުން، މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް، އުފާވެރި މާހައުލެއްގައި އިސްރަށްވެހިންނަށް ވަގުތު ހޭދަކުރުމަށް ހާއްސަ ހަރަކާތަކާއި، އަހަރުގެ ކޮންމެ ކުއާޓަރަކު އެއްފަހަރު، އިސްރަށްވެހިންގެ ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުމާއި، ކުޑަކުދިންނާއި ޒުވާނުންނަށް އިސްރަށްވެހިންގެ ފަރާތުން ސަގާފީ މައުލޫމާތު ހިއްސާކުރުމުގެ ހަރަކާތްތައް ބޭއްވުމަށް ވެސް އެ ޕްރޮގުރާމުގެ ތެރެއިން ހަމަޖެހިފައިވާ ކަމަށް އެޗްޑީސީން ބުންޏެވެ.