ހިނގާ ބިނގާވެ އުޅޭ މީހުންނާއި ދަތުރުފަތުރަށް ދަތިވާގޮތަށް ޕާކުކޮށްފައި ހުންނަ އުޅަނދުތަކާ މެދު ފިޔަވަޅު އަޅާނެކަމަށް ފުލުހުން މިއަދު ބުނެފިއެވެ.

ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ހާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް އުޅަނދު ޕާކުކުރުން އިތުރުވަމުންދާކަން ހާމަކުރީ ފުލުހުންގެ ރަސްމީ އެކްސް އެކައުންޓްގައި މިއަދު ހަވީރު ކުރި ޕޯސްޓެއްގައެވެ.

ފުލުހުން ބުނި ގޮތުގައި އެގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓްތައް ހިނގަން މެދުވެރިވާ ކަމެކެވެ. އަދި އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުންނާއި މަގުމަތީގެ އަމާންކަން ދެމެހެއްޓުމަށްޓަކައި، އެފަދަ ސަރަހައްދުތަކުގައި އުޅަނދު ޕާކުނުކުރުމަށް ފުލުހުން އިލްތިމާސްކުރިއެވެ.

އަދި އެގޮތަށް ޕާކުކޮށްފައި ހުންނަ އުޅަނދުތަކާމެދު ފިޔަވަޅު އަޅަމުންގެންދާނެކަމަށް ވެސް ފުލުހުން ބުންޏެވެ.

ހުޅުމާލޭގެ އާބާދީ ވެސް ވަރަށް ބޮޑަށް އިތުރުވެފައިވާ އިރު ޕާކު ކުރުމުގެ ދަތިކަން މާލެއެކޭ އެއްގޮތަށް މިހާރު ދަނީ ކުރިމަތިވަމުންނެވެ.