މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ކޮންގްރެސް ފެށުމުގެ ގޮތުން ބޭއްވި ޚާއްޞަ ޖަލްސާގައި، ވެރިކަންކުރާ މައި ޕާޓީ ޕީއެންސީގެ ފަރާތުން އެ ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް ބައިވެރިވެވަޑައިގެންފިއެވެ.

މި ޖަލްސާގައި ޕީއެންސީގެ ފަރާތުން ޝިޔާމް ބައިވެރިވެވަޑައިގެންނެވިއިރު، މީގެ ކުރިން ވެސް ސިޔާސީ ޕާޓީތަކުން ބާއްވާ މިފަދަ ބޮޑެތި ބައްދަލުވުންތަކާއި ކޮންގްރެސްތަކުގައި ބައިވެރިވުމަށް އެހެން ޕާޓީތަކުގެ އިސް ލީޑަރުންނަށް ދައުވަތު އަރުވައެވެ. އެގޮތުން މިފަހަރުގެ ކޮންގްރެސްގައި ވެސް ސިޔާސީ އެހެން ޕާޓީތަކުގެ އިސް ލީޑަރުންނަށް ދައުވަތު ފޮނުވާފައިވާކަން ފާހަގަކުރެވެއެވެ.

އެމްޑީޕީގެ ކޮންގްރެސް ރަސްމީކޮށް މިރޭ ފަށާފައިވާއިރު، މި މަހުގެ 3 ވާ އާދިއްތަ ދުވަހުގެ ނިޔަލަށް މި ކޮންގްރެސް ކުރިއަށްދާނެއެވެ. މި ޖަލްސާ ޝަރަފުވެރިކޮށްދެއްވީ އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.

އެމްޑީޕީގެ ކޮންގްރެސްގެ ފުރަތަމަ ދުވަހުގެ ހުޅުވުމުގެ ޖަލްސާއަށްފަހު، މާދަމާ މެންދުރުފަހު 14:00 ގައި އިންވެސްޓްމަންޓް ފޯރަމެއް ބޭއްވުމަށް ވަނީ ހަމަޖެހިފައެވެ. ކައުންސިލްތަކުން ހުށަހަޅާ މަޝްރޫއުތަކަށް އިންވެސްޓަރުން ހޯދުމަށް ބާއްވާ މި ފޯރަމްގައި ރައީސް ނަޝީދު ވާހަކަފުޅު ދެއްކެވުމަށް ވަނީ ހަމަޖެހިފައެވެ. އެމްޑީޕީގެ ކޮންގްރެސްގެ މައިގަނޑު މަސައްކަތްތައް ފެށުމަށް ހަމަޖެހިފައިވަނީ ހޮނިހިރު ދުވަހުގެ ހެނދުނެވެ. އެ ދުވަހު ޕާޓީގެ އަސާސީ ގަވައިދަށް ހުށަހަޅާފައިވާ އިސްލާހުތަކަށް ބަހުސްކޮށް ވޯޓަށް އަހާގޮތަށް ވަނީ ހަމަޖެހިފައެވެ.