މިއަދު ތަޢާރަފުކުރި މޯލްޑިވްސް ގެސްޓް އިންފޮމޭޝަން ސިސްޓަމް (އެމް.ޖީ.އައި.އެސް) އަކީ ރާއްޖެއަށް އަންނަ ފަތުރުވެރިންގެ މަޢުލޫމާތު އެއް ވިއުގައަކުން ލިބި، ދައުލަތުގެ މާލީ އިދާރާތަކާ ގުޅުވައިދޭ ވަރަށް މުހިންމު ވަސީލަތެއް ކަމަށް މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިޒަސް ޙަސަން ޒަރީރު ވިދާޅުވެއްޖެއެވެ.

މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން މި ސިސްޓަމް އިފްތިތާޙު ކުރުމަށް ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުން ވަޒީރު ވިދާޅުވީ، އެމް.ޖީ.އައި.އެސް އަކީ ރާއްޖެއަށް ޒިޔާރަތްކުރާ ފަތުރުވެރިންގެ މަޢުލޫމާތު އެއްވިއުގައަކުން ގުޅާލައި، ދައުލަތުގެ މާލީ އިދާރާތަކާ ސީދާ ގުޅުވައިދޭ މަރުކަޒީ ނިޒާމެއް ކަމަށެވެ. ފަތުރުވެރިކަމަކީ ރާއްޖޭގެ އިޤްތިޞާދުގެ މައި ސިނާއަތަށް ވުމާއެކު، މި ދާއިރާގެ މަޢުލޫމާތަކީ ސަރުކާރާއި ދައުލަތުގެ ގިނަ އިދާރާތަކަކުން ބޭނުންކުރާ އެއްޗެއްކަން ފާހަގަ ކުރައްވައި، ވަޒީރު ވިދާޅުވީ މި ސިސްޓަމްގެ ސަބަބުން ކަމާބެހޭ މުއައްސަސާތަކުގެ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށެވެ.

ހަމައެއާއެކު ވަޒީރު ވިދާޅުވީ، މި ސިސްޓަމް ތަޢާރަފު ކުރުމަކީ ޒަމާނީ ޓެކްނޮލޮޖީގެ އެހީގައި ދައުލަތް ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ "މޯލްޑިވްސް 2.0" ގެ ޑިޖިޓަލް ތަޞައްވުރުގެ ދަށުން ޙާޞިލުކުރެވުނު މުހިންމު ލަނޑުދަނޑިއެއް ކަމަށެވެ. އަދި މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިންގ އޮޓޮމޭޓްކުރުމުގެ ލަނޑުދަނޑި ހާސިލުކުރުމަށް އެމް.ޖީ.އައި.އެސްގެ ސަބަބުން ބޮޑު ކުރިއެރުމެއް ލިބިގެންދާނެކަން ވަޒީރު ފާހަގަކުރެއްވިއެވެ. އެއާއެކު، މީރާއަކީ "އެފޯޓްލެސް" ޓެކްސް ނިޒާމެއް ޤާއިމުކުރުމުގައި އަދި ޑިޖިޓަލައިޒޭޝަންގެ މަސައްކަތުގައި އެންމެ ކުރީގައި އޮންނަ މުއައްސަސާއެއްގެ ގޮތުގައި ދެމިއޮތުމަށް ވަޒީރު އިލްތިމާސް ކުރެއްވިއެވެ.

މީގެއިތުރުން، މި ސިސްޓަމްގެ ސަބަބުން ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށްވެސް ބޮޑެތި ފައިދާތަކެއް ކުރާނެ ކަމަށް ވަޒީރު ފާހަގަކުރެއްވިއެވެ. ޚާއްޞަކޮށް އަމިއްލަ ޕްރޮޕަޓީ މެނޭޖްމަންޓް ސިސްޓަމެއް ނެތް ގެސްޓްހައުސްތަކާއި ކުދި ވިޔަފާރިތަކަށް، ފަތުރުވެރިންގެ މަޢުލޫމާތު ފަސޭހަކަމާއެކު ބެލެހެއްޓުމަށް މި ޕްލެޓްފޯމަކީ ލިބޭނެ ވަރަށް ބޮޑު އެހީއެއް ކަމަށް ވަޒީރު ވަނީ ވިދާޅުވެފައެވެ.

މިފަދަ ފުރިހަމަ ނިޒާމެއް ކުރު މުއްދަތެއްގެ ތެރޭގައި ޤާއިމުކުރެވުނީ ކަމާގުޅޭ މުއައްސަސާތަކުގެ ފުރިހަމަ އެއްބާރުލުމާއެކުކަން ފާހަގަކުރައްވައި، ވަކިން ޚާއްޞަކޮށް ކޮންޓްރޯލަރ ޖެނެރަލް އޮފް އިމިގްރޭޝަން، ކޮމިޝަނަރ އޮފް ޕޮލިސް (ރިޓަޔަރޑް) އަޙުމަދު ފަސީޙް ފޯރުކޮށްދެއްވި އެއްބާރުލެއްވުމަށް ވަޒީރު ވަނީ ޝުކުރު އަދާކުރަށްވާފައެވެ. އަދި މި ވިއުގަ ފަރުމާކުރުމާއި ޢަމަލީގޮތުން ޤާއިމުކުރުމުގައި މީރާގެ މުވައްޒަފުން ކުރެއްވި ފަންނީ އަދި އިޚްލާޞްތެރި މަސައްކަތްތަކަށްވެސް ވަޒީރުގެ ވާހަކަފުޅުގައި ވަނީ ތަޢުރީފު ކުރަށްވާފައެވެ.