ދިވެހިރާއްޖެއަށް ޒިޔާރަތްކުރާ ފަތުރުވެރިންނާއި މެހެމާނުންގެ މަޢުލޫމާތު ބެލެހެއްޓުން ޒަމާނީކޮށް ހަރުދަނާކުރުމުގެ ގޮތުން ތަޢާރަފުކުރި "މޯލްޑިވްސް ގެސްޓް އިންފޮމޭޝަން ސިސްޓަމް" (އެމްޖީއައިއެސް) ރަސްމީކޮށް މިއަދު އިފްތިތާޙު ކޮށްފިއެވެ.

މި ސިސްޓަމް ރަސްމީކޮށް އިފްތިތާޙުކޮށްދެއްވީ މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިސަސް އަލްފާޟިލް ޙަސަން ޒަރީރެވެ.

މި ރަސްމިއްޔާތުގައި ވާހަކަފުޅު ދައްކަވަމުން މާލީ ވަޒީރު ޙަސަން ޒަރީރު ވިދާޅުވީ، އެމްޖީއައިއެސް އަކީ ރާއްޖޭގެ ޑިޖިޓަލް ޓްރާންސްފޮމޭޝަން ނުވަތަ ޑިޖިޓަލް ވަސީލަތްތަކަށް ބަދަލުވުމަށް ކުރަމުންދާ ދަތުރުގައި ވަރަށް މުހިންމު ދައުރެއް އަދާކުރާނެ ނިޒާމެއް ކަމަށެވެ. އަދި މި ސިސްޓަމުގެ ސަބަބުން ރާއްޖެ އަންނަ މެހެމާނުންގެ މަޢުލޫމާތު އެއްކުރުމާއި ބެލެހެއްޓުން ލުއިފަސޭހަވެ، ޞައްޙަ ޑޭޓާގެ މައްޗަށް ބިނާކޮށް ކަންކަން ނިންމުމަށް (ޑޭޓާ-ޑްރިވަން އެޕްރޯޗް) މަގުފަހިވެގެންދާނެ ކަމަށްވެސް އެމަނިކުފާނު ފާހަގަކުރެއްވިއެވެ.

އެމްޖީއައިއެސް ޕޯޓަލް މެދުވެރިކޮށް ފަތުރުވެރިކަމުގެ ދާއިރާއާ ގުޅުންހުރި މަޢުލޫމާތުތައް އެއް ވިއުގައަކުން ލިބި، ދައުލަތުގެ ކަމާބެހޭ އިދާރާތަކަށް ބޭނުންވާ ތަފާސްހިސާބުތައް އަވަހަށް އަދި ފަސޭހަކަމާއެކު ލިބިގެންދާނެއެވެ. މިއީ ރާއްޖޭގެ ޚިދުމަތްތައް ޒަމާނީ ޓެކްނޮލޮޖީގެ އެހީގައި އިތުރަށް ހަރުދަނާ ކުރުމަށް އެޅުނު މުހިންމު ފިޔަވަޅެއް ކަމަށް މީރާއިން މަޢުލޫމާތު ދީފައިވެއެވެ.

މީރާގެ އާ ސިސްޓަމަށް ޓެކްސް ދައްކާ ފަރާތްތައް އޮންބޯޑު ކުރަނީ ދެ ފިޔަވައްސަކަށް ބަހާލައިގެންނެވެ. އެގޮތުން ރިސޯޓްތަކާއި ހޮޓާތަކުގެ އިތުރުން 50 އެނދަށްވުރެ ގިނަ ގެސްޓްހައުސްތަކުން އަންނަ ނޮވެމްބަރު މަހުން ފެށިގެން އެ ސިސްޓަމް މެދުވެރިކޮށް ރިޕޯޓްކުރަން ޖެހޭއިރު، ގްރީން ޓެކްސް ދައްކާ އެހެން ފަރާތްތަކުން ރިޕޯޓްކުރަން ޖެހޭނީ 1 ޖެނުއަރީ 2027 އިން ފެށިގެންނެވެ.

މި ސިސްޓަމް ތައާރަފުކުރި ނަމަވެސް ގްރީން ޓެކްސް ބަޔާން ހުށަހެޅުމާއި ފައިސާ ދެއްކުމުގެ ސުންގަޑިތަކަށް ބަދަލެއް ނާންނާނެ ކަމަށާއި، މިކަން ކުރިއަށްދާނީ މީރާކަނެކްޓް މެދުވެރިކޮށް ކަމަށް މީރާއިން ބުނެއެވެ. އަދި އާ ސިސްޓަމަށް މައުލޫމާތު އެޅުމުން، ގްރީން ޓެކްސް ބަޔާން ހުށަހަޅާއިރު ވަކިން އިންފޮމޭޝަން ޝީޓް އަޕްލޯޑް ކުރަން ނުޖެހި، އެ މައުލޫމާތުތައް އޮޓޮމެޓިކުން ޕްރީފިލް ވެގެންދާނެއެވެ.