ގދ. ތިނަދޫގެ އިގްތިސާދީ ތަރައްގީއަށް މުހިންމު ފިޔަވަޅެއްގެ ގޮތުން އެ ރަށުގައި ކުރިއަށްގެންދާ އިންޑަސްޓްރިއަލް ޒޯންގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ ބޮޑު މަޝްރޫއުގެ 90 އިންސައްތަ މަސައްކަތް ކާމިޔާބުކަމާއެކު ނިންމާލައިފިއެވެ.

މި މަޝްރޫއުގެ ކޮންޓްރެކްޓަރ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މައުލޫމާތު ދިން ގޮތުގައި، މަޝްރޫއުގެ ބޮޑުބައި މިހާރު ވަނީ ފުރިހަމަކުރެވިފައެވެ. އަދި މިހާރު ސައިޓުގައި ކުރިއަށްދަނީ ބަނދަރުގެ ނެރު ބައްތި އާއި އެ ސަރަހައްދުގައި ހަރުކުރަންޖެހޭ އެހެނިހެން ލައިޓްތައް ހަރުކުރުން ފަދަ އެންމެ ފަހުގެ މަސައްކަތްތަކެވެ.

ތިނަދޫގެ ވިޔަފާރިއާއި ސިނާއީ ބޭނުންތަކަށް ބިން އިތުރުކުރުމުގެ އިތުރުން ރަށުގެ ގޮނޑުދޮށް ހިމާޔަތް ކުރުމުގެ މަގުސަދުގައި ކުރިއަށްގެންދާ މި މަޝްރޫއަކީ ގާތްގަނޑަކަށް 125 މިލިއަން ދިވެހި ރުފިޔާގެ އަގުހުރި މަޝްރޫއެކެވެ. މިއީ ޖެނުއަރީ 2023 ގައި އަމަލީ މަސައްކަތް ފެށިގެން ކުރިއަށްދާ މަސައްކަތެކެވެ.

މި މަޝްރޫއުގެ ދަށުން ތިނަދޫން ޖުމްލަ 10.6 ހެކްޓަރުގެ ބިން ހިއްކާފައިވާއިރު، ރަށުގެ ގޮނޑުދޮށް ހިމާޔަތްކުރުމަށް 1,521 މީޓަރުގެ ބޮޑުހިލައިގެ ރިވެޓްމެންޓް ވަނީ ޖަހާފައެވެ. މީގެއިތުރުން 555 މީޓަރުގެ ސަރަހައްދެއްގައި ކުއޭ ވޯލް (ބަނދަރު ތޮށި) ހަރުކޮށް، ބްރިޖް ރިޓެއިނިންގ ފާރު ރޭނުމާއި، އިންޑަސްޓްރިއަލް ސަރަހައްދުގައި ޕޭވްމަންޓް އެޅުމުގެ މަސައްކަތްވެސް ވަނީ ފުރިހަމަކޮށްފައެވެ.

މި މަޝްރޫއު އެއްކޮށް ނިމި ބޭނުންކުރަން ފެށުމުން، ތިނަދޫ ބަނދަރުގެ ޖާގަ މިހާރަށްވުރެ ދެގުނައަށް ބޮޑުވެގެންދާނެއެވެ. މީގެ ސަބަބުން މުދާ އުފުލާ ބޮޑެތި ބޯޓުފަހަރަށް ފަސޭހަކަމާއެކު ބަނދަރަށް ކައިރިކޮށް، މުދާ އަރުވައި ބޭލުމުގެ އިންތިޒާމު ހަމަޖެހި، ތިނަދޫގެ އިތުރުން މުޅި ހުވަދު އަތޮޅުގެ އިގްތިސާދީ ހަރަކާތްތަކަށް ބޮޑު ދިރުމެއް ލިބިގެންދާނެ ކަމަށް ސަރުކާރުން ބުނެއެވެ.