ބ. ދަރަވަންދޫ ބަނދަރު ޒަމާނީ ފެންވަރަށް ތަރައްޤީކުރުމަށް ސަރުކާރުން ކުރިއަށްގެންދާ މަޝްރޫޢުގެ 68 އިންސައްތަ މަސައްކަތް މިހާރު ފުރިހަމަކުރެވިފައިވާ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ހާމަކުރައްވައިފިއެވެ.

އެ ވުޒާރާއިން އެކްސްގައި ހިއްސާކުރި މަޢުލޫމާތުގައި ބަޔާންކޮށްފައިވާ ގޮތުގައި، މިހާރު އެ ރަށުގައި އެންމެ ބާރަށް ހިނގަމުންދަނީ ބޭރުތޮށި ލުމުގެ މަސައްކަތްތަކުގެ އިތުރުން އެއްގަމުތޮށީގެ އެލް-ބްލޮކް އެތުރުމާއި ކެޕިންގ ބީމް އެޅުމުގެ މަސައްކަތްތަކެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ދައުލަތުގެ ބަޖެޓުން 55.48 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫޢަކީ ދަރަވަންދޫގެ އިޤްތިޞާދީ އަދި އިޖުތިމާޢީ ދަތުރުފަތުރަށް ބޮޑު ލުއިފަސޭހަކަމެއް ގެނެސްދިނުމުގެ މަޤްޞަދުގައި ކުރިއަށްގެންދާ މަޝްރޫޢެކެވެ.

މި މަޝްރޫޢުގެ ދަށުން ފަޅު ފުންކުރުމުގެ ބޮޑެތި މަސައްކަތްތަކެއް ކުރުމަށް ވަނީ ހަމަޖެހިފައެވެ. އެގޮތުން، 30،504 ކިއުބިކް މީޓަރުގެ އައު ހާބަރ ބޭސިން ފުންކުރުމާއި، ކުރިން ބޭނުންކުރަމުން އައި ފަޅުގެ ތެރެއިން 1،843 ކިއުބިކް މީޓަރުގެ ސަރަޙައްދެއް އަލުން ފުންކުރުން ހިމެނެއެވެ. މީގެއިތުރުން 2،301 ކިއުބިކް މީޓަރުގެ ނެރު ފުންކުރުމާއި، 4،126 ކިއުބިކް މީޓަރުގެ ރޭމްޕް ސަރަޙައްދު ފުންކުރުމުގެ މަސައްކަތް ވެސް މި މަޝްރޫޢުގައި ހިމެނެއެވެ.

ބަނދަރުގެ ރައްކާތެރިކަމާއި ޖާގަ އިތުރުކުރުމުގެ ގޮތުން 352 މީޓަރުގެ ބޭރުތޮށްޓަކާއި، 83 މީޓަރުގެ ރިވެޓްމެންޓް ޖެހުމުގެ އިތުރުން 24 މީޓަރުގެ ގްރޮއިން ޖެހުމަށް ވަނީ ހަމަޖެހިފައެވެ. އަދި އުޅަނދުފަހަރު ކައިރިކުރުމަށް 248 މީޓަރުގެ އެއްގަމުތޮއްޓަކާއި، 10 މީޓަރު ދިގު 9 މީޓަރު ފުޅާ ރޭމްޕެއް ހެދުން ވެސް މި މަސައްކަތުގެ ތެރޭގައި ހިމެނެއެވެ.

މީގެއިތުރުން، ފަސިންޖަރުންނާއި ދޯނިފަހަރަށް ލުއިފަސޭހަ ކޮށްދިނުމަށްޓަކައި 140 މީޓަރު ދިގު، ދެ މީޓަރު ފުޅާ ކޮންކްރީޓް ޖެޓީއެއް އެޅުމާއި، ބަނދަރު ސަރަޙައްދުގައި 2،104 އަކަމީޓަރުގެ ޕޭވްމަންޓް ހެދުމުގެ މަސައްކަތް ކުރިއަށްދާނެއެވެ. އަދި ރޭގަނޑުގެ ވަގުތުތަކުގައި ބަނދަރު ބޭނުންކުރާ ފަރާތްތަކުގެ ސަލާމަތާއި ރައްކާތެރިކަމަށްޓަކައި މަގުބައްތި އާއި ނެރުބައްތި ހަރުކުރުމުގެ މަސައްކަތް ވެސް އެމްޓީސީސީން ކުރިއަށްގެންދާނެއެވެ.