ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލެއިން، ޔުނައިޓެޑް އަރަބް އެމިރޭޓްސް (ޔޫއޭއީ) ގެ އީގަލް ހިލްސް ކުންފުންޏަށް 99 އަހަރުގެ މުއްދަތަށް ބިން ދިނުމަށް ވެފައިވާ އެއްބަސްވުމަކީ ގާނޫނުއަސާސީއާ ހިލާފު އެއްބަސްވުމެއް ކަމަށް ކަނޑައަޅައިދިނުމަށް އެދި ސުޕްރީމް ކޯޓަށް މައްސަލައެއް ހުށަހަޅައިފިއެވެ.

ރަސްމާލެ މަޝްރޫއުގެ ދަށުން ހިއްކުމަށް ހަމަޖެހިފައިވާ 1،010 ހެކްޓަރުގެ ބިމުގެ ތެރެއިން 500 ހެކްޓަރުގެ ބިން، ދުނިޔޭގެ މުއްސަނދިންނަށް އަމާޒުކޮށްގެން ހަދާ އެޕާޓްމަންޓްތައް ތަރައްގީކޮށް ވިއްކުމަށް އީގަލް ހިލްސް ކުންފުންޏާ ހަވާލުކުރީ މިދިޔަ ހޯމަ ދުވަހުއެވެ. އަދި އެ ކުންފުނިން މިހާރު ވަނީ އެ ތަންތަން ވިއްކުމުގެ މަސައްކަތް ވެސް ފަށާފައެވެ.

ގާނޫނީ ވަކީލު އަލީ ހުސައިން ސުޕްރީމް ކޯޓަށް ހުށަހެޅުއްވި މައްސަލައިގައި ފާހަގަކުރައްވާފައިވަނީ، ދިވެހި ސަރުކާރުން އެ ކުންފުންޏަށް ބިން ދޫކުރަން ނިންމި ނިންމުމަކީ ގާނޫނުއަސާސީގެ 250 ވަނަ މާއްދާއާ ކަނޑައެޅިގެން ހިލާފު ނިންމުމެއް ކަމަށެވެ.

މީގެއިތުރުން، އެ އެއްބަސްވުމުގެ ދަށުން ތަރައްގީކުރާ ތަންތަން އެހެން ފަރާތްތަކަށް ވިއްކައިފިނަމަ ނުވަތަ ވާރުތަވާ ހާލަތްތަކުގައި، އެ ފަރާތްތަކަށް އިތުރު 99 އަހަރަށް އެ ބިމުގެ މިލްކުވެރިކަން ދެމިގެންދާ ގޮތަށް އޮތް މާއްދާއަކީ، ގާނޫނުއަސާސީގެ 251 ވަނަ މާއްދާގެ (ށ) އާ ތައާރުޒުވާ މާއްދާއެއް ކަމަށްވެސް އެ މައްސަލައިގައި ބަޔާންކޮށްފައިވެއެވެ.

ގާނޫނުއަސާސީގެ 268 ވަނަ މާއްދާގައިވާ ގޮތުގެ މަތިން، ގާނޫނުއަސާސީއާ ހިލާފަށް ކުރެވޭ ކޮންމެ ކަމަކީ ބާތިލު ކަމެއްކަމަށް ވާތީ، އެ އެއްބަސްވުމާއި އެ އެއްބަސްވުން އެކުލަވައިލުމަށް ސަރުކާރުން ނިންމި ނިންމުމަކީ ބާތިލު ނިންމުމެއް ކަމަށް ކަނޑައަޅައިދިނުމަށް އަލީ ހުސައިން ވަނީ އެދިވަޑައިގެންފައެވެ.

އަދި މި މައްސަލައިގައި ޝަރުއީ ގޮތުން ވަކި ގޮތެއް ނިމެންދެން، އީގަލް ހިލްސްއާ އެކު ވެފައިވާ އެއްބަސްވުމަށް އަމަލުކުރުން ފަސްކުރުމަށާއި، ރަސްމާލޭގެ ބިމުން އެއްވެސް މިންވަރެއްގެ މައްޗަށް އެ ކުންފުނީގެ ނުވަތަ އެހެން ފަރާތެއްގެ ވެސް ހައްގެއް ނުވަތަ މަސްލަހަތެއް އުފެދިދާނެ ފަދަ އެއްވެސް އަމަލެއް ނުހިންގުމަށް ސަރުކާރުގެ މައްޗަށް ވަގުތީ އަމުރެއް ނެރެދިނުމަށް ވެސް ސުޕްރީމް ކޯޓުގައި ވަނީ އެދިފައެވެ.

ރަސްމާލެއިން ޔޫއޭއީ ކުންފުންޏަކަށް ބިން ދިން މައްސަލަ ބާތިލުކުރަން ސުޕްރީމް ކޯޓަށް ހުށައަޅާފައިވާއިރު ރަސްމާލެ ތަރައްޤީކުރުމަށް ޔޫއޭއީގެ އީގަލް ހިލްސް ކުންފުންޏާއެކު ވެފައިވާ އެއްބަސްވުމުގައި، ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ނުހިމެނޭނެކަމަށް ރައީސް ޑރ.މުޢިއްޒު ދާދިފަހުން ވަނީ ވިދާޅުވެފައެވެ.

ޕީއެސްއެމްގެ ނޭޝަނަލް ޗެޓްގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ އީގަލް ހިލްސްއަށް ބިން ދޫކުރަނީ ކުއްޔަށް (ލީސް އުސޫލުން) ކަމަށާއި، މި އެއްބަސްވުމުގައި ދައުލަތުން އެއްވެސް ސޮވްރިން ގެރެންޓީއެއް، ލޯނެއް، ނުވަތަ ޚާއްޞަ ޓެކްސް އިނާޔަތްތަކާއި ޑިއުޓީ މަޢާފުކުރުމެއް ނުހިމެނޭނެ ކަމަށެެވެ. އަދި އެއްބަސްވުމުގެ ހުރިހާ ކަމެއްވެސް ކުރިއަށްދާނީ ރާއްޖޭގައި މިހާރުވެސް ޢަމަލުކުރަމުންދާ ޤަވާޢިދުތަކާއި އުސޫލުތަކުގެ ތެރެއިން ކަމަށް ރައީސް ވިދާޅުވިއެވެ.