ދިވެހި ޕްރިމިއަރ ލީގުގައި ނިއުރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗުގެ ތެރެއިން ހިނގި މާރާމާރީގެ މައްސަލައިގައި، މާޒިޔާގެ އެސިސްޓަންޓް ކޯޗު އަހުމަދު ސުޒެއިރު 10 މެޗަށް ސަސްޕެންޑުކޮށް 15،000 ރުފިޔާއިން ޖޫރިމަނާކުރުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

މި ފިޔަވަޅަކީ މިމަހުގެ 17 ވަނަ ދުވަހުގެރޭ ގަލޮޅު ރަސްމީ ދަނޑުގައި ކުޅުނު ފޯރިގަދަ މެޗުގެ ތެރޭގައި ހިނގައިދިޔަ ހަމަނުޖެހުމުގައި، ނިއުރޭޑިއަންޓުގެ އެސިސްޓަންޓް ކޯޗު ލޫސިއާނޯގެ މޫނުމަތީގައި ސުޒެއިރު ޖަހާފައިވާތީ އަޅާފައިވާ ފިޔަވަޅެކެވެ. މި މަންޒަރު ސޯޝަލް މީޑިއާގައި ދައުރުވި ވީޑިއޯތަކުން ވެސް ވަނީ ސާފުކޮށް ފެނިފައެވެ.

މި މައްސަލަ ނިއުރޭޑިއަންޓުގެ ފަރާތުން އެފްއޭއެމްގެ ޑިސިޕްލިނަރީ ކޮމިޓީގެ އިތުރުން މޯލްޑިވްސް ޕޮލިސް ސަރވިސްއަށް ވެސް ހުށަހެޅިއެވެ. ނަމަވެސް، ފަހުން އެ ކްލަބުން ވަނީ ފުލުހުންނަށް ހުށަހެޅި މައްސަލަ އަނބުރާ ގެންގޮސްފައެވެ.

އެފްއޭއެމް އިން މި މައްސަލަ ބެލުމަށްފަހު ނެރުނު ބަޔާނެއްގައި ބުނެފައިވަނީ، އެ މެޗުގައި ކުޅިވަރުގެ ރޫހާ ޚިލާފަށް ހިނގައިދިޔަ ކަންކަން ފުރިހަމައަށް ބެލުމަށްފަހު، އެފްއޭއެމްގެ ޑިސިޕްލިނަރީ އެންޑް އެތިކްސް ކޯޑުގެ 34 ވަނަ މާއްދާގެ ދަށުން ސުޒެއިރަށް ފިޔަވަޅު އަޅަން ނިންމާފައިވާ ކަމަށެވެ. އެގޮތުން އޭނާ 10 މެޗަށް ސަސްޕެންޑުކޮށް، 15،000 ރުފިޔާއިން ވަނީ ޖޫރިމަނާކޮށްފައެވެ.

މި ޖޫރިމަނާ ފައިސާ ކުރިއަށް އޮތް 15 ދުވަހުގެ ތެރޭގައި އެ އެސޯސިއޭޝަނަށް ދައްކަންޖެހޭނެ ކަމަށާއި، ޑިސިޕްލިނަރީ ކޮމިޓީގެ މި ނިންމުން އިސްތިއުނާފު ކުރަން ބޭނުންވާނަމަ، 3 ދުވަހުގެ ތެރޭގައި އެކަން އެފްއޭއެމްއަށް އަންގަންޖެހޭނެ ކަމަށްވެސް އެ ބަޔާނުގައި ބަޔާންކޮށްފައިވެއެވެ.

މި ހާދިސާ ހިނގަން މެދުވެރިވީ މެޗުގެ 68 ވަނަ މިނެޓުގައި މާޒިޔާގެ އަބްދުﷲ ލޫތަށް، ނިއުގެ އިބްރާޙީމް މައިސާން ކުރި ފައުލަކާ ގުޅިގެން ރެފްރީ ކަށިގަނޑު ފުމުނު ވަގުތު، ނިއުގެ އަބްދުއްލައި ބިލިޓީ ފޮނުވާލި ބޯޅަ ލޫތުގެ ގައިގައި ޖެހުމުންނެވެ. މިކަމާ ހެދި ބިލިޓީ އާއި ލޫތު ކުރިމަތިލާން ދިޔަ ވަގުތު، ނިއުގެ އީތަން އިބްރާހީމް ޒަކީ، ލޫތުގެ ގައިގައި އަތްއަޅައި ކޮށްޕާލުމުން މާޒިޔާގެ ހަސަން ޝިފާޒް ވެސް ވަނީ އެ ހަމަނުޖެހުމުގެ ތެރެއަށް ވަދެފައެވެ.

މި ހަމަނުޖެހުން ބޮޑުވެ، ދެ ޓީމުގެ އެހެން ކުޅުންތެރިންނާއި އޮފިޝަލުން މައިދާނަށް އަރައި ހަމަނުޖެހުމުގައި ބައިވެރިވުމުގެ ސަބަބުން، މެޗުގެ ކުޅުން ގާތްގަނޑަކަށް 7 މިނެޓަށް މެދުކަނޑާލަން ޖެހުނެވެ. އަދި ސުޒެއިރު ނިއުގެ ކޯޗަށް ހަމަލާދީފައިވަނީ އެ ދަނޑިވަޅުގައި އުފެދުނު ހަމަނުޖެހުމުގެ ތެރޭގައެވެ.