ރ. މަޑުއްވަރީގައި ބިދޭސީ އަންހެނަކަށް އަނިޔާކޮށް، އޭނާގެ އަތުން ފޭރެން އުޅުނު މައްސަލައެއްގައި ނޭޕާލް ފިރިހެނަކު ހައްޔަރުކޮށް، އޭނާގެ ބަންދަށް 5 ދުވަސް ޖަހައިފިއެވެ.

ފުލުހުން ބުނީ، މަޑުއްވަރީގައި ހިނގި މި ހާދިސާގެ ރިޕޯޓު ފުލުހުންނަށް ލިބިފައިވަނީ މި ހިނގާ ސެޕްޓެމްބަރު މަހުގެ 24 ވީ އަންގާރަ ދުވަހުގެ ހެނދުނު 6:04 ހާއިރު ކަމަށެވެ. އަދި މި މައްސަލައާ ގުޅިގެން ކޯޓު އަމުރެއްގެ ދަށުން މި މަހުގެ 26 ވަނަ ދުވަހު ހައްޔަރުކޮށްފައިވަނީ އުމުރުން 24 އަހަރުގެ ނޭޕާލަށް ނިސްބަތްވާ ފިރިހެނެކެވެ.

މި ހާދިސާއާ ގުޅިގެން ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި، ބިދޭސީ ފިރިހެން މީހާ ވަނީ މަގުމަތިން އެ އަންހެން މީހާ ވައްޓާލައި، އޭނާގެ އަނގަމަތީގައި އަތް އަޅައި، ގައިމައްޗަށް އަރައި އިނދެ އަނިޔާކުރަން މަސައްކަތް ކޮށްފައެވެ. އަދި ގިނަ އަދަދެއްގެ ފައިސާތަކެއް މަގުމައްޗަށް އުކާލެވިފައި ހުރި މަންޒަރުވެސް އެ ވީޑިއޯއިން ފެނެއެވެ.

މި ހާދިސާ ހިނގަމުން ދިޔަ ވަގުތު އެ މަންޒަރު ވީޑިއޯ ކުރަމުން ދިޔަ ދިވެހި ފިރިހެނަކު ވަނީ އެތަނަށް ގޮސް، އަނިޔާކުރަމުން ދިޔަ މީހާ ހުއްޓުވައި އަންހެން މީހާ ސަލާމަތްކޮށްފައެވެ.

ފުލުހުން މިއަދު ބުނީ ހައްޔަރުކުރި ނޭޕާލް މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، އޭނާގެ ބަންދަށް ކޯޓުން 5 ދުވަހުގެ މުއްދަތެއް ދީފައިވާ ކަމަށެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.