ރަޝިޔާ އިން ދިވެހިރާއްޖެ އަށް ކުރަމުންދާ ވައިގެ ދަތުރުތައް އިތުރު ކުރުމަށްޓަކައި ދެ ޤައުމުގެ ދެމެދުގައި މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރުން އޮތީ ރަޝިޔާގެ ވެރިރަށް މޮސްކޯގައި ބޭއްވުނު ޚާއްޞަ ބައްދަލުވުމެއްގައެވެ. ދިވެހިރާއްޖޭގެ ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ޓޫރިޒަމް މުޙައްމަދު އަމީން އެވެ. އަދި ރަޝިޔާ ސަރުކާރުގެ ފަރާތުން ސޮއިކުރެއްވީ އެ ޤައުމުގެ ސްޓޭޓް ސެކްރެޓަރީ އަދި ޑެޕިއުޓީ މިނިސްޓަރ އޮފް ޓްރާންސްޕޯޓް ޑިމިޓްރީ ޒްވެރެވް އެވެ.

މި އެއްބަސްވުމާ ގުޅޭގޮތުން ޓޫރިޒަމް މިނިސްޓަރު މުޙައްމަދު އަމީން ވިދާޅުވީ، މި އެއްބަސްވުމުގެ ސަބަބުން ކުރިއަށް އޮތް ތަނުގައި ރަޝިޔާ އިން ރާއްޖެއަށް ދަތުރުކުރާ ފްލައިޓްތަކުގެ އަދަދު އިތުރުވެގެންދާނެ ކަމަށެވެ. އަދި މިގޮތަށް ދަތުރުތައް އިތުރުވުމަކީ ރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުމާއި ދިރުން ގެނެސްދޭނެ ކަމެއް ކަމަށްވެސް މިނިސްޓަރު ފާހަގަކުރެއްވިއެވެ.

Good discussions in Moscow with Dmitry Zverev, State Secretary of Transport of the Russian Federation; we agreed to increase air connectivity &
additional Russian carriers are expected to commence operations to the Maldives,further supporting tourism and connectivity. pic.twitter.com/mLAnLxXEyD

— Mohamed Ameen (@ameen3d) August 18, 2026

މި އަހަރުގެ ތަފާސްހިސާބުތަކަށް ބަލާއިރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ އެއް މާކެޓަކީ ރަޝިޔާއެވެ.

އެހެންކަމުން، މި އައު އެއްބަސްވުމާއެކު ދެ ޤައުމުގެ ދެމެދުގައި ވައިގެ ދަތުރުފަތުރުގެ ގުޅުން އިތުރަށް ވަރުގަދަވެ، ރާއްޖެ އަންނަ ފަތުރުވެރިންގެ އަދަދު އިތުރަށް އިތުރުވެގެންދާނެ ކަމަށް ފަތުރުވެރިކަމާބެހޭ ވުޒާރާއިން ލަފާކޮށްފައިވެއެވެ.