ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނާ ބައްދަލުކުރެއްވުމަށް ބާއްވަވާ "ރައްޔިތުންގެ އަޑު" ސިލްސިލާ ބައްދަލުވުންތަކުގެ ތެރެއިން، އިތުރު 8 ދާއިރާއަކުން ނަން ނޯޓުކުރުމުގެ ފުރުސަތު ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައިފިއެވެ.

މި ފަހަރު ފުރުސަތު ހުޅުވާލާފައިވާ ދާއިރާތަކަކީ:

- އިހަވަންދޫ ދާއިރާ

- ނައިފަރު ދާއިރާ

- ފޮނަދޫ ދާއިރާ

- މީދޫ ދާއިރާ

- ވިލިމާލެ ދާއިރާ

- މައްޗަންގޮޅި ދެކުނު ދާއިރާ

- މާމިގިލި ދާއިރާ

- ތިނަދޫ އުތުރު ދާއިރާ

މި ބައްދަލުވުންތަކުގައި ބައިވެރިވާން އެދޭ ފަރާތްތަކުން، މި މަހުގެ 17 ވާ ހޯމަ ދުވަހުގެ ރޭ 12:00 ގެ ކުރިން ޕޯޓަލް މެދުވެރިކޮށް ރަޖިސްޓްރީ ކުރަންޖެހޭނެއެވެ. ބައިވެރިވުމުގެ ފުރުސަތު ދިނުމުގައި ބަލާނީ، އެދިފައިވާ މީހުންގެ އަދަދަށާއި، ކަނޑައެޅިފައިވާ ވަގުތުގެ އިތުރުން އިދާރީ އިންތިޒާމުތަކަށެވެ.

ބައްދަލުވުމުގެ އުސޫލުތައް:

- ކޮންމެ ބައިވެރިއަކަށް ވާހަކަދެއްކުމަށް 10 မိނިޓުގެ ވަގުތެއް ލިބޭނެއެވެ.

- ބައިވެރިޔާއާއެކު އާއިލާގެ މެންބަރަކަށް (އަނބިމީހާ/ފިރިމީހާ، ދަރިއަކު ނުވަތަ މައިންބަފައިން) ބައިވެރިވެވޭނެއެވެ.

- އަމިއްލަ ކަންކަމާއި، ދާއިރާގެ ކަންބޮޑުވުންތަކާއި، ގައުމީ މަސްލަހަތު ހުރި ކަންކަމާ ގުޅޭގޮތުން މަޝްވަރާ ކުރެވޭނެއެވެ.

- ބައްދަލުވުމުގައި އަދަބުވެރިކަން އިސްކުރަންޖެހޭނެއެވެ. ހުތުރު ބަހުން ވާހަކަދެއްކުމާއި މަސްލަހަތު ގެއްލޭ ފަދަ އަމަލުތަކަށް ފުރުސަތެއް ނުދެވޭނެއެވެ.

ރައީސުލްޖުމްހޫރިއްޔާ މި ޕްރޮގްރާމް އިއުލާންކުރެއްވީ ޕީއެސްއެމްގެ "ނޭޝަން ޗެޓް" ޕްރޮގްރާމުގައެވެ. މީގެ ކުރިން ވެސް 8 ދާއިރާއަކަށް މި ފުރުސަތު ދީފައިވާއިރު، މީގެ މައިގަނޑު މަގުސަދަކީ ރައްޔިތުންގެ ކަންބޮޑުވުންތަކާއި ޚިޔާލުތައް ސީދާ ރައީސުލްޖުމްހޫރިއްޔާއަށް ހުށަހެޅުމުގެ ފުރުސަތު ފަހިކޮށްދިނުމެވެ.