2026 ވަނަ އަހަރު ބޭއްވުމަށް ހަމަޖެހިފައިވާ މިސް ވޯލްޑް މުބާރާތުގައި ދިވެހިރާއްޖެ ތަމްސީލުކުރުމުގެ ތާރީޚީ ފުރުސަތު، މަގުބޫލު މޮޑެލް މަރިޔަމް އީމާ މުހައްމަދު ކާމިޔާބުކޮށްފިއެވެ.

އޮގަސްޓް މަހުގެ 3 ވަނަ ދުވަހު ބޭއްވުނު ޚާއްޞަ ރަސްމިއްޔާތެއްގައި، އީމާއަށް ވަނީ "މިސް ވޯލްޑް މާލްޑިވްސް 2026" ގެ ޝަރަފުވެރި ތާޖު އަރުވާފައެވެ. މިއީ ދުނިޔޭގެ އެންމެ މަގުބޫލު ރީތީގެ މުބާރާތުގައި ދިވެހިރާއްޖޭގެ ފަރާތުން ރަސްމީކޮށް ބައިވެރިއަކު ވާދަކުރާ ފުރަތަމަ ފަހަރުކަން ފާހަގަކޮށްލެވެއެވެ.

އުމުރުން 23 އަހަރުގެ އީމާއަކީ މޮޑެލިންގ ދާއިރާގައި ފާހަގަކޮށްލެވޭ ފަދަ ގިނަގުނަ ކާމިޔާބީތަކެއް ހާސިލުކޮށްފައިވާ، ތަޖުރިބާކާރު ފަންނާނެކެވެ. އޭނާ ހާސިލުކުރި މި ފުރުސަތަކީ ރާއްޖޭގެ މޮޑެލިންގ ދާއިރާއަށް ބައިނަލްއަގުވާމީ މައިދާނުގައި ހުޅުވިގެންދިޔަ އާ ފުރުސަތުތަކެއްގެ ފެށުމެކެވެ.

މީގެ ކުރިން، 2000 ވަނަ އަހަރު ބޭއްވުނު 50 ވަނަ މިސް ވޯލްޑް މުބާރާތުގެ ކޯ-ހޯސްޓެއްގެ ގޮތުގައި ރާއްޖެ ހަރަކާތްތެރިވެފައިވީ ނަމަވެސް، މިއީ ރާއްޖޭގެ ބައިވެރިއަކު މި މުބާރާތުގައި ވާދަކުރާ ފުރަތަމަ ފަހަރެވެ. އީމާ ރާއްޖެ ތަމްސީލުކުރާނީ ވިއެޓްނާމްގައި އޮގަސްޓް 9 އިން ސެޕްޓެމްބަރު 5 އަށް ބޭއްވުމަށް ހަމަޖެހިފައިވާ 75 ވަނަ މިސް ވޯލްޑް ފެސްޓިވަލްގައެވެ. މިއީ ބައިނަލްއަގުވާމީ މަސްރަޙުގައި ދިވެހިރާއްޖޭގެ ނަން އިޝްތިހާރުކޮށް، ގައުމަށް ރީތި ނަން ހޯދައިދިނުމަށް ލިބިގެންދާނެ އަގުހުރި ފުރުސަތެކެވެ.