ފޯރިގަދަ ކުޅުމަކަށްފަހު ހަ ހަފުތާގެ މުއްދަތަށް ދެމިގެންދިޔަ ވޯލްޑް ކަޕް މިވަނީ ނިމިފައެވެ. ގިނަ ބަޔަކަށް މިއީ އަރާމުކޮށްލުމަށް ލިބުނު ފުރުސަތަކަށް ވިޔަސް، ބައެއް ކުޅުންތެރިންނަށް މިއީ އެއްވެސް ދައުރެއް އަދާނުކުރެވި ނިމިގެންދިޔަ މުބާރާތެކެވެ.

މުބާރާތަށް ހޮވި 1,248 ކުޅުންތެރިންގެ ތެރެއިން ގިނަ ކުޅުންތެރިންނަށް ކޮންމެވެސް ވަރަކަށް ކުޅުމުގެ ފުރުސަތު ލިބުނެވެ. ނަމަވެސް، އެމެރިކާ، މެކްސިކޯ އަދި ކެނެޑާއަށް ދަތުރުކޮށް، ދަނޑުމައްޗަށް އެރުމުގެ ފުރުސަތު އެއްވެސް މިންވަރަކަށް ނުލިބުނު ބައެއް ކުޅުންތެރިން ތިބިކަން ފާހަގަކުރެވެއެވެ.

މި ފަހަރުގެ ވޯލްޑް ކަޕްގައި އެއްވެސް ފުރުސަތެއް ނުލިބި ބާކީވި ފާހަގަކޮށްލެވޭ 10 ކުޅުންތެރިންނަކީ:

އެންގޯލޯ ކާންޓޭ (ފްރާންސް)





ޗެލްސީ އާއި ލެސްޓާ ސިޓީގެ ކުރީގެ މިޑްފީލްޑަރު ކާންޓޭގެ އުމުރުން މިހާރު 35 އަހަރު ވިޔަސް، އޭނާއަކީ އަދިވެސް ކުޅުމުގެ ފެންވަރު ހުރި ކުޅުންތެރިއެކެވެ. 2018 ވަނަ އަހަރު ފްރާންސުން ވޯލްޑް ކަޕް ކާމިޔާބުކުރިއިރު މުހިންމު ދައުރެއް އަދާކުރި ކާންޓޭއަށް، ތިންވަނަ ހޮވި މެޗުގައި އިނގިރޭސިވިލާތާ ދެކޮޅަށް ކުޅުނުއިރުވެސް ކޯޗު ޑިޑިއޭ ޑެޝޯމްޕް އެއްވެސް ފުރުސަތެއް ނުދިނުމަކީ އޭނާއަށް ލިބުނު ބޮޑު މާޔޫސްކަމެކެވެ.

ކޯބީ މައިނޫ (އިނގިރޭސިވިލާތް)





އިނގިރޭސި ޓީމުގައި ވަރުގަދަ މިޑްފީލްޑަރުން ތިބި ނަމަވެސް، މުޅި މުބާރާތުގައި ބެންޗުގައި އިންނަން ޖެހުމުން މައިނޫ ހުންނާނީ ހިތްހަމަނުޖެހިފައެވެ. 2024 ވަނަ އަހަރުގެ ޔޫރޯ ފައިނަލްގައި ކުޅުނު މައިނޫއަކީ، ބަލިވުމުގެ ސަބަބުން ތިންވަނަ ހޮވި މެޗުން ފުރުސަތު ގެއްލުމާއެކު، މި ފަހަރުގެ ވޯލްޑް ކަޕްގައި ކުޅުމުގެ ފުރުސަތު ނުލިބުނު އިނގިރޭސި ޓީމުގެ ހަމައެކަނި އައުޓްފީލްޑް ކުޅުންތެރިޔާއެވެ.

ވިކްޓަ މުނޯޒް (ސްޕެއިން)





ލިވަޕޫލްގެ އައު ސޮއި ވިކްޓަ މުނޯޒްއަކީ ވޯލްޑް ކަޕް ކާމިޔާބުކުރި ސްޕެއިން ޓީމުގެ މެންބަރެކެވެ. ނަމަވެސް އަނިޔާގެ ސަބަބުން މުބާރާތުގެ ފުރަތަމަ މެޗުތައް ގެއްލުމާ ގުޅިގެން، އޮސަސޫނާގެ ކުރީގެ ފޯވާޑަށް ދަނޑުމައްޗަށް އެރުމުގެ ފުރުސަތެއް މުޅި މުބާރާތަކު ނުލިބުނެވެ.

ޑޭވިޑް ރާޔާ (ސްޕެއިން)





ސްޕެއިންގެ ސްކޮޑުގައި ހިމެނި، ވޯލްޑް ކަޕް ކާމިޔާބުކުރި ނަމަވެސް އެންމެ މިނެޓެއްވެސް ކުޅެން ނުލިބުނު އަނެއް ކުޅުންތެރިޔަކީ ރާޔާއެވެ. އިނގިރޭސި ޕްރިމިއާ ލީގުގެ ރަން އަތްތިލަ ހޯދި ރާޔާއަށް ފުރުސަތު ނުލިބުނީ ސްޕެއިންގެ އެއްވަނަ ކީޕަރު އުނާއި ސިމޯން މުޅި މުބާރާތުގައިވެސް ބައިކޮޅަށް އެންމެ ގޯލެއް ވަައްދާލާފައި އޮތުމުންނެވެ.

ޖޭމްސް ޓްރެފޯޑް (އިނގިރޭސިވިލާތް)





ތިންވަނަ ހޮވި މެޗުގައި އިނގިރޭސި އެއްވަނަ ކީޕަރު ޖޯޑަން ޕިކްފޯޑްގެ ބަދަލުގައި ޑީން ހެންޑަސަންއަށް ފުރުސަތު ދިން ނަމަވެސް، މެންޗެސްޓާ ސިޓީގެ ޒުވާން ކީޕަރު ޖޭމްސް ޓްރެފޯޑަށް އެ ނަސީބެއް ނުލިބުނެވެ. ތޯމަސް ޓުޗެލްގެ އިރުޝާދުގެ ދަށުން ކުޅުނު އިނގިރޭސި ޓީމުގައި 23 އަހަރުގެ ޓްރެފޯޑަށް ޖެހުނީ ބެންޗުގައި އިންނާށެވެ.

ބްރެމާ (ބްރެޒިލް)





ބްރެޒިލްގެ ފަހަތް ބަލަހައްޓަން ގަބްރިއެލް އާއި މާކީނިއޯސް ތިބުމުން، ޔުވެންޓަސްގެ ސެންޓަ ބެކް ބްރެމާއަށް ފުރުސަތު ލިބުމުގެ ފުރުސަތު ކުރިންވެސް އޮތީ ކުޑަކޮށެވެ. އެހެންނަމަވެސް، މުޅި މުބާރާތުގައި އެންމެ މިނެޓެއްވެސް ކުޅެން ނުލިބި އޭނާވެސް ވަނީ މި ލިސްޓުގައި ހިމެނިފައެވެ.

ރޮނާލްޑް އަރައުހޯ (އުރުގުއޭ)





މުބާރާތް ފެށުމުގެ ކުޑަދުވަސްކޮޅެއް ކުރިން ލިބުނު އަނިޔާއެއްގެ ސަބަބުން ސައުދީ އަރަބިއްޔާ އާއި ކޭޕް ވާޑް މެޗުގައި އޭނާއަށް ނުކުޅެވުނެވެ. އުރުގުއޭ ގްރޫޕް ސްޓޭޖުން ކެޓީ، އަރައުހޯ ފަދަ މުހިންމު ކުޅުންތެރިއަކަށް ނުކުޅެވުމުގެ ސަބަބުން ކަމަށްވެސް ބެލެވިދާނެއެވެ.

އަލެހަންދްރޯ ގްރިމާލްޑޯ (ސްޕެއިން)





މި ހޫނު މޫސުމަކީ ގްރިމާލްޑޯއަށް ކާމިޔާބު ދުވަސްވަރެކެވެ. ސްޕެއިންއާއެކު ވޯލްޑް ކަޕް ކާމިޔާބުކޮށް، ބަޔާ ލެވަކޫސަނުން އެތުލެޓިކޯ މެޑްރިޑަށް އޭނާ ވަނީ ބަދަލުވެފައެވެ. އެހެންނަމަވެސް، މުބާރާތުގައި އޭނާ ހުރީ ހަމައެކަނި ބަލަން އިންނަ މީހެއްގެ ގޮތުގައެވެ. ވާދަވެރި މާކް ކުކުރެއްލާ ލެފްޓް ބެކަށް ކުޅެ މޮޅު ކުޅުމެއް ދައްކަމުން ދިޔައިރު އޭނާއަށް އޮތީ ބެންޗެވެ.

ގޮންސާލޯ އިނާސިއޯ (ޕޯޗުގަލް)





ޕޯޗުގަލްގެ ވަރުގަދަ ޑިފެންސްގައި ރޫބެން ޑިއާސް އާއި ރެނާޓޯ ވޭގާ މޮޅު ކުޅުމެއް ދެއްކިއިރު، ގޮންސާލޯ އިނާސިއޯ ހުރީ ކޮންމެވެސް ވަގުތެއްގައި ފުރުސަތު ލިބޭނެ ކަމުގެ އުންމީދުގައެވެ. ނަމަވެސް އެ ފުރުސަތު ނުލިބުމުން އޭނާ މުބާރާތް ނިންމާލީ މާޔޫސްކަމާއެކުގައެވެ.

މެޓްސް ވީފާ (ނެދަލޭންޑްސް)





ޖޫރިއަން ޓިމްބާގެ އަނިޔާއާ ގުޅިގެން މެޓްސް ވީފާއަށް ކުޅުމުގެ ފުރުސަތު ލިބޭނެ ކަމަށް ގިނަ ބަޔަކު އުންމީދުކުރިއެވެ. ނަމަވެސް، ނެދަލޭންޑްސްގެ ރައިޓް ބެކަށް ޑެންޒެލް ޑަމްފްރީސް ހުރިހާ މެޗެއްގެ ކޮންމެ މިނެޓެއްގައި ކުޅުމުގެ ސަބަބުން، ވީފާއަށް ދަނޑަށް އެރުމުގެ ނަސީބެއް ނުލިބުނެވެ.