އަންނަ އާދީއްތަ ދުވަހު (ޖުލައި 19 ގައި) ނިއު ޖާޒީގެ މެޓްލައިފް ސްޓޭޑިއަމްގައި އާޖެންޓީނާ އާއި ސްޕެއިން ބައްދަލުކުރާ ވޯލްޑް ކަޕް ފައިނަލް މެޗާ ދިމާކޮށް، އެ ސަރަހައްދުގެ ވައިގެ ނުސާފުކަން ހުރި މިންވަރު ފީފާ އާއި އެމެރިކާގެ ރިޔާސީ ގަނޑުވަރު، ވައިޓް ހައުސް އިން ވަރަށް ގާތުން ބަލަމުން އަންނަ ކަމަށް ރިޕޯޓްތައް ބުނެފިއެވެ.

މެޓްލައިފް ސްޓޭޑިއަމްއަކީ 82,500 މީހުންގެ ޖާގައިގެ ސްޓޭޑިމެކެވެ. ފައިނަލް މެޗުކުޅެން އެންމެ ދުވަހެއް ވެފައިވަނިކޮށް، މި ސްޓޭޑިއަމް ހުންނަ ސަރަހައްދުގެ ވައި ތަޣައްޔަރުވުމުގެ މައްސަލަ ކުރިމަތިވެފައިވަނީ ކެނެޑާގެ ވަލުތެރޭގައި ރޯވެފައިވާ އަލިފާންގަނޑުތަކުގެ ދުން އެމެރިކާގެ އުތުރުގެ ސަރަހައްދުތަކަށް ފެތުރުމުގެ ސަބަބުންނެވެ. އެން.ބީ.ސީ ނިއުސްގެ ރިޕޯޓަރު މޮނިކާ އަލްބާ ހާމަކުރި ގޮތުގައި، ރައީސް ޑޮނަލްޑް ޓްރަމްޕްގެ އޮފީހާއި ފީފާއާ ދެމެދު ނިއު ޔޯކާއި ނިއު ޖާޒީގެ ވައިގެ ނުސާފުކަމާ ގުޅޭގޮތުން ދަނީ ހަރަކާތްތެރި މަޝްވަރާތަކެއް ކުރެވެމުންނެވެ.

ޓުޑޭ ސްޕޯޓްސް އިން ރިޕޯޓްކޮށްފައިވާ މިކަމާ ގުޅޭގޮތުން ޔޫ.އެސް.އޭ ފީފާގެ ބަހެއް ހޯދުމަށް މަސައްކަތް ކުރި ނަމަވެސް، އަދި އެ އިދާރާއިން ރަސްމީ ޖަވާބެއް ދީފައެއް ނުވެއެވެ.

ދުނިޔޭގެ ވައިގެ ސާފުތާހިރުކަން ބަލާ "އައި.ކިއު އެއާ" ގެ ތަފާސްހިސާބުތަކަށް ބަލާއިރު، މިދިޔަ ބުރާސްފަތި ދުވަހު ނިއު ޔޯކް ހިމެނިފައިވަނީ މުޅި ދުނިޔެއިން ވެސް ވައި އެންމެ ނުސާފު ސިޓީތަކުގެ ތެރޭގައެވެ. އެ ދުވަހު އެ ސިޓީގެ "އެއާ ކޮލިޓީ އިންޑެކްސް" 208 ގައި ހުރިއިރު، މިއީ ސިއްހަތަށް "ވަރަށް ނުރައްކާތެރި" މިންވަރެކެވެ.

ވައިޓް ހައުސްގެ ވޯލްޑް ކަޕް ޓާސްކް ފޯސްގެ އެގްޒެކެޓިވް ޑިރެކްޓަރު އެންޑްރޫ ގިއުލިއާނީއާ ހަވާލާދީ ރިޕޯޓަރު ބުނެފައިވަނީ، މެޗުގެ ތާވަލަށް ބަދަލެއް ގެންނަން ނުޖެހޭނެ ކަމަށް އުންމީދު ކުރެވޭ ކަމަށެވެ. އަދި ގައުމީ މޫސުމާ ބެހޭ އިދާރާއާ ގުޅިގެން ހާލަތު މޮނިޓަރ ކުރަމުންދާ ކަމަށް ވެސް އޭނާ ވިދާޅުވިއެވެ.

ވައިގެ ނުސާފުކަމުގެ ސަބަބުން އެމެރިކާގެ އެހެން ކުޅިވަރު މުބާރާތްތަކަށް ވެސް ވަނީ އަސަރުކޮށްފައެވެ. އެގޮތުން ފިލަޑެލްފިއާގައި ކުޅެން އޮތް ބޭސްބޯލް މެޗެއްގެ ވަގުތު އަވަސްކޮށްފައިވާއިރު، ޝިކާގޯގައި ކުޅެން އޮތް ފުޓްބޯޅަ މެޗެއް ވެސް ވަނީ ވައިގެ ނުސާފުކަމުގެ ސަބަބުން ފަސްކޮށްފައެވެ. މިއީ މަޝްހޫރު ކުޅުންތެރިޔާ ރޮބާޓް ލެވަންޑޮވްސްކީ އެމް.އެލް.އެސް ގައި ކުޅޭ ފުރަތަމަ މެޗަށް ވާތީ ގިނަ ބަޔަކު އިންތިޒާރު ކުރަމުންދިޔަ މެޗެކެވެ.