2026 ވަނަ އަހަރުގެ ފީފާ ވޯލްޑް ކަޕުން އާޖެންޓީނާ ވަކިކުރުމަށް ގޮވާލާ އޮންލައިންކޮށް ކުރިއަށްގެންދާ ޕެޓިޝަނެއްގައި 6 މިލިއަނަށްވުރެ ގިނަ މީހުން ސޮއިކޮށްފައިވާ ކަމަށް ރިޕޯޓްތައް ބުނެފިއެވެ. މިއާއެކު މުބާރާތުގެ ސެމީ ފައިނަލާ ގާތްވެފައިވަނިކޮށް، ސޯޝަލް މީޑިއާގައި މިކަމާ ގުޅޭގޮތުން ބޮޑެތި ބަހުސްތަކެއް ވަނީ އުފެދިފައެވެ.

"argentinaout.com" ވެބްސައިޓުގައި ޝާއިއުކޮށްފައިވާ މި ޕެޓިޝަނުގައި ބުނެފައިވަނީ، މުޅި މުބާރާތުގައިވެސް ފީފާ އާއި މެޗު އޮފިޝަލުންގެ ފަރާތުން އާޖެންޓީނާއަށް ނަހަމަ އެހީތެރިކަމެއް ލިބެމުންދާ ކަމަށެވެ. އަދި މި މުބާރާތް ކުރިއަށްދަނީ ހަމަހަމަ އުސޫލަކުން ނޫން ކަމަށް ބުނެ، މިހާރުގެ ޗެމްޕިއަން އާޖެންޓީނާ މުބާރާތުން ބޭރުކުރުމަށް އެ ސައިޓުން ވަނީ ގޮވާލާފައެވެ.

މި ޕެޓިޝަނުގައި ބުނެފައިވަނީ ލިއޮނަލް މެސީ އާއި އާޖެންޓީނާގެ ގައުމީ ޓީމަށް ނަހަމަ ފައިދާތަކެއް ލިބެމުންދާ ކަމަށާއި، ރެފްރީންގެ ނިންމުންތައް އަބަދުވެސް ހުންނަނީ އެ ޓީމަށް ފައިދާވާ ގޮތަށް ކަމަށެވެ. އަދި އާޖެންޓީނާ މުބާރާތުން ބޭރުކުރުމަކީ ބާކީ ތިބި ޓީމުތަކަށް އިންސާފު ގާއިމުކުރުމަށް ކޮންމެހެން ކުރަންޖެހޭ ކަމެއް ކަމަށްވެސް އޭގައި ބުނެފައިވެއެވެ.

ޖުލައި 14 ވަނަ ދުވަހުގެ ރޭގަނޑު 7:00 (ޖީ.އެމް.ޓީ+7) އާ ހަމައަށް މި ޕެޓިޝަނުގައި 6 މިލިއަނަށްވުރެ ގިނަ މީހުން ވަނީ ސޮއިކޮށްފައެވެ.

ނަމަވެސް، މިއީ ރަސްމީ އެއްވެސް ހައިސިއްޔަތެއް އޮތް ކެމްޕޭނެއް ނޫނެވެ. މި ވެބްސައިޓަކީ ފީފާ ނުވަތަ އެއްވެސް ގައުމެއްގެ ފުޓްބޯޅަ އެސޯސިއޭޝަނަކާ ގުޅުން އޮތް ސައިޓެއް ނޫން ކަމުން، މި ޕެޓިޝަނަށް ގާނޫނީ ނުވަތަ އިދާރީ އެއްވެސް ބާރެއް ލިބިގެންނެއް ނުވެއެވެ.

މުބާރާތުގައި ޓީމުތަކުގެ ބައިވެރިވުމާ މެދު ގޮތް ނިންމުމުގެ ފުރިހަމަ ބާރު އޮތީ ހަމައެކަނި ފީފާއަށެވެ. އަދި އާޖެންޓީނާގެ މަގާމާ މެދު އަލުން މުރާޖައާ ކުރަމުންދާ ކަމުގެ އެއްވެސް އިޝާރާތެއް ފީފާ އިން މިހާތަނަށް ދީފައެއް ނުވެއެވެ.

މި ކެމްޕޭނަށް އާންމުންގެ ބޮޑު ސަމާލުކަމެއް ލިބުނު ނަމަވެސް، އާޖެންޓީނާ އަދިވެސް އޮތީ މުބާރާތުގައެވެ. އަދި ޖުލައި 16 ވަނަ ދުވަހު އެޓްލާންޓާގައި ކުޅޭ 2026 ވަނަ އަހަރުގެ ފީފާ ވޯލްޑް ކަޕް ސެމީ ފައިނަލް މެޗުގައި އާޖެންޓީނާ ނުކުންނާނީ އިންގްލެންޑާ ދެކޮޅަށެވެ.

ކަންމިހެން ހުރިއިރު، ފީފާ އިން ރަސްމީ ފިޔަވަޅެއް ނާޅާހާ ހިނދަކު، މި ޕެޓިޝަނުގެ ސަބަބުން އާޖެންޓީނާގެ ބައިވެރިވުމަށް އެއްވެސް ބަދަލެއް ނާންނާނެއެވެ.