އެމެރިކާގެ ފޯވާޑް ފޮލަރިން ބަލޯގަންއަށް ދެއްކި ރަތް ކާޑާ ގުޅިގެން ފީފާގެ ޑިސިޕްލިނަރީ ކޮމިޓީން ނިންމި ނިންމުމާއެކު، ފުޓްބޯޅަ ދުނިޔޭގެ ސަމާލުކަން މި މައްސަލައަށް ހުއްޓިއްޖެއެވެ. ބޮސްނިއާ އެންޑް ހެރްޒެގޯވިނާއާ ދެކޮޅަށް ކުޅުނު މެޗުގައި ބަލޯގަން ކުރި ނުރައްކާތެރި ފައުލަކަށް ސީދާ ރަތް ކާޑެއް ދެއްކި ނަމަވެސް، ފީފާއިން ވަނީ އޭނާގެ ސަސްޕެންޝަން އެއް މެޗަށް ކުޑަކޮށްދީފައެވެ.

ފީފާގެ ގަވާއިދުތައް ބުނާގޮތުން މިފަދަ ނުރައްކާތެރި ކުޅުމަކަށް މަދުވެގެން ދެ މެޗުގެ ސަސްޕެންޝަނެއް އަންނާނެއެވެ. ނަމަވެސް، ޑިސިޕްލިނަރީ ކޮމިޓީން މި އަދަބު ލުއިކޮށްދިނުމުން، އެމެރިކާގެ ސިޔާސީ ނުފޫޒު މީގެ ތެރެއަށް ވަދެފައިވާ ކަމަށް ގިނަ ބަޔަކު ދަނީ ތުހުމަތު ކުރަމުންނެވެ. ބައެއް ރިޕޯޓުތައް ބުނާގޮތުގައި، މި ނިންމުން ނިންމުމުގައި އެމެރިކާގެ ރައީސް ޑޮނަލްޑް ޓްރަމްޕާއި ވައިޓް ހައުސްގެ އިސް ބޭފުޅުން ފީފާގެ އިސްވެރިންނަށް ނުފޫޒު ފޯރުވާފައިވެއެވެ.

މި މައްސަލަ އިތުރަށް ހޫނުވީ، އިނގިރޭސި ޑިފެންޑަރު ޖަރެލް ކުއަންސާއަށް މިފަދަ ހާލަތެއްގައި ހަރުކަށި އަދަބެއް ދިނުމާ ގުޅިގެންނެވެ. މެކްސިކޯ މެޗުގައި ކުއަންސާ ކުރި ފައުލަކަށް އޭނާއަށް ދެ މެޗުގެ ސަސްޕެންޝަނެއް ދީފައިވާއިރު، މީގެ ސަބަބުން އޭނާއަށް މުބާރާތުގެ ކުއާޓާ ފައިނަލާއި ސެމީ ފައިނަލް ގެއްލޭނެއެވެ. މި ދެ މައްސަލައިގައި ފީފާއިން އަމަލުކުރި ގޮތުގެ ތަފާތާ ގުޅޭގޮތުން ބީބީސީގެ ސްޕޯޓްސް އެޑިޓަރު ޑޭން ރޯއަން، ޑިސިޕްލިނަރީ ކޮމިޓީގެ ރައީސް މުހައްމަދު އަލް ކަމާލީއާ ސުވާލު ކުރެއްވުމުން، އޭނާ ވަނީ އެއްވެސް ޖަވާބެއް ނުދެއްވައި އެތަނުން ވަޑައިގެންފައެވެ.

ފީފާގެ ރައީސް ޖިއާނީ އިންފަންޓީނޯ ވަނީ މި ނިންމުންތަކުގައި އޭނާގެ އެއްވެސް އަތެއް ނޯންނާނެ ކަމަށާއި، ފީފާގެ އިދާރާތަކަކީ މިނިވަން ތަންތަން ކަމަށް ވިދާޅުވެފައެވެ. އަދި ބަލޯގަންގެ މައްސަލައިގައި ގޮތެއް ނިންމީ ހެކިތަކަށް ބެލުމަށްފަހު ކަމަށް ފީފާއިން ބުނި ނަމަވެސް، އެއީ ކޮން ހެކިތަކެއްކަން ހާމަނުކުރުމުން، ފީފާގެ ނިންމުންތަކުގެ ދެފުށް ފެންނަ މިންވަރާ މެދު ސަޕޯޓަރުންނާއި މުހައްލިލުން ދަނީ ބޮޑެތި ސުވާލުތަކެއް އުފައްދަމުންނެވެ.