އެމްޑީޕީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ރާއްޖެއަށް ގެންނަވަން ބޭނުންވާ "ބޮޑު ބަދަލު" އާއި އާދައިގެ ބަރުލަމާނީ ނިޒާމާ ހުރި މުހިއްމު ތަފާތުތައް އިނގިރޭސިވިލާތުގެ ސިޔާސީ މަޝްރަހުން މިސާލު ދައްކަވަމުން ތަފްސީލުކޮށްދެއްވައިފިއެވެ.

​ސޯޝަލް މީޑިއާގައި ކުރެއްވި ޕޯސްޓެއްގައި އެމްޑީޕީގެ ޗެއާޕާސަން ރައީސް މުޙައްމަދު ނަޝީދު ވިދާޅުވީ، އާންމު ބަރުލަމާނީ ​ ނިޒާމެއްގައި ސަރުކާރުގެ ވެރިޔަކަށް ހުންނަނީ ވެރިކަންކުރާ ޕާޓީގެ ލީޑަރު ކަމަށެވެ. ނަމަވެސް އެމަނިކުފާނު ހުށަހަޅުއްވާ "ބޮޑު ބަދަލު" ގެ ނިޒާމުގައި، ސަރުކާރުގެ އެންމެ އިސްވެރިޔާ އަކީ ސީދާ ރައްޔިތުންގެ ސީދާ ވޯޓުން އިންތިޚާބުކުރާ ފަރާތެއްް ކަން ނަޝީދު ފާހަގަކުރެއްވިއެވެ.​މި ތަފާތު އިތުރަށް ސާފުކޮށްދެއްވުމުގެ ގޮތުން އެމަނިކުފާނު ވަނީ އިނގިރޭސިވިލާތުގެ މިހާރުގެ ހާލަތަށް އަލިއަލުވާލައްވާފައެވެ.

Ingireysi bodu vazeeru isthiufaa dhehveemaa, aa inthikhaab eh kurimacheh nuvey. Bodu vazeerakee enme gina Majlis gondi kaamiyaabu kuraa party ge leader. 5 aharuge dhaurakah sarukaaru hingaan libifai onnanee gina gondi kaamiyaabu kuraa party ah. Party leader isthufaa dhehveema,…

— Mohamed Nasheed (@MohamedNasheed) June 22, 2026

ބަރުލަމާނީ ނިޒާމެއް އޮންނަ އިނގިރޭސިވިލާތުގެ ސަރުކާރުގެ ވެރިޔަކީ ބޮޑުވަޒީރެވެ. އަދި ބޮޑުވަޒީރުކަމަށް ވަޑައިގަންނަވަނީ ގާނޫނު ހަދާ މަޖިލީހުގެ އަޣުލަބިއްޔަތު ހޯދާ ޕާޓީގެ ލީޑަރެވެ.

​"އިނގިރޭސި ބޮޑުވަޒީރު ކީ ސްޓާމާ މަގާމުން އިސްތިއުފާ ދެއްވަން ނިންމެވި ނަމަވެސް، އެ ގައުމުގައި އައު އާންމު އިންތިޚާބެއް ނުބާއްވާނެ،" ރައީސް ނަޝީދު ލިޔުއްވާފައިވެއެވެ.

​ރައީސް ނަޝީދު އިތުރަށް ވިދާޅުވި ގޮތުގައި، ބޮޑުވަޒީރު އިސްތިއުފާ ދެއްވައިފިނަމަ ނުވަތަ ޕާޓީގެ ލީޑަރުކަމުން ވަކިކޮށްފިނަމަ، ދެން ވެރިކަމާ ހަވާލުވާނީ އެ ޕާޓީގެ މެންބަރުންގެ ތެރެއިން މަޖިލީހުން ހޮވާ އައު ލީޑަރެކެވެ.

​ނަމަވެސް، ރާއްޖެއަށް ގެންނަން އެމަނިކުފާނު ވަކާލާތުކުރައްވާ ނިޒާމުގައި ކަންކަން ހިނގާނީ އެހެން ނޫންކަން ފާހަގަކުރައްވަމުން ރައީސް ނަޝީދު ވިދާޅުވީ، "ބޮޑު ބަދަލު" ގެ އެންމެ އަސާސީ ސިފައަކީ ސަރުކާރު ހިންގާނެ ވެރިޔަކު ނިންމުމުގެ ބާރު ސީދާ ރައްޔިތުންގެ ވޯޓަށް ދޫކޮށްލެވިފައި އޮތުން ކަމަށެވެ.