މ. ވޭވަށު ކައުންސިލްގެ ރައީސް ހޮވުމަށް ބޭއްވި އިންތިހާބުގައި މައްސަލަޖެހުނު ވޯޓު ކަރުދާސްތަކަކީ ސައްހަ ވޯޓުތަކެއް ކަމަށް ސުޕްރީމް ކޯޓުން މިއަދު ކަނޑައަޅައިފިއެވެ. މި ނިންމުމާ އެކު، އެ ރަށު ކައުންސިލްގެ ރައީސްކަމުގެ ގޮނޑި އެމްޑީޕީގެ ކެންޑިޑޭޓް އަހުޝަމް ނައީމަށް ވަނީ ކަށަވަރުވެފައެވެ.

މި މައްސަލަ ސުޕްރީމް ކޯޓާ ހަމައަށް އައީ، ވޯޓު ކަރުދާހުގައި ހުރި ކުދި ދެލިތިކިތަކެއްގެ ސަބަބުން އެ ވޯޓުތައް ބާތިލްކުރަން ހައި ކޯޓުން ކުރި ހުކުމް އިސްތިއުނާފު ކުރުމުންނެވެ. އެންމެ ފުރަތަމަ މި މައްސަލަ ހައި ކޯޓަށް ހުށަހެޅީ ޕީއެންސީގެ ޓިކެޓްގައި ވާދަކުރި މުހައްމަދު ނަޒީހުގެ ފަރާތުންނެވެ. އޭނާ ވަކާލާތު ކުރީ އެ ތިކިތަކުގެ ސަބަބުން ވޯޓު ދިން މީހާ ދެނެގަނެވޭނެ ކަމަށާއި، އެހެންކަމުން ވޯޓުގެ ސިއްރުކަން ގެއްލޭ ކަމަށެވެ.

ނަމަވެސް، އިލެކްޝަންސް ކޮމިޝަނުން ކުރިން ވެސް ބުނަމުން އައީ އެއީ ކަރުދާސް ޗާޕްކުރުމުގައި ދިމާވި ފަންނީ ކަމެއް ކަމަށާއި، އެއީ ވޯޓުލީ މީހާ ގަސްތުގައި ޖަހާފައިވާ ފާހަގައެއް ނޫން ކަމަށެވެ. އެ ފަހަރުގެ ނަތީޖާއިން އަހުޝަމް ކުރި ހޯއްދަވާފައިވަނީ އެންމެ ދެ ވޯޓުގެ ތަފާތުންނެވެ.

ސުޕްރީމް ކޯޓުގެ ތިން ފަނޑިޔާރުންގެ އިއްތިފާގުން މިއަދު ކުރި ހުކުމުގައި ބަޔާންކޮށްފައިވަނީ، ޗާޕްކުރާ ކަރުދާހުގައި ހުންނަ މިފަދަ ކުދި ކުށްތަކަކީ މުޅިން ނައްތާލެވޭނެ ކަންކަން ނޫން ކަމަށެވެ. އަދި މިފަދަ ކޮންމެ ތިއްކަކަށް ބަލައި ވޯޓު ބާތިލްކުރަން ފަށައިފިނަމަ، އިންތިހާބީ ނިޒާމަށް ނޭދެވޭ އަސަރުކޮށް، ކުރިމަގުގައި ވޯޓުތައް ބާތިލްކުރުމަށް ނުރައްކާތެރި ދޮރެއް ހުޅުވިގެންދާނެ ކަމަށް ފަނޑިޔާރު އަބްދުﷲ ހަމީދު އިއްވެވި ހުކުމުގައިވެއެވެ.

"މިއީ މުޅި އިންތިހާބީ ނިޒާމް ބައްޓަން ކުރުމުގައި އިއާދަ ނުކުރެވޭނެ ގެއްލުމާއި ނޭދެވޭ އަސަރުކޮށްފާނެ ކަމެއް ކަމަށް ގަބޫލު ކުރެވޭ،" ފަނޑިޔާރު ހަމީދު ވިދާޅުވިއެވެ.

މި މައްސަލަ ބެއްލެވި ބެންޗުގައި ދެން ހިމެނިވަޑައިގަތީ ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ސަލީމެވެ. ސުޕްރީމް ކޯޓުގެ މި ނިންމުމާއެކު ހައި ކޯޓުގެ ހުކުމް ބާތިލްވެ، އިންތިހާބުގެ އަސްލު ނަތީޖާ ވަނީ ދަމަހައްޓާފައެވެ. މި މައްސަލަ ކޯޓުގައި އޮތް މުއްދަތުގައި ވޭވަށު ކައުންސިލްގެ ރައީސްގެ މަގާމު އޮތީ ހުސްކޮށެވެ.