އެމެރިކާގެ މަޝްހޫރު އިސްލާމީ މުސައްނިފް އަދި ދީނީ ނަސޭހަތްތެރިޔާ އުސްތާޛާ ޔާސްމީން މުޖާހިދުގެ ލޯބިވާ މަންމަ ޢަރަފާތު ބިމުގައި ނިޔާވެއްޖެއެވެ.

ޔާސްމީން މުޖާހިދު ސޯޝަލް މީޑިއާގައި ހިއްސާކުރި އަސަރުގަދަ މެސެޖެއްގައި ބުނެފައިވަނީ، އޭނާގެ މަންމަ ނިޔާވީ ބަރަކާތްތެރި ޛުލްޙިއްޖާ މަހުގެ ފަތިސް ނަމާދު ވަގުތު ކަމަށެވެ. މިއީ މީގެ ކުރިން އޭނާގެ ބައްޕަވެސް ނިޔާވި މާތް ވަގުތުކަން އޭނާ ފާހަގަކޮށްފައިވެއެވެ.

ޔާސްމީންގެ މަންމަ ނިޔާވެފައިވަނީ މުޅި ދުނިޔޭގެ އެކި ކޮޅުކޮޅުން މުސްލިމުން ޢަރަފާތް ބިމަށް ޖަމާވެ، ދުޢާގެ އަތްތައް އުފުލާލާ ބަރަކާތްތެރި ޢަރަފާތް ދުވަހުގެ ކުރީ ދުވަހުގެ ފަތިސް ވަގުތުގައެވެ.

މަންމަ ނިޔާވި ޚަބަރާއެކު ދުނިޔޭގެ އެކި ކަންކޮޅުތަކުން ގިނަ ބަޔަކު ދުޢާގެ ބިމުގައި ތިބެގެން، އޭނާގެ މަންމައަށް ހެޔޮ ދުޢާކޮށް މެސެޖުތައް ފޮނުވަމުންދާ ކަމަށް ޔާސްމީން ބުންޏެވެ. މިކަމުން ﷲ ތަޢާލާގެ ރަޙްމަތްފުޅުގެ ބޮޑުކަން އިހުސާސް ކުރެވި، ބަސްހުއްޓޭ ފަދަ ހައިރާންކަމެއް ލިބިފައިވާ ކަމަށްވެސް އޭނާ ހާމަކުރިއެވެ.

މަންމައަކީ އަބަދުވެސް އުސޫލުތަކަކަށް ތަބާވި، އަދި އެހީތެރިކަމަށް ބޭނުންޖެހިފައިވާ މީހުންނަށް ޚިދުމަތް ކުރުމުގައި ދެމިހުރި ސާބިތު އަންހެނެއްގެ ގޮތުގައި ޔާސްމީން ސިފަކުރިއެވެ. އަދި މިއަދު އެ މަންމަ އެންމެ އެހީތެރިކަމަށް ބޭނުންވި ވަގުތު، މުޅި ދުނިޔޭގެ އެކި ކަންކޮޅުތަކުން މުސްލިމުން އެކަމަށް އިޖާބަދީ، މަންމައަށްޓަކައި ދުޢާކޮށްދެމުންދާ ކަމަށް އޭނާ ބުންޏެވެ.

މިއީ މުސްލިމް އުންމަތުގެ އެއްބައިވަންތަކަމާއި، އެއް ގުނަވަނަކަށް ތަދުވުމުން މުޅި ހަށިގަނޑަށް އެކަމުގެ އަސަރުކުރާ ފަދަ ރީތި މިސާލެއްކަން ފާހަގަކުރަމުން، ޔާސްމީން ވަނީ މަންމައަށް ހެޔޮ ދުޢާކޮށްދިން އެންމެހައި ފަރާތްތަކަށް ހިތުގެ އަޑިން ޝުކުރު އަދާކޮށްފައެވެ.