މެއެކްސްޓްރޯ އެސް 800 އަކީ ޗައިނާއިން ރޯލްސް ރޮއިސްއަށް ދިން ވަރުގަދަ ހަމަލާއެކެވެ. މެއެކްސްޓްރޯ އެސް 800 އަކީ އޭގެ ދިގުމިނުގައި 18 ފޫޓު ހުންނަ، ދެ ކުލަ އެކުލެވޭ ފަރުމާއަކާއި، މަޑު ހަންގަނޑުން ތައްޔާރުކޮށްފައިވާ ދާހިލީ ފަރުމާއެއްގެ އިތުރުން ތަރިތަކުން ފުރިފައިވާ ފުރާޅަކާއެކު ރޯލްސް ރޮއިސްގެ ޝާހީ ސިފަތައް ގެނެސްދޭ އުޅަނދެކެވެ.

ނަމަވެސް، މިއީ އިނގިރޭސިވިލާތުގެ ކާރުހާނާއެއްގެ އުފެއްދުމެއް ނޫނެވެ. ޗައިނާގެ ހެފޭއީގައި ހުންނަ ޒަމާނީ ކާރުހާނާއެއްގައި 1،000 އަށްވުރެ ގިނަ ރޮބޮޓުންގެ އެހީގައި އުފައްދާފައިވާ މި ލަގްޒަރީ ސެޑާންއަކީ ޓެކްނޮލޮޖީގެ ގޮތުން ކުރިއަރާފައިވާ ހުއާވޭގެ އެހީތެރިކަމާއެކު އުފައްދާފައިވާ އުޅަނދެކެވެ. މިއީ ދުނިޔޭގެ މުއްސަނދި އަދި އަގުބޮޑު ކާރުތަކުގެ ބާޒާރު ކޮންޓްރޯލް ކުރުމަށް ޗައިނާއިން ކުރަމުންދާ މަސައްކަތުގެ ރަމްޒެކެވެ.

ޗައިނާގެ ކުންފުނިތަކުން ޤަބޫލުކުރާ ގޮތުގައި މާސިޑީޒް ނުވަތަ ރޯލްސް ރޮއިސް ފަދަ ޒަމާންވީ ތާރީޚެއް އެމީހުންގެ ނެތް ނަމަވެސް، އޭގެ ބަދަލުގައި އެންމެ ފަހުގެ ޓެކްނޮލޮޖީއާއި ވަސީލަތްތަކުން ކާރުތައް ފުރާލައިގެން ކަސްޓަމަރުންގެ ހިތްތައް އަތުލެވިދާނެއެވެ. އެގޮތުން މި ކާރުގައި އަމިއްލައަށް ޕާކުކުރުމުގެ ޤާބިލުކަމާއި، ފަހަތު ސީޓުގައި ތިބޭ ފަރާތްތަކަށް ޚާއްޞަ 40 އިންޗީގެ ސްކްރީނަކާއި 40 ސްޕީކަރު ހިމެނެއެވެ. އަދި އަތުގެ އިޝާރާތުން ދޮރުތައް ހުޅުވާ ލެއްޕޭއިރު، ފަހަތު ސީޓުތަކަކީ ބިޒްނަސް ކްލާސްގެ ސީޓުތަކެކޭ އެއްފަދައިން މަސާޖު ކުރެވޭ ގޮތަށް ފަރުމާކޮށްފައިވާ ސީޓުތަކެކެވެ.

މި ކާރުގެ އެންމެ އަގުބޮޑު މޮޑެލްގެ އަގަކީ ގާތްގަނޑަކަށް 173،000 އެމެރިކާ ޑޮލަރެވެ. މިއީ މާސިޑީޒް-މޭބެކްގެ އަގާ އަޅާބަލާއިރު ދެބައިކުޅަ އެއްބައި އަދި ރޯލްސް ރޮއިސްއެއްގެ އަގުގެ ހަތަރުބައިކުޅަ އެއްބައެވެ. މާހިރުން ދެކޭގޮތުގައި މިއީ މޭބެކް އަދި ބީއެމްޑަބްލިއު 7-ސީރީޒް ފަދަ ކާރުތަކަށް އޮތް ބޮޑު ގޮންޖެހުމެކެވެ.

ހުއާވޭ އާއި ޖޭ.އޭ.ސީ މޮޓޯސް ގުޅިގެން އުފައްދާފައިވާ މި ކާރަކީ ބާރުގަދަ އިންޖީނެއް އެކުލެވޭ، އެންމެ 4.3 ސިކުންތުގެ ތެރޭގައި 0 އިން 100 ކިލޯމީޓަރުގެ ބާރުމިނަށް ދުއްވާލެވޭ އުޅަނދެކެވެ. މީގެ އިތުރުން އެއްފަހަރު ޗާޖުކޮށްލައިގެން 1،300 ކިލޯމީޓަރަށް ވުރެ ދުރަށް ދުއްވޭނެ ކަމަށް ބުނެފައިވެއެވެ. މިހާތަނަށް 17،000 އަށްވުރެ ގިނަ ކާރު ވިކިފައިވާއިރު، ގިނަ ބަޔަކު މި ކާރު ބޭނުންކުރަނީ ވިޔަފާރިވެރިންނާއި އިސްވެރިން އުފުލުމަށެވެ.

ރޯލްސް ރޮއިސް ފަދަ ޒަމާންވީ ކުންފުނިތަކުން ބުނާގޮތުގައި އެމީހުންގެ ކަސްޓަމަރުން ބޭނުންވަނީ ގިނަ ގެޖެޓްތަކަށްވުރެ ބޮޑަށް، އަތުން ފަރުމާކޮށްފައިވާ ފެންވަރު ރަނގަޅު ތަކެއްޗާއި ހަމަހިމޭން މާހައުލެކެވެ. ނަމަވެސް މެއެކްސްޓްރޯ ފަދަ ޗައިނާގެ އުފެއްދުންތަކުން ދައްކުވައިދެނީ، އައު ޓެކްނޮލޮޖީއާއި ހެޔޮ އަގުތަކާއެކު ދުނިޔޭގެ ކާރުގެ ބާޒާރު ބަދަލުވަމުންދާ މިންވަރެވެ. މިއީ ޒަމާންވީ ލަގްޒަރީ ބްރޭންޑްތަކަށް އޮތް ވަރުގަދަ އިމްތިހާނެކެވެ.