އިސްރާއީލުގެ ހައިފާގައި ހުންނަ ކަނޑުގެ ސިފައިން ތަމްރީނުކުރާ މަރުކަޒެއްގެ ބަދިގެއަށް ގިނަ އަދަދަކަށް މީދާ ވަދެ، އެ ތަން މީދާ ހާލިތަކަކަށް ބަދަލުވެފައިވާ ކަމަށް ބައިނަލްއަގުވާމީ މީޑިއާތަކުން ރިޕޯޓުކުރަން ފަށައިފިއެވެ.

ކޮންމެ ދުވަހަކު ގާތްގަނޑަކަށް 1،200 އެއްހާ ސިފައިންނަށް ކާބޯތަކެތި ތައްޔާރުކޮށް ފޯރުކޮށްދޭ މި ބަދިގެ ތެރޭގައި މީދަލުގެ އުނދަގޫ އިންތިހާއަށް ބޮޑުވެ، އެ ތަނުގައި ސިއްހީ ބޮޑު ނުރައްކަލެއް ވަނީ ކުރިމަތިވެފައެވެ.

މި މަރުކަޒުގައި މަސައްކަތްކުރާ މުވައްޒަފުންނާ ހަވާލާދީ މީޑިއާތަކުން ބުނާ ގޮތުގައި، މިއީ ފާއިތުވި މަސްތަކުގައި މެދުނުކެނޑި ކުރިމަތިވަމުންދާ ވަރަށް ބޮޑު ބޮލުގެ ރިހުމެކެވެ. ކާބޯތަކެތި ތައްޔާރުކުރާ ސަރަހައްދުތަކާއި، ފިނިކުރާ ކޮޓަރިތަކުގެ (ރެފްރިޖަރޭޝަން ޔުނިޓްތައް) އިތުރުން ކާބޯތަކެތި ރައްކާކުރާ ގުދަންތަކުން ވެސް އިންތިހާއަށް މީދާ ފެންނަމުންދާ ކަމަށް މުވައްޒަފުން ފާހަގަކުރެއެވެ.

މި ހާދިސާގެ ނުރައްކާތެރިކަމާއި ފަކުރުގަންނަންޖެހޭ މިންވަރު އެންމެ ބޮޑަށް ހާމަވެގެންދިޔައީ، ދާދިފަހުން ސިފައިންނަށް ކާންދިނުމަށްޓަކައި ކައްކާފައި ހުރި ކާނާ ތެއްޔެއްގެ ތެރެއިން މީދަލެއް ފެނުނު ހިސާބުންނެވެ. މި މައްސަލައާ ގުޅިގެން ސިފައިންގެ މަރުކަޒުގައި ތިބި މީހުންގެ މެދުގައި ބޮޑު ކަންބޮޑުވުމެއް އުފެދިފައިވާއިރު، އެ ތަނުގެ ސާފުތާހިރުކަމުގެ ފިޔަވަޅުތައް ވަރުގަދަކޮށް، މިކަމަށް އަވަސް ހައްލެއް ހޯދުމަށް ދަނީ ގޮވާލަމުންނެވެ.

މިފަދަ ހާލަތެއްގައި ކާބޯތަކެތި ތައްޔާރުކުރުމަކީ ނުރައްކާތެރި ބަލިތައް ފެތުރުމަށް މަގުފަހިވާނެ ކަމެއް ކަމަށް ސިއްހީ މާހިރުން ވެސް އިންޒާރު ދެއެވެ.