"މޯޓަލް ކޮމްބެޓް 2" އަށް ޕްރިވިއު ޝޯތަކުން 5 މިލިއަން ޑޮލަރު، "ޑެވިލް ވެއާރސް ޕްރާޑާ 2" ގެ ދުނިޔޭގެ އާމްދަނީ 300 މިލިއަން ޑޮލަރަށް، މައިކަލް ޖެކްސަންގެ ހަޔާތުގެ މައްޗަށް ބިނާކޮށް އުފައްދާފައިވާ "މައިކަލް" ފިލްމަށް އެމެރިކާގެ މާކެޓުން 200 މިލިއަން ޑޮލަރުގެ އާމްދަނީއެއް ލިބި، އިތުރު ކާމިޔާބީއެއް މިދިޔަ ބުރާސްފަތި ދުވަހު ވަނީ ހޯދާފައެވެ. މީގެ އިތުރުން، ޖޭމްސް ކެމަރަން އާއި ބިލީ އައިލިޝް ގުޅިގެން ޑައިރެކްޓްކޮށްފައިވާ އައު ކޮންސަރޓް ފިލްމަށް ޕްރިވިއު އަދި އައިމެކްސް ސްކްރީނިންގްތަކުން 2.2 މިލިއަން ޑޮލަރު ލިބިފައިވާއިރު، "ޝީޕް ޑިޓެކްޓިވްސް" އަށް ބުރާސްފަތި ދުވަހުގެ ޕްރިވިއުތަކުން އެކަނި 1 މިލިއަން ޑޮލަރު ވަނީ ލިބިފައެވެ.

ވީޑިއޯ ގޭމަކަށް ބިނާކޮށް އުފައްދާފައިވާ "މޯޓަލް ކޮމްބެޓް 2" އުތުރު އެމެރިކާގައި ދައްކަން ފަށާފައިވަނީ ބުދަ ދުވަހުގެ އައިމެކްސް ސްކްރީނިންގްތަކާއި ބުރާސްފަތި ދުވަހުގެ ޕްރިވިއުތަކުން 5.2 މިލިއަން ޑޮލަރުގެ އާމްދަނީއަކާއެކުގައެވެ. ބައެއް ޙަބަރުތަކުން ދައްކާގޮތުގައި ފިލްމު ހުޅުވޭ ހަފުތާ ބަންދުގައި 45 މިލިއަން ޑޮލަރަށްވުރެ ގިނަ އާމްދަނީއެއް ލިބޭނެ ކަމަށް ލަފާކުރެވުނު ނަމަވެސް، ފިލްމު އުފެއްދި ނިއު ލައިން ސިނަމާ އާއި ވޯނަރ ބްރަދާސްއިން ލަފާކުރަނީ 35 އާއި 40 މިލިއަން ޑޮލަރާ ދެމެދުގެ އަދަދެކެވެ. އަދި ދުނިޔޭގެ މާކެޓުގައި މި ފިލްމަށް 65 އާއި 80 މިލިއަން ޑޮލަރާ ދެމެދުގެ އާމްދަނީއެއް ލިބޭނެ ކަމަށް ބެލެވެއެވެ.

2021 ވަނަ އަހަރު ނެރުނު "މޯޓަލް ކޮމްބެޓް" އަކީ ކޮވިޑްގެ ބަލިމަޑުކަމުގެ ތެރޭގައި ސިނަމާތަކާއި އެޗް.ބީ.އޯ މެކްސްގައި އެއްފަހަރާ ދެއްކި ނަމަވެސް ބޮޑު ތަރުހީބެއް ލިބުނު ފިލްމެކެވެ. އެ ފިލްމު ހުޅުވުނުއިރު 23 މިލިއަން ޑޮލަރު ލިބުނުއިރު، ޖުމްލަ އާމްދަނީގެ ގޮތުގައި އެމެރިކާއިން 42 މިލިއަން އަދި ދުނިޔޭގެ މާކެޓުން 84.4 މިލިއަން ޑޮލަރު ހޯދިއެވެ. މިފަހަރުގެ ފިލްމު ވެސް ޑައިރެކްޓްކޮށްފައިވަނީ ސައިމަން މެކްކުއޮއިޑް އެވެ. ޖެރެމީ ސްލޭޓަރގެ ސްކްރީންޕްލޭއަކަށް ތައްޔާރުކޮށްފައިވާ މި ފިލްމުގައި މަޝްހޫރު އެކްޓަރު ކާލް އާބަން ފެނިގެންދާނީ ގިނަ ބައެއްގެ މަޤުބޫލުކަން ހޯދާފައިވާ "ޖޯނީ ކޭޖް" ގެ ރޯލުންނެވެ.

މެކްކުއޮއިޑްގެ މި ފިލްމަށް "ދަ ޑެވިލް ވެއާސް ޕްރާޑާ 2" އާ ވާދަކޮށް ކުރިހޯދިދާނެތޯ މިހާރު ވަނީ ސުވާލު އުފެދިފައެވެ. "ޕްރާޑާ .... 2" އަކީ 2023 ވަނަ އަހަރުގެ "ބާބީ" އަށްފަހު އަންހެނުންގެ މެދުގައި އެންމެ މަޤުބޫލު ފިލްމަށް ވުމުގެ މަގުމަތީގައިވާ ފިލްމެކެވެ. މި ފިލްމުގެ އާމްދަނީ ދުނިޔޭގެ ފެންވަރުގައި ބުދަ ދުވަހު 300 މިލިއަން ޑޮލަރަށް އަރާފައިވާއިރު، ބުރާސްފަތި ދުވަހު އުތުރު އެމެރިކާގައި އެކަނި 100 މިލިއަން ޑޮލަރުގެ އާމްދަނީއެއް ވަނީ ހޯދާފައެވެ. ހަމައެއާއެކު، ލަޔަންސްގޭޓްގެ "މައިކަލް" ފިލްމު ވެސް ދަނީ ބޮޑު ކާމިޔާބީއެއް ހޯދަމުންނެވެ. މި ފިލްމު މިހާރު ތައްޔާރުވަމުންދަނީ "ބޮހީމިއަން ރެޕްސޮޑީ" ގެ ރެކޯޑު މުގުރާލައި، އުތުރު އެމެރިކާގައި މިހާތަނަށް އެންމެ ބޮޑު އާމްދަނީއެއް ހޯދި މިއުޒިކް ބަޔޯޕިކްގެ ޝަރަފު ހޯދުމަށެވެ.

މައިންގެ ދުވަހާ ދިމާކޮށް ދެން އެންމެ ބޮޑު ތަރުހީބެއް ލިބޭނެ ކަމަށް ބެލެވެނީ ޕެރަމައުންޓްގެ "ބިލީ އައިލިޝް - ހިޓް މީ ހާޑް އެންޑް ސޮފްޓް: ދަ ޓުއާ (ލައިވް އިން 3ޑީ)" އަށެވެ. ޖޭމްސް ކެމަރަންގެ ޚާއްސަ 3ޑީ ކެމެރާ ޓެކްނޮލޮޖީ ބޭނުންކޮށްގެން އުފައްދާފައިވާ މި ފިލްމަށް ހުޅުވޭ ހަފުތާ ބަންދުގައި 6 އާއި 9 މިލިއަން ޑޮލަރާ ދެމެދުގެ އާމްދަނީއެއް ލިބޭނެ ކަމަށް ލަފާކުރެވެއެވެ.



މީގެ އިތުރުން އެމެޒޯން އެމް.ޖީ.އެމްގެ "ދަ ޝީޕް ޑިޓެކްޓިވްސް" އަކީ ވެސް އުންމީދީ ފިލްމެކެވެ. މި ފިލްމަށް ހުޅުވޭ ހަފުތާ ބަންދުގައި 12 އާއި 15 މިލިއަން ޑޮލަރާ ދެމެދުގެ އާމްދަނީއެއް ލިބޭނެ ކަމަށް ބެލެވެއެވެ. ކޮމެޑީ-މިސްޓްރީ މި ފިލްމުގައި ދައްކުވައިދެނީ، ވާހަކަދައްކާ ކުލަގަދަ ކުޑަބަކަރިތަކެއް އެސަތްތަކުގެ މަޤުބޫލު ކެއަރޓޭކަރު (ހިއު ޖެކްމަން) ގެ މަރުގެ ސިއްރު ހޯދަން މަސައްކަތްކުރާ ތަނެވެ. މި ފިލްމުގެ އެގްޒެކެޓިވް ޕްރޮޑިއުސަރުންގެ ތެރޭގައި މަޝްހޫރު ޑައިރެކްޓަރުން ކަމަށްވާ ފިލް ލޯޑް އަދި ކްރިސްޓޮފާ މިލާ ހިމެނެއެވެ.