"ރާޖާ ޝިވާޖީ" ފިލްމް އަކީ ރިތޭޝް ދޭޝްމުކްގެ ފަރާތުން ފެނިގެންދިޔައީ އޭނާގެ ކެރިއަރުގެ އެންމެ ކުޅަދާނަ ހުނަރު ދެއްކުނު ފިލްމް ކަމަށް ފިލްމް ބެލި މީހުންގެތޭން ގިނަ ބަޔަކު ބުނެފިއެވެ.

މުމްބާއީ ފިލްމު ކޮމްޕެނީގެ ދަށުން ޖިޔޯތީ ދޭޝްޕާންޑޭ އާއި ޖެނީލިއާ ދޭޝްމުކް އުފައްދާ، ޖިއޯ ސްޓޫޑިއޯސް އިން ގެނެސްދޭ "ރާޖާ ޝިވާޖީ" މިހާރު ވަނީ ސިނަމާތަކުގައި ދައްކަން ފަށާފައެވެ. ރިތޭޝް ދޭޝްމުކް މުހިންމު ދައުރެއް އަދާކުރާ މި ފިލްމު ސިނަމާތަކަށް އައުމާއެކު، ފުރަތަމަ ލިބެމުންދާ ޚަބަރުތަކުން އެނގޭ ގޮތުގައި މިއީ ވަރަށް ވަރުގަދަ އަދި އަސަރުގަދަ ފިލްމެކެވެ. ހުކުރު ދުވަހުގެ ހެނދުނު، ފިލްމީ ދާއިރާގެ ތަޖުރިބާކާރު އެނަލިސްޓް ތަރަން އަދާރްޝް ވަނީ މި ފިލްމަށް 4 ތަރީގެ ރޭޓިންގްއެއް ދީފައެވެ. އޭނާ ފާހަގަކުރި ގޮތުގައި މިއީ ޗަތުރަޕަތީ ޝިވާޖީ މަހާރާޖަށް އަރުވާ ފުރިހަމަ އިހުތިރާމެކެވެ. އަދި ޑައިރެކްޓަރެއްގެ ގޮތުން ރިތޭޝް ކޮށްފައިވަނީ ނަމޫނާ މަސައްކަތެއް ކަމަށް އޭނާ ބުންޏެވެ.

ތަރަން އަދާރްޝްގެ އެކްސް އެކައުންޓުގައި ލިޔެފައިވަނީ، "ރާޖާ ޝިވާޖީ" އަކީ ޗަތުރަޕަތީ ޝިވާޖީ މަހާރާޖުގެ ހިތްވަރާއި، ކެރުމާއި، ދުރުވިސްނުމަށް ކުރެވޭ މަތިވެރި އިހުތިރާމެއް ކަމަށެވެ. މި ތާރީޚީ ފިލްމަކީ ފަޚުރާއި ޤައުމީ ލޯބި އާލާކޮށްދޭ، ރޫހީ ގޮތުންނާއި މަންޒަރުތަކުގެ ގޮތުން ނުހަނު ފުރިހަމަ އުފެއްދުމެއް ކަމަށް އޭނާ ސިފަކުރިއެވެ. މީގެއިތުރުން، މިފަދަ ބޮޑު ތާރީޚީ ޝަޚްސިއްޔަތެއްގެ ވާހަކަ ގެނެސްދިނުމަކީ ފަސޭހަ ކަމެއް ނޫން ނަމަވެސް، ޑައިރެކްޓަރު ރިތޭޝް ދޭޝްމުކް ވަނީ ވަރަށް ކެރުމާއި ޔަގީންކަމާއެކު އެ މަސައްކަތް ކާމިޔާބުކަމާއެކު ނިންމާލާފައި ކަމަށް އޭނާ ބުންޏެވެ. އޭނާގެ ވާހަކަ ކިޔައިދިނުމުގެ އުސޫލާއި، ތަޞައްވުރާއި، މަސައްކަތް ތަންފީޒުކޮށްފައިވާ ގޮތް ނުހަނު ރީތި ކަމަށް އޭނާ ފާހަގަކުރިއެވެ.

އެކްޓަރެއްގެ ގޮތުން ބަލާއިރު ވެސް، ރިތޭޝް ދޭޝްމުކް މި ފިލްމުގައި ދައްކާފައިވަނީ އޭނާގެ މުޅި ކެރިއަރުގައި ވެސް ފެނުނު އެންމެ ވަރުގަދަ ކުޅަދާނަކަން ކަމަށް ތަރަން ބުންޏެވެ. އަދި ސަންޖޭ ދަތުގެ ރޯލު ވަރަށް ފުރިހަމަ ކަމަށާއި، އަބީޝެކް ބައްޗަންގެ ބައިވެރިވުމުން ފިލްމަށް އިތުރު ފުރިހަމަކަމެއް ލިބިގެންދާ ކަމަށް އޭނާ ލިޔެފައިވެއެވެ. ވިދްޔާ ބާލަންގެ ހުނަރުވެރިކަން ފާހަގަކުރަމުން، ބާގްޔަޝްރީގެ ފެނިލުންތަކަކީ ވެސް ހިތްގައިމު ކަމެއްގެ ގޮތުގައި އޭނާ ސިފަކުރިއެވެ. މީގެއިތުރުން ޖެނީލިއާ ދޭޝްމުކް އާއި އަމޯލް ގުޕްތާގެ މަސައްކަތަށް ވެސް އޭނާ ތައުރީފު ކުރިއެވެ. ތަރަންގެ ރިވިއު ނިންމާލަމުން ބުނީ، މިއީ ކޮންމެ އިންޑިއާ ރައްޔިތަކު ބަލާލުން މުހިންމު، ފަޚުރުވެރިކަމާއި އަސަރުން ފުރިގެންވާ ކާމިޔާބު ފިލްމެއް ކަމަށެވެ.



މި ފިލްމުގައި މައިގަނޑު ގޮތެއްގައި ދައްކުވައިދެނީ މަރާޓާ ވެރިޔާ ޝިވާޖީގެ ޒުވާން ދުވަސްވަރާއި، "ސްވަރާޖްޔާ" (އަމިއްލަ މިނިވަން ދައުލަތެއް) އުފެއްދުމަށް ކުރެއްވި އުންމީދާއި، އޭރުގެ ބާރުގަދަ ފަރާތްތަކާ ދެކޮޅަށް ކުރެއްވި ހަނގުރާމަތަކެވެ. ޗަތުރަޕަތީ ޝިވާޖީ މަހާރާޖަކީ އިންޑިއާގެ ހުޅަނގުގައި މަރާޓާ އެމްޕަޔަރު ބިނާކުރެއްވި ބޭފުޅާއެވެ. އޭނާ ވަނީ ޑެކަން ސަލްޓަނޭޓްތަކާއި މުގަލް އެމްޕަޔަރާ ކުރިމަތިލައްވައި، އަމިއްލަ މިނިވަން ރަސްކަމެއް ޤާއިމުކުރައްވާފައެވެ. ޚާއްޞަކޮށް 1663 ވަނަ އަހަރު މުގަލް ޖެނެރަލް ޝާއިސްތާ ޚާނަށް އަމާޒުކޮށް ޕޫނޭގައި ދިން ވަރުގަދަ ހަމަލާއާއި، 1664 ވަނަ އަހަރު މުގަލް އެމްޕަޔަރުގެ މުހިންމު ބަނދަރެއް ކަމަށްވާ ސޫރަތަށް ދިން ހަމަލާތަކަކީ ތާރީޚީ ގޮތުން ފާހަގަކޮށްލެވޭ ކަންކަމެވެ.

މުމްބާއީ ފިލްމު ކޮމްޕެނީގެ ދަށުން ޖިޔޯތީ ދޭޝްޕާންޑޭ އާއި ޖެނީލިއާ ދޭޝްމުކް އުފައްދާފައިވާ މި ފިލްމު މިހާރު އަންނަނީ ސިނަމާތަކުގައި ދައްކަމުންނެވެ.