އިލްމީ ގޮތުންނާއި ހުނަރުގެ ގޮތުން އަންހެނުން ދުނިޔެ ބަދަލުކުރަމުންދާ އަދި އެންމެ އިސް ދައުރެއް އަދާކުރާ މުހިންމު ދާއިރާތައް.

ވަޒީފާގެ ބާޒާރުގައި ވަކި ޖިންސަކަށް ޚާއްޞަވެފައިވާ ދާއިރާތައް ހުރުމަކީ އާންމު ކަމެކެވެ. ބައެއް ދާއިރާތަކަކީ ފިރިހެނުންގެ ނުފޫޒު ގަދަ ދާއިރާތަކެއް ނަމަވެސް، އަނެއްބައި ދާއިރާތަކުގައި ރާސްތާ ކުރަނީ އަންހެނުންނެވެ. މި ލިޔުމުގައި އަޅުގަނޑުމެން ބަލައިލާނީ އަންހެނުންގެ ހިއްސާ އެންމެ ބޮޑު ވަޒީފާތަކަށެވެ.

ތާރީޚަށް ބަލާއިރު، ގައުމުތަކުގެ ހަމަޖެހުމާއި ތަރައްގީގައި އަންހެނުން ވަނީ މުހިންމު ދައުރެއް އަދާކޮށްފައެވެ. މިސާލަކަށް، ދެވަނަ ބޮޑު ހަނގުރާމައިގެ ދުވަސްވަރު ފިރިހެނުން ހަނގުރާމައަށް ދިއުމުން، ނަރުހުންގެ ގޮތުގައާއި، މަތިންދާބޯޓު މެކޭނިކުންގެ ގޮތުގައާއި، އެމްބިއުލަންސާއި ލޮރީ ދުއްވުމުގެ އިތުރުން ނައުބަނުމުގެ މަސައްކަތުގައި ވެސް އަންހެނުން ހަރަކާތްތެރިވިއެވެ. މިއަދު އަންހެނުން ދަނީ ހުރިހާ ދާއިރާއެއްގައި ވެސް ފާހަގަކޮށްލެވޭ ފަދަ ކުރިއެރުންތަކެއް ހޯދަމުންނެވެ. ނަތީޖާއެއްގެ ގޮތުން ދުނިޔޭގެ ނިސްބަތުން މަސައްކަތްކުރާ އާބާދީގެ ގާތްގަނޑަކަށް 57.4 އިންސައްތައަކީ އަންހެނުންނެވެ. އަދި ބައެއް ދާއިރާތަކުގައި ފިރިހެނުންގެ ނިސްބަތާއެއްވަރަށް އަންހެނުން މަސައްކަތް ކުރަމުންދާއިރު ބައެއް ދާއިރާތަކުގައި އަންހެނުންގެ އަދަދު ނިސްބަތުން މާ ގިނަކަން އުފަލާއެކު ފާހަގަކޮށްލަންޖެހެއެވެ.

އިގްތިސާދީ މާހިރުން މިފަދަ ދާއިރާތަކަށް "ޕިންކް ކޮލަރ" ދާއިރާތަކުގެ ނަމުން މުޚާތަބު ކުރެއެވެ. މި ދާއިރާތައް ފުޅާވަމުން ދިޔަ ނަމަވެސް، އުޖޫރައިގެ ގޮތުން އަދިވެސް ގޮންޖެހުންތަކެއް އެބަހުއްޓެވެ. މި ދާއިރާތަކާ ބެހޭ ތަފްސީލު ތިރީގައި އެވަނީއެވެ.

"ޕިންކް ކޮލަރ" މި ލަފުޒު 1970 ގެ ފަހުކޮޅު މަޝްހޫރުވެގެން ދިޔައީ ލިޔުންތެރިޔާ ލުއީސް ކެޕް ހޯވްގެ ސަބަބުންނެވެ. އޭރު މި ލަފުޒު ބޭނުންކުރީ ނަރުހުން، ސެކްރެޓަރީން އަދި ޕްރައިމަރީ ޓީޗަރުންގެ ގޮތުގައި މަސައްކަތްކުރާ އަންހެނުންނަށް ނިސްބަތްކޮށެވެ. ނަމަވެސް މިއަދު އަންހެނުން ކުރިއަރައިގެން ގޮސްފައިވާ ހިސާބަށް ބަލާއިރު، ފޯޗޫން 500 ކުންފުނިތަކުގެ ސީ.އީ.އޯ އިންގެ ތެރޭގައި އަންހެނުންގެ ނިސްބަތަކީ އެންމެ 15 އިންސައްތައެވެ. އެހެންކަމުން މިދާއިރާއިންވެސް އަންހެނުން އިތުރުވާން ޖެހެއެވެ. އަންހެނުން އިތުރުކުރަން ހުރި ދާއިރާތަކަށް ބަލާއިރު އައި.ޓީ، ކޮންސްޓްރަކްޝަން، އިންޖިނިއަރިންގް އަދި ފައިނޭންސް ފަދަ ދާއިރާތަކަށް ފާހަގަކޮށްލަމެވެ.

އަންހެނުންގެ ހިއްސާ ބޮޑު 11 ދާއިރާ

1. ތަޢުލީމީ ދާއިރާ

މަސައްކަތްކުރާ އަންހެނުންގެ ނިސްބަތް: %76

ވޭތުވެދިޔަ އަހަރުތަކަށް ބަލާއިރު، މިހާރު ތަޢުލީމީ ދާއިރާގައި އަންހެނުންގެ އަދަދު ވަނީ ކުރިއަށްވުރެ ބޮޑަށް އިތުރުވެފައެވެ. އެމެރިކާގެ އެޑިއުކޭޝަން ޑިޕާޓްމަންޓުގެ ތަފާސްހިސާބުތަކުން ދައްކާގޮތުގައި ކިޔަވައިދިނުމުގެ ދާއިރާގެ 76 އިންސައްތައަކީ އަންހެނުންނެވެ. މީގެ ތެރޭގައި ޕްރީސްކޫލުން ފެށިގެން ސާނަވީ ތަޢުލީމާ ހަމައަށް ހުރިހާ ފަންތިއެއް ހިމެނެއެވެ.

2. ކުދިން ބެލެހެއްޓުން (ޗައިލްޑް ކެއަރ)

މަސައްކަތްކުރާ އަންހެނުންގެ ނިސްބަތް: %94

ޑޭކެއަރ ސެންޓަރުތަކުގައި ކުދިންގެ އަސާސީ ބޭނުންތައް ފުއްދައިދީ، ކިޔެވުމާއި ކުޅިވަރުތަކުގައި އެހީތެރިވެދޭ މުވައްޒަފުންގެ ތެރެއިން ގާތްގަނޑަކަށް 94 އިންސައްތައަކީ އަންހެނުންނެވެ.

3. ހިއުމަން ރިސޯސަސް (އެޗް.އާރް)

މަސައްކަތްކުރާ އަންހެނުންގެ ނިސްބަތް: %72

އެޗް.އާރް ދާއިރާއަކީ ވެސް އަންހެނުންގެ ނުފޫޒު ގަދަ ދާއިރާއެކެވެ. 2017 ވަނަ އަހަރުގެ ހިސާބުތަކުން ދައްކާގޮތުގައި އެޗް.އާރް މެނޭޖަރުންގެ 86 އިންސައްތައަކީ އަންހެނުންނެވެ. ނަމަވެސް، މި ދާއިރާގައި ވެސް ފިރިހެނުންނަށް ލިބޭ އުޖޫރަ އަންހެނުންނަށްވުރެ 23 އިންސައްތަ އިތުރުކަން ފާހަގަކުރެވެއެވެ.

4. ޖަނަވާރުންގެ ބަލިތަކަށް ފަރުވާދިނުން (ވެޓެރިނަރީ)

މަސައްކަތްކުރާ އަންހެނުންގެ ނިސްބަތް: %55

މި ދާއިރާއަށް އަންނަ ބަދަލުތަކާއެކު އަންހެނުންގެ އަދަދު ދަނީ އިތުރުވަމުންނެވެ. މިހާރު ވެޓެރިނަރީ މާކެޓުގެ 55 އިންސައްތައަކީ އަންހެނުންނެވެ. އެކަމަކު ތަފާސްހިސާބުތަކުން ދައްކާގޮތުގައި މި ދާއިރާގެ އަންހެން ޑޮކްޓަރުންނަށް ލިބޭ މުސާރަ ފިރިހެނުންނަށްވުރެ ކުޑައެވެ.

5. އިޖުތިމާއީ ޚިދުމަތް (ސޯޝަލް ސާވިސަސް)

މަސައްކަތްކުރާ އަންހެނުންގެ ނިސްބަތް: 82%

އިޖުތިމާއީ މަސައްކަތްތެރިންގެ (ސޯޝަލް ވޯކާސް) ތެރޭގައި ގާތްގަނޑަކަށް 82 އިންސައްތައަކީ އަންހެނުންނެވެ. މީގެ ތެރޭގައި ކައުންސިލަރުންނާއި އިންސާނީ ހައްގުތަކަށް ވަކާލާތުކުރާ ފަރާތްތައް ވެސް ހިމެނެއެވެ.

6. އެކައުންޓެންސީ

މަސައްކަތްކުރާ އަންހެނުންގެ ނިސްބަތް: %60

ކުރިން ފިރިހެނުންގެ ދާއިރާއެއްގެ ގޮތުގައި އޮތް ނަމަވެސް، މިހާރު އެކައުންޓެންޓުންގެ 60 އިންސައްތައަކީ އަންހެނުންނެވެ. އެހެންނަމަވެސް، މަތީ ފަންތީގެ މެނޭޖްމަންޓް މަގާމުތަކުގައި އަންހެނުންގެ އަދަދު އަދިވެސް މަދެވެ.

7. ނާސިންގް (ނަރުސްކަން)

މަސައްކަތްކުރާ އަންހެނުންގެ ނިސްބަތް: %92.3

ނަރުސްކަމަކީ ތާރީޚީ ގޮތުން ވެސް އަންހެނުންގެ ހިއްސާ އެންމެ ބޮޑު އެއް ދާއިރާއެވެ. ރެޖިސްޓާޑް ނަރުހުންގެ 92.3 އިންސައްތައަކީ އަންހެނުންނެވެ.

8. ފަތުރުވެރިކަމާއި މެހެމާންދާރީ (ލެއިޝަރ އެންޑް ހޮސްޕިޓަލިޓީ)

މަސައްކަތްކުރާ އަންހެނުންގެ ނިސްބަތް: %55

މި ދާއިރާގެ މަސައްކަތްތެރިންގެ ދެބައިކުޅަ އެއްބަޔަށްވުރެ ގިނައީ އަންހެނުން ކަމުގައި ވިޔަސް، ސީނިއަރ މެނޭޖްމަންޓް މަގާމުތަކުގައި ތިބީ އެންމެ 23 އިންސައްތަ އަންހެނުންނެވެ.

9. ބޭސް އުފެއްދުމާއި ފާމަސޫޓިކަލްސް

މަސައްކަތްކުރާ އަންހެނުންގެ ނިސްބަތް: %54.6

ފާމަސިސްޓުންގެ ތެރޭގައި އަންހެނުންގެ އަދަދު މިހާރު ވަނީ 54.6 އިންސައްތައަށް އަރާފައެވެ. ފާހަގަކޮށްލެވޭ ކަމަކީ، މި ދާއިރާގައި އަންހެނުންނާއި ފިރިހެނުންގެ މުސާރައިގެ ފަރަގު ވަރަށް ކުޑަކަމެވެ.

10. ޕަބްލިކް ރިލޭޝަންސް (ޕީ.އާރް)

މަސައްކަތްކުރާ އަންހެނުންގެ ނިސްބަތް: %63

ޕީ.އާރް ދާއިރާގެ 63 އިންސައްތައަކީ އަންހެނުން ކަމުގައި ވިޔަސް، ދުނިޔޭގެ އެންމެ ބޮޑެތި ޕީ.އާރް އެޖެންސީތަކުގެ ސީ.އީ.އޯ އިންގެ 78 އިންސައްތައަކީ އަދިވެސް ފިރިހެނުންނެވެ.

11. މެޑިކަލް އެސިސްޓަންޓުން

މަސައްކަތްކުރާ އަންހެނުންގެ ނިސްބަތް: %89.2

ސިއްހީ ދާއިރާގެ އިދާރީ އަދި ކްލިނިކަލް މަސައްކަތްތަކުގައި މެޑިކަލް އެސިސްޓަންޓުންގެ ގޮތުގައި މަސައްކަތްކުރާ މީހުންގެ ތެރެއިން ގާތްގަނޑަކަށް 89 އިންސައްތައަކީ އަންހެނުންނެވެ.

މިއަދުގެ ދުނިޔޭގައި އަންހެނުން ދަނީ ހުރިހާ ދާއިރާއެއްގައި ވެސް އެމީހުންގެ ގާބިލުކަން ސާބިތުކޮށްދެމުންނެވެ. ތަޢުލީމާއި، ސިއްހީ ދާއިރާއާއި، އިންސާނީ ވަސީލަތްތަކުގެ ދާއިރާގައި އަންހެނުންގެ ދައުރު ބޮޑެވެ. ނަމަވެސް، އުޖޫރައިގެ ތަފާތާއި، މަތީ މަގާމުތަކަށް ވާސިލުވުމުގައި ހުރި ހުރަސްތައް ނައްތާލުމަށް ސިސްޓަމެޓިކް ބަދަލުތަކެއް ބޭނުންވެއެވެ. އަންހެނުންގެ ކުރިއެރުމަކީ މުޅި މުޖުތަމައުގެ ކުރިއެރުމެވެ.