މި ފޮޓޯއިން ފެންނަނީ އިސްރާއީލުގެ ހަމަލާތަކުގައި ޝަހީދުވެފައިވާ ލުބުނާނުގެ "އަލް މައްޔާދީން" ޓީވީގެ ނޫސްވެރިންނާއި މުވައްޒަފުންނެވެ.

މި ނޫސްވެރިންނަކީ ލުބުނާނުގެ ދެކުނުގައި ހިނގަމުންދާ ހަމަނުޖެހުންތައް ކަވަރުކުރުމަށް ފާހަގަކޮށްލެވޭ މަސައްކަތްތަކެއް ކުރި ބައެކެވެ.

މީގެ ތެރޭގައި ހިމެނޭ ރިޕޯޓަރު ފަރަހް އުމަރާއި ކެމެރާމަން ރަބީއު އަލް މައުމަރީ ޝަހީދުވީ 2023 ވަނަ އަހަރުގެ ނޮވެމްބަރު މަހުގެ ތެރޭގައި ލުބުނާނުގެ ދެކުނުގެ ރަށެއް ކަމަށްވާ ތައިރު ހަރްފާގައި މަސައްކަތް ކުރަމުން ދަނިކޮށް، އިސްރާއީލުން ދިން ސީދާ މިސައިލް ހަމަލާއެއްގައެވެ.

މި ހާދިސާގައި އެމީހުންނާއެކު މަސައްކަތް ކުރި އެހެން ބައެއް މީޑިއާ އެހީތެރިންވެސް ވަނީ މަރުވެފައެވެ.

އިސްރާއީލާއި ފަލަސްތީނުގެ ހަނގުރާމަ ފެށުނު ފަހުން، ނޫސްވެރިންނަށް އަމާޒުކޮށް ދެމުންދާ ހަމަލާތަކުގައި ޝަހީދުވި ނޫސްވެރިންގެ އަދަދު ވަނީ އިންތިހާއަށް އިތުރުވެފައެވެ.

އެންމެ ފަހުގެ ތަފާސްހިސާބުތަކަށް ބަލާއިރު، ގާޒާއާއި ލުބުނާނުގައި މިހާތަނަށް ޖުމްލަ 150 އަށްވުރެ ގިނަ ނޫސްވެރިން ވަނީ އިސްރާއީލުގެ ހަމަލާތަކުގައި ޝަހީދުވެފައެވެ. މީގެ ތެރޭގައި އަލްޖަޒީރާގެ ރިޕޯޓަރުންނާއި، ފްރީލާންސް ފޮޓޯގްރާފަރުންނާއި، އަދި ބައިނަލްއަގުވާމީ އެކި މީޑިއާތަކަށް މަސައްކަތްކޮށްދޭ ދިހަވަރަކަށް މީހުން ހިމެނެއެވެ.

ނޫސްވެރިންގެ ހައްގުތަކަށް މަސައްކަތްކުރާ ޖަމިއްޔާތަކުން ބުނާ ގޮތުގައި، އިސްރާއީލުން ނޫސްވެރިންނަށް އަމާޒުކޮށް މިފަދަ ހަމަލާތައް ދެނީ ހަނގުރާމައިގެ ހަގީގީ މަންޒަރު ދުނިޔެއަށް ފޮރުވުމުގެ މަގްސަދުގައެވެ.