ކެމްޕެއިނަކާ ގުޅިގެން ނުވަތަ އެހެން ކަމަކާ ގުޅިގެން ވިޔަސް ސިޔާސީ ވަޒީފާ ދިނުން ހުއްޓާލާފައިވާ ކަމަށާއި އެކަން ދެން ނުކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައި، އެންމެ ފަހުން ބޭއްވުނު ކައުންސިލް އިންތިޚާބުގެ ނަތީޖާއަށް ރިޢާޔަތްކުރައްވައި ރައީސް ވިދާޅުވީ، ސިޔާސީ ބޭނުންތަކަށާއި ކެމްޕޭންތަކާ ގުޅުވައިގެން ވަޒީފާ ދިނުމުގެ ސަގާފަތް ނިމުމަކަށް ގެނައުމަށް ރައްޔިތުން އެދޭކަން އިންތިޚާބުގެ ނަތީޖާއިން ހާމަވެފައިވާ ކަމަށެވެ.

"ކެމްޕޭންތަކާ ގުޅިގެންނާއި ސިޔާސީ މަޤްޞަދުތަކުގައި ވަޒީފާ ދިނުން ރާއްޖޭގައި މިހާރު ނިމުމަކަށް އަންނަން ޖެހޭ ކަމަށް ރައްޔިތުން ވަނީ ބުނެފައި. އެހެންކަމުން، ސަރުކާރުން ދެން ޢަމަލުކުރަމުންދާނީ އެ މަގުން،" ރައީސް ވިދާޅުވިއެވެ.

ރައީސް އިތުރަށް ވިދާޅުވީ، ދެން ވަޒީފާ ދިނުމުގައި ޢަމަލުކުރާނީ ސަރުކާރުން ކަނޑައަޅާފައިވާ ރަސްމީ އިޖުރާއަތްތަކުގެ ތެރެއިން، ފުރިހަމަ ކުރަންޖެހޭ އެންމެހާ ކަންކަން ފުރިހަމަކުރުމަށްފަހު ކަމަށެވެ.

"އާންމުކޮށް އިޢުލާނުކޮށްގެން، ކުރިމަތިލާ ފަރާތްތަކުގެ ތަޢުލީމާއި ތަޖުރިބާއަށް ބަލައި، މެރިޓް އުސޫލުން މެނުވީ އެއްވެސް ވުޒާރާއަކަށް ނުވަތަ ސަރުކާރު ހިއްސާވާ ކުންފުންޏަކަށް މުވައްޒަފުން ނުނެގުމަށް ވަނީ ނިންމާފައި. ސަރުކާރުގެ ސިޔާސަތަކީ ދެން އެ އުސޫލުން ކުރިއަށް ދިއުން،" ރައީސް ވިދާޅުވިއެވެ.

މީގެ އިތުރުން، އުސޫލުތަކާ ޚިލާފަށް އެއްވެސް ފަރާތަކަށް ވަޒީފާ ދީފައިވާނަމަ، އެފަދަ މުވައްޒަފުން ވަޒީފާއިން ވަކިކުރުމަށް ކަމާބެހޭ އިދާރާތަކަށް މިހާރު އަންގަވާފައިވާނެ ކަމަށްވެސް ރައީސް ވިދާޅުވިއެވެ.