ބޮލީވުޑްގެ ކާމިޔާބު އެކްޓަރު ރާޖްކުމާރު ރާއޯގެ ދިރިއުޅުމަށް އައި ބޮޑު ބަދަލާއެކު، އޭނާގެ މަސައްކަތުގެ ދާއިރާއަށް ބޮޑެތި ބަދަލުތަކެއް ގެންނަން ނިންމައިފިއެވެ.

ސޯނަލް ކަލްރާގެ "ދަ ރައިޓް އެންގަލް" ޝޯގައި ވާހަކަ ދައްކަމުން ރާޖްކުމާރު ވަނީ ބައްޕައަކަށް ވުމަށްފަހު އޭނާގެ ދިރިއުޅުމަށް އައިސްފައިވާ އިހުސާސްތައް ހިއްސާކޮށްފައެވެ. 2025 ވަނަ އަހަރުގެ ނޮވެމްބަރު މަހު އޭނާއަށް ލިބުނު އަންހެން ދަރިފުޅު 'ޕާރުވަތީ' އާ ބެހޭގޮތުން ވާހަކަ ދައްކާއިރު، އަމިއްލައަށް ނޭނގި ނަމަވެސް މޫނުމައްޗަށް އުފާވެރިކަން އަންނަކަން އޭނާ ފާހަގަކުރިއެވެ. ރާޖްކުމާރު ބުނި ގޮތުގައި، ފިލްމެއްގެ ސެޓުގައި އުޅެނިކޮށް އެކުގައި މަސައްކަތްކުރާ އެކްޓަރަކުވެސް ވަނީ ދަރިފުޅުގެ ވާހަކަ ދައްކާއިރު ރާޖްކުމާރުގެ މޫނުމަތިން ފެންނަ ބަދަލު ފާހަގަކޮށްފައެވެ.

ދަރިފުޅު އުފަންވުމަށްފަހު ފަސް މަސްދުވަހުގެ ބްރޭކެއް ނެގުމަށްފަހު، ރާޖްކުމާރު އެނބުރި މަސައްކަތަށް ނުކުތީ އޭނާގެ އާ ފިލްމު "ދާދާ" ގެ މަސައްކަތަށެވެ. ނަމަވެސް ފަސް މަސް ދުވަހު ދަރިފުޅާއެކު ހޭދަކުރުމަށްފަހު، މަސައްކަތަށް ދިއުމަށް ދަރިފުޅު ދޫކޮށްލާފައި ދިއުމަކީ ވަރަށް އުނދަގޫވި ކަމެއްގެ ގޮތުގައި އޭނާ ސިފަކުރިއެވެ. "އަހަރެން ބޭނުންވަނީ 24 ގަޑިއިރު ދަރިފުޅާއެކު ހުންނަން. އޭނާ ބޮޑުވަމުން އަންނަ މަންޒަރު ދެކެން އަހަރެން ބޭނުން،" ރާޖްކުމާރު ބުންޏެވެ.

މި އިހުސާސްތަކާއެކު، ރާޖްކުމާރު ވަނީ އޭނާގެ ފިލްމީ މަސައްކަތްތައް މަދުކުރަން ނިންމާފައެވެ. އޭނާ ބުނި ގޮތުގައި ކުރިއަށް އޮތް ތަނުގައި ފިލްމުތައް އިޚްތިޔާރު ކުރުމުގައި ވަރަށް ބޮޑަށް ބަލާނެއެވެ. އަދި އޭނާގެ މަގްސަދަކީ އޭނާގެ މަންމައާއި، އަންހެނުން ޕަޓްރަލޭކާގެ އިތުރުން ދަރިފުޅު ޕާރުވަތީ ފަޚުރުވެރިވާ ފަދަ މޮޅު މަސައްކަތްތަކެއް ކުރުމެވެ. އޭނާ އިތުރަށް ބުނީ ދަރިފުޅާއެކު ވަގުތު ހޭދަކުރުމަށްޓަކައި ކުރިއަށް އޮތް ތަނުގައި އަހަރަކު ކުޅޭނީ އެންމެ ދެ ފިލްމު ކަމަށެވެ.

މަސައްކަތް މަދުކުރަން ނިންމި ނަމަވެސް، ރާޖްކުމާރުގެ އަތުގައި މިހާރުވެސް ޝައުގުވެރި މަޝްރޫއުތަކެއް އެބަހުއްޓެވެ. އޭގެ ތެރޭގައި އިންޑިއާގެ ކުރީގެ މަޝްހޫރު ކްރިކެޓް ކުޅުންތެރިޔާ ސޯރަވް ގަންގޫލީގެ ބަޔޯޕިކްގައި އޭނާ އަދާކުރާ ރޯލު ފާހަގަކޮށްލެވެއެވެ.